24 గంటలు

భారత్ ను గెలిపించిన ధోనీ

2012-02-12T17:02:00.000+05:30

కూల్ కెప్టెన్ ధోనీ ఆపదలో ఆదుకున్నాడు. ముక్కోణపు సిరీస్ లో భాగంగా అడిలైడ్ లో ఆస్ట్రేలియాతో జరిగిన వన్డేలో భారత్ కు చిరస్మరణీయమైన విజయాన్ని అందించాడు. మొదట్లో ఎన్నో బంతులను వృథా చేసిన కెప్టెన్.. చివరి ఓవర్లో మాత్రం రెచ్చిపోయాడు. ఓటమి ఖాయం అనిపించిన తరుణం నుంచి.. గెలుపు దిశగా నడిపించాడు. అసలు చివరి ఓవర్లో ఏం జరిగిందంటే...బంతులు.. 6.. లక్ష్యం.. 13 పరుగులు..1. తొలి బంతికి అశ్విన్ స్ట్రైకింగ్ లో ఉన్నాడు. షాట్ మిస్ అయ్యింది. పరుగులేమి రాలేదు.2. ఇంకా ఐదు బంతుల్లో 13 పరుగులు చేయాలి. అశ్విన్ మిడ్ వికెట్ దిశగా బంతిని తరలించాడు. రెండో పరుగును ధోనీ వద్దన్నాడు.. సింగిల్తోనే సరిపెట్టాడు.. 3. నాలుగు బంతులు 12 పరుగులు. అవతల బౌలింగ్ చేస్తోంది అప్పటికే మూడు కీలక వికెట్లు తీసిన మెక్ కే. ధోనీ బాధ్యతలను భుజాన వేసుకున్నాడు. అందర్లోనూ టెన్షన్ మొదలయ్యింది. మెక్ కే చేతుల్లోంచి బంతి జారడం.. అది ధోనీ బ్యాట్ తగిలి గాల్లోకి లేవడం.. లాంగ్ ఆన్ దిశలో వెళ్లి బౌండరీ అవతల పడడం.. చకచకా జరిగిపోయాయి. అందరిలోనూ ఒక్కసారిగా ఉత్సాహం..4. మూడు బంతులు.. ఆరు పరుగులు.. లక్ష్యం కాస్త తేలికయ్యింది. మెక్ కే ఈ సారి ఫుల్ టాస్ బాల్ వేశాడు. సిక్స్ బాదిన ఊపులోనే ధోనీ బ్యాట్ ఝలిపించాడు. టీవీలో మ్యాచ్ చూస్తున్న వారంతా సిక్స్ అని అనుకుంటున్న సమయంలో డీప్ స్క్వేర్ లెగ్లో బౌండరీ లైన్ కు కాస్త ముందు క్యాచ్ పట్టాడు.. అందర్లోనూ ఒక్కసారిగా నిస్సత్తువ. కానీ.. అది నో బాల్. ఎక్కువ ఎత్తులో వేయడంతో దాన్ని నోబాల్ గా ప్రకటించాడు ఎంపైర్. అప్పటికే రెండు పరుగులు తీసేశాడు ధోనీ. అందర్లోనూ మళ్లీ ఉత్సాహం.5. మూడు బంతులు.. మూడు పరుగులు. మళ్లీ అందర్లో ఊపొచ్చింది. ఇక లక్ష్యం తేలిక పడింది. కానీ, అవతల ఉంది ఆస్ట్రేలియా. మెక్ కే వేసిన బంతిని ఆన్ సైడ్ లో నో మ్యాన్స్ ల్యాండ్లోకి నెట్టిన ధోనీ చక చకా పరుగులు తీయడం మొదలుపెట్టాడు. ఫోర్ వెళ్లకుండా వార్నర్ దాన్ని ఆపినా.. అప్పటికే మూడు పరుగులు తీసిన ధోనీ.. విజయగర్వంతో వికెట్ ను పీకాడు.. అంతే.. భారత్ గెలుపు.. జనంలో ఊపు..కొసమెరుపు: 9 ఓవర్లలో కేవలం 39 పరుగులు మాత్రమే ఇచ్చి.. సెహ్వాగ్, కోహ్లీ, గంభీర్ వికెట్లను తన ఖాతాలో వేసుకుని టీమ్ ఇండియాను ఒత్తిడిలోకి నెట్టేసిన మెక్ కేనే చివరి ఓవర్లో ఒత్తిడికి లోనయ్యాడు.. భారత్ గెలుపుకు బాటలు పరిచాడు.. మరో విషయం.. గంభీర్ చేసిన 92 పరుగులు ఈ మ్యాచ్ లో విజయానికి కారణంగానే చెప్పొచ్చు.

అరసవల్లికి పరుగెత్తిన మంత్రి మోపిదేవి

2012-02-12T16:36:00.002+05:30

మద్యం ముడుపుల ఆరోపణలు ఎదుర్కొంటున్న మంత్రి మోపిదేవి అరసవల్లి శ్రీ సూర్యనారాయణుడిని దర్సించుకున్నారు. ఈ ఉదయాన్నే అరసవల్లికి చేరుకున్న ఆయన ఆలయంలో ప్రత్యేక పూజలు చేశారు. పరిపాలన సజావుగా సాగానే కోరుకున్నానని మంత్రిగారు మీడియాకు చెప్పినా, ఇంత హడావిడిగా అరసవల్లికి వచ్చి పూజలు చేయడంలో ఆంతర్యం వేరే అయ్యి ఉంటుందని గుసగుసలు వినిపిస్తున్నాయి. ముఖ్యంగా మద్యం ముడుపుల గొడవ నుంచి తనను బయటపడేయాలని స్వామిని వేడుకున్నట్లు తెలుస్తోంది. అన్నట్లు.. గాలి అక్రమాల కేసులో అరెస్ట్ కావడానికి ముందు కూడా ఐఏఎస్ ఆఫీసర్ శ్రీలక్ష్మి ఇలానే అరసవల్లికి వచ్చి పూజలు చేశారు. మరి మోపిదేవి సంగతి ఏమవుతుందో...!

ఆగిపోయిన అధినాయకుడు

2012-02-11T19:24:00.000+05:30

బాలకృష్ణ త్రిపాత్రాభినయం చేస్తున్నఅధినాయకుడు సినిమా అర్థాంతరంగా ఆగిపోయింది. దీనికి సినీ నిర్మాత వైఖరే కారణమని తెలుస్తోంది. సినిమా మొదలుపెట్టినప్పటి నుంచి ఆర్టిస్టులకు, టెక్నీషియన్లకు ఆయన ఒప్పందం ప్రకారం డబ్బులు ఇవ్వడం లేదు. షూటింగ్ పూర్తి చేసుకున్న అధినాయకుడు పోస్ట్ ప్రొడక్షన్ కూడా పూర్తి కావచ్చింది. హీరో బాలకృష్ణ మరో మూడు రోజులు డబ్బింగ్ చెబితే సినిమా విడుదల కావడం ఖాయం. అయితే.. సినిమా విడుదలైతే, ఒక్కపైసా కూడా అందదని గుర్తించిన టెక్నీషియన్లు బాలయ్యను ఆశ్రయించారు. తమకు ఇవ్వాల్సిన డబ్బు ఇవ్వడం లేదని ఫిర్యాదు చేశారు. అప్పుడు కానీ, బాలయ్యకు అసలు విషయం అర్థం కాలేదు.. తనకు కూడా నిర్మాత డబ్బులు పూర్తిగా ఇవ్వలేదని.. అంతే, నిర్మాత ఎం.ఎల్. కుమార చౌదరికి కబురు పెట్టాడు. రాగానే, డబ్బుల సంగతి అడిగాడు.. రెండు మూడు రోజుల్లో సర్దేస్తామని రోటీన్ డైలాగ్ వదిలాడు సదరు నిర్మాత. అంతే, అడ్వాన్స్ ఇచ్చిన తర్వాతే మిగిలిన డబ్బింగ్ అంటూ బాలయ్య వెళ్లిపోయినట్లు ఫిల్మ్ వర్గాలు గుసగులాడుతున్నాయి. ఈ దెబ్బకు అధినాయుకుడు ప్రాజెక్టు కాస్తా అటకెక్కినట్లు తెలుస్తోంది. నిర్మాత డబ్బులు విదిలిస్తే కానీ, రిలీజ్ కాని పరిస్థితి నెలకొంది.

స్పీడ్ కోసం బుల్లెట్ ఎక్కిన బాబు

2012-02-11T19:11:00.000+05:30

చంద్రబాబు అంటే సైకిల్ గుర్తొస్తుంది. అది టీడీపీ పార్టీ ఎన్నికల గుర్తు. అడపా దడపా సైకిల్ పైకి జనం మధ్య కనిపించడం చంద్రబాబుకు అలవాటే. అయితే.. ప్రజెంట్ పాలిటిక్స్లో సైకిల్ తొక్కితో స్పీడ్ గా వెళ్లలేమనుకున్నారో ఏమో గానీ.. చంద్రబాబు, సైకిల్ బదులు బైకును ఎంచుకున్నారు. అదీ సాదాసీదా బైక్ కాదు.. బుల్లెట్. బహుశా తుపాకీ బుల్లెట్లా జనంలోకి దూసుకుపోవాలని చంద్రబాబు భావిస్తున్నట్లున్నారు. యువతరంగం పేరుతో వరసగా విశాఖ,విజయవాడ, తిరుపతి, హైదరాబాద్ లలో నిర్వహించిన యువతరంగం ర్యాలీల్లో చంద్రబాబు స్వయంగా బుల్లెట్ బైక్ ను నడిపారు. ఉల్లాసంగా, ఉత్సాహంగా కనిపించారు. ఈ స్పీడ్ వచ్చేఎన్నికల వరకూ సాగుతుందా లేదా అన్నదే ఇప్పుడు హాట్ టాపిక్.

కెమెరామెన్ గంగతో రాంబాబు.. పూరీ-పవన్‌ల కొత్త సినిమా

2012-02-10T19:02:00.002+05:30

బిజినెస్ మేన్‌ విజయంతో ఊపు మీదున్న పూరీ.. ఆ ట్రెండ్ ను కంటిన్యూ చేసే పనిలో పడ్డాడు. తనకు తొలి మేజర్ సక్సెస్ను ఇచ్చిన పవన్ కళ్యాణ్‌తో కొత్త సినిమాకు శ్రీకారం చుట్టాడు. దీనికి టైటిల్ కూడా పెట్టేశాడు. అదే.. కెమెరామెన్ గంగతో రాంబాబు.. వెరైటీ టైటిల్సును ఎంచుకోవడంలో పేరుమోసిన పూరీ.. కొత్త సినిమాకు అదే రూట్లో వెళ్లాడు. పైగా, తాను ఎంతో ఇష్టంగా మీడియాపై వేసే సెటైర్లతోనే సినిమాకు శ్రీకారం చుట్టాడు. ప్రస్తుతం బ్యాంకాక్‌లో ఈ సినిమాకోసం స్టోరీ రాసుకునే పనిలో ఉన్నాడు పూరీ. మంచి హిట్ కోసం చాలా కాలంగా ఎదురుచూస్తున్న పవన్ కళ్యాణ్ కూడా ఈ సినిమాపై భారీగానే ఆశలు పెట్టుకున్నాడు.

మార్కెట్లోకి ముడుచుకుపోయే కారు

2012-02-09T17:58:00.002+05:30

ప్రపంచ కారు చరిత్రలో మరో సరికొత్త అధ్యాయం మొదలయ్యింది. ముడుచుకుపోయే అత్యద్భుతమైన కారును స్పెయిన్ కంపెనీ తయారు చేసింది. దీనిపేరు హిరికో. గతంలో ఎం.ఐ.టీ పేరుతో డిజైన్ అయిన ఈ కాన్సెప్ట్ కార్.. ఇప్పుడు హిరికో పేరుతో రోడ్డెక్కడానికి సిద్ధమవుతోంది. ఇందులో ఇద్దరు కూర్చునే వీలుంటుంది. విద్యుత్ ఆధారంగా పనిచేయడంతో పొల్యూషన్ కూడా విడుదల కాదు. పట్టణాల్లో తిరగడానికి అత్యంత అనువైన కార్ అని కంపెనీ చెబుతోంది. 2013 కల్లా యూరప్ లోని 24 నగరాల్లో వీటిని అమ్మడానికి ప్రయత్నాలు మొదలుపెట్టింది. ఇద్దరు మాత్రమే ప్రయాణించగలిగే ఈ కారును కావల్సినప్పుడు ఫోల్డ్ చేసుకోవచ్చు. ఓ సాధారణ కారు పార్కింగ్కు పట్టే స్థలంలో మూడు హిరికో కార్లను ఉంచొచ్చు. వంద కిలోమీటర్ల గరిష్ట వేగంతో వెళ్లగలిగే అవకాశం ఈ కారులో ఉంటుంది. మన కరెన్సీలో దీని ధర దాదాపు 8 లక్షలు.

రూ.5 వేలలోపు దొరికే అద్భుతమైన మొబైల్స్

2012-02-09T15:27:00.002+05:30

ఇది మొబైల్ యుగం. లేటెస్ట్ మొబైల్ చేతిలో లేకపోతే వెనకపడినట్లే లెక్క. ఇన్ స్టంట్ మెసేజ్, ఫేస్ బుక్, ఇంటర్నెట్, మల్టీ పిక్సెల్ కెమెరా.. ఇలా అన్నీ సెల్ ఫోన్లో ఉండాల్సిందే. కానీ అన్ని ఫీచర్లూ కావాలంటే పదివేలకు పైనే చెల్లించాల్సిఉంటుంది. ఇది అందరికీ సాధ్యం కాదు. కానీ, రూ.5 వేలలోపే అద్భుతమైన ఫీచర్లున్న ఫోన్లు అందుబాటులో ఉంటే.. ఆశ్యర్యమే కదూ.. అలాంటి ఐదు ఫోన్లు మీ కోసం..

ఈ లిస్టులో అన్నింటికన్నా ముందున్నది Nokia C2-03 Touch and Type ఫోన్‌. దీని కాస్ట్‌ కేవలం 4,425 రూపాయలు మాత్రమే. ఈ టచ్‌ అండ్‌ టైప్‌ స్లైడర్ డివైజ్‌తో వావ్‌ అనిపిస్తోంది. 2.6 ఇంచస్‌ డిస్‌ప్లేతో ఇందులో డ్యూయల్‌ సిమ్, 2 మెగా పిక్సల్‌ కెమెరా, 32 జిబి మైక్రో ఎస్‌డి కార్డ్‌ ఫెసిలిటీ ఉంది. బ్యాటరీ బ్యాకప్‌ మినిమమ్‌ 2 డేస్‌ వరకు ఉంటుంది. దీనికున్న మరో విశిష్టత.. రెండో సిమ్ కార్డును పెట్టడానికి, తీయడానికి మొబైల్ ను స్విచ్ఛాఫ్ చేయాల్సిన అవసరం లేదు. సైడ్ న ఉన్న స్లాట్లో నేరుగా పెట్టుకోవచ్చు.

రెండో ఫోన్ మోటరోలా క్వార్ట్జ్ EX212. దీని కాస్ట్‌ కేవలం 4,599 రూపాయలు మాత్రమే. ఇందులో కూడా డ్యూయల్‌ సిమ్ ఫెసిలిటీ ఉంది. 2మెగా పిక్సల్‌ కెమెరాతో పాటు విత్ వీడియో రికార్డింగ్‌ ఫెసిలిటీ ఉంది. ఎఫ్‌ఎమ్‌, మ్యూజిక్‌ ప్లేయర్‌తో పాటు బెస్ట్‌ లుక్కింగ్ హ్యాండ్‌ సెట్‌ అవడంతో కస్టమర్స్‌ దీనిపై మనసుపారేసుకుంటున్నారు. గతంలో మోటరోలా రిలీజ్ చేసిన రేజర్ మోడల్లోనే కనిపించే ఈ ఫోన్ ధర విషయంలో మాత్రం అందరికీ అందుబాటులో ఉంది.

లో కాస్ట్ మొబైల్స్ తయారీపై దృష్టి పెట్టిన నోకియా.. ఆశ పేరుతో ఓ కొత్త సిరీస్ ను తీసుకొస్తోంది. అందులో మొదటిది Nokia Asha 200. దీని ధర కేవలం 4వేల 370. 2.4 అంగుళాల డిస్‌ప్లే స్క్రీన్‌, వెల్‌ స్పేస్డ్‌ కీపాడ్‌, 2మెగా పిక్సల్‌ కెమెరా, 1430 mAh battery కెపాసిటీ ఉండటంతో ఒక్కసారి రీచార్జ్‌ చేస్తే మినిమమ్‌ 3 డేస్‌ వరకు ఉంటుంది. 32 GB micro SD cardతో చూడగానే అందరినీ ఆకర్షిస్తోంది.

ఇక మా ఎంపికలో నాలుగో ఫోన్.. Samsung Chat C3222, క్వర్టీ కీ ప్యాడ్, 2.2 అంగుళాల స్క్రీన్, 1.3 మెగాపిక్సెల్ కెమెరా దీని ప్రత్యేకత. ఒక్కసారి రీఛార్జ్ చేస్తే, 12 గంటలకు పైగా బ్యాటరీ బ్యాకప్ వస్తుంది. ఇందులో ఉన్న మ్యూజిక్ ప్లేయర్ త్రీడీ సౌండ్ సిస్టంను అందిస్తుంది. దీని ధర రూ.3850.

టాప్ -5 లిస్టులో చివరిది Karbonn K1616 Magic. దీని ధర రూ.4829. అతిపెద్ద డిస్ ప్లే స్క్రీన్ దీని ప్రత్యేకత. మెటాలిక్ బ్యాటరీ కవర్, హై సెన్సిటివీ టచ్ స్క్రీన్తో ఇది తయారయ్యింది. అంతేకాదు.. SMS, నోట్స్ ను కట్, కాపీ, పేస్ట్ చేసుకునే సౌలభ్యాన్ని అందించే ఫోన్ కూడా ఇదే. మరి వీటిలో మీ ఛాయిస్ ఏదో సెలెక్ట్ చేసుకోండి. తక్కువ ధరలోనే అన్ని ఫీచర్లనూ పొందండి.

డీఎల్ వివాదం ౩ : పదవుల కోసం ఢిల్లీకి సూట్ కేసులు మోసింది ఎవరు?

2012-02-08T14:24:00.001+05:30

కేబినెట్ విస్తరణ నేపథ్యంలో రాజీనామా చేస్తానన్న వార్తలను మంత్రి డీఎల్ ఖండించారు. తాను రాజీనామా చేయడం లేదన్నారు. పార్టీకి ద్రోహం చేసే ఆలోచన తనకు లేదని ప్రకటించారు. అయితే, తన మనసులో అసంతృప్తిని మాత్రం వెళ్లగక్కారు. పరోక్షంగా సీఎంపై విమర్శలు కురిపించారు. మంత్రిగా తాను ఎలాంటి తప్పు చేయలేదన్న డీఎల్... ఉన్నత పదవుల్లో ఉన్నకొందరు చెప్పిన పనులు తాను చేసి ఉండకపోవచ్చన్నారు. ఉన్నత స్థానాల్లో ఉన్నవారు తప్పు చేయమంటే తాను చేయనని, అబద్ధాలు చెప్పనని స్పష్టం చేశారు. అంతేకాదు.. పదవుల కోసం సూట్ కేసు పట్టుకుని చెన్నై, ముంబై మీదుగా ఢిల్లీ వెల్లనని కూడా ప్రకటించారు డీఎల్. అయితే.. ఆ ఉన్నత స్థాయిలో ఉండి తప్పు చేయమన్నది ఎవరు..? పదవుల కోసం సూట్ కేసు పట్టుకుని ఢిల్లీ వెళ్లింది ఎవరన్నదే ఇప్పుడు కీలకంగా మారింది. ఈ వ్యాఖ్యలు చేసింది... సీఎం కిరణ్ ను ఉద్దేశించేనా..?

డీఎల్ వివాదం2 : కిరణ్ గుట్టు డీఎల్ విప్పుతారా..?

2012-02-08T10:20:00.002+05:30

కేబినెట్లో మార్పులో కస్సుబుస్సు మంటున్న మంత్రి డీఎల్ రవీంద్రారెడ్డి.. సీఎం కిరణ్తోనే నేరుగా తలపడడానికి సిద్ధమయ్యారు. పార్టీకి రాజీనామా చేయాలని భావిస్తున్న ఆయన.. సీఎం లోటుపాట్లను జనం ముందు పెట్టాలనుకుంటున్నారు. 108 వివాదం వల్లే తనను పక్కన పెట్టి, ఆ బాధ్యతను కిరణ్, తన విశ్వాసపాత్రుడైన కొండ్రు మురళికి అప్పజెప్పారని డీఎల్ భావిస్తున్నారు. జీవీకేతో ఒప్పందాన్ని మొదటినుంచి డీఎల్ వ్యతిరేకిస్తున్నారు. ప్రభుత్వ సొమ్ముతో నడుస్తున్న సేవలపై ప్రైవేటు పెత్తనాన్ని ఆయన ఒప్పుకోవడం లేదు. దీనివల్లే ఈ ఒప్పందం విషయంలో చాలాకాలంగా సంక్షోభం కొనసాగుతోంది. అయితే, ఈ ఒప్పందం విషయంలో కిరణ్ గుట్టును డీఎల్ విప్పబోతున్నట్లు తెలుస్తోంది. దీంతో పాటే, జగన్కు కిరణకు మధ్య ఉన్న సంబంధాలను జనానికి చెప్పుతారని డీఎల్ వర్గం సంకేతాలిస్తోంది.

డీఎల్ వివాదం1: మంత్రి పదవికి, కాంగ్రెస్కు డీఎల్ రాజీనామా?

2012-02-08T10:03:00.000+05:30

మంత్రివర్గ పునర్వ్యవస్థీకరణ కాంగ్రెస్లో కుమ్ములాటలను మరింత పెంచింది. తన శాఖను కత్తిరించడంపై ఆగ్రహావేశాలతో ఊగిపోతున్న డీఎల్ రవీంద్రారెడ్డి, సంచలన నిర్ణయం తీసుకోబోతున్నట్లు తెలుస్తోంది. శాఖా పరిధిని తగ్గించే బదులు, మంత్రి పదవినుంచే తొలగిస్తే ఆనందించేవాడినన్న డీఎల్, భవిష్యత్తు విషయంలో సీరియస్గా ఆలోచిస్తున్నారు. తన అనుచరులతో సంప్రదింపులు జరిపారు. మంత్రి పదవికే కాక, కాంగ్రెస్ పార్టీకి కూడా రాజీనామా చేయాలని ఆయన నిర్ణయించుకున్నట్లు తెలుస్తోంది. కాంగ్రెస్ ను వదిలి, టీడీపీలో చేరాలని భావిస్తున్నట్లు సమాచారం. అయితే, దీనిపై ఆయన అధికారికంగా ఇంకా ప్రకటన చేయలేదు. మరికాసేపట్లో పీసీసీ చీఫ్ బొత్సను కలిసి ఆయనకు ఈ విషయాలను చెప్పే అవకాశం ఉంది. సీఎంకు, డీఎల్ కు చాలా కాలంగా పొసగడం లేదు. దీంతో, తనకు పార్టీలో మరింత అవమానం జరుగుతుందని భావిస్తున్న డీఎల్, ఈ సంచలన నిర్ణయం తీసుకున్నట్లు తెలుస్తోంది. వాస్తవానికి 2004లోనే, మైసూరారెడ్డితో కలిసి డీఎల్ కూడా టీడీపీలో చేరాలని భావించారు. కానీ, చివరి నిముషంలో మనసు మార్చుకున్నారు. డీఎల్ చేరికపై టీడీపీ నుంచి మాత్రం ఇంతవరకూ ఎలాంటి సమాచారమూ లేదు.. బొత్స ను కలిసిన తర్వాత పూర్తి వివరాలను సీఎల్పీ నుంచే ప్రెస్ మీట్ పెట్టి డీఎల్ చెప్పే అవకాశం ఉంది.

మెగా మోడ్రన్ ఫ్యామిలీ

2012-02-05T16:23:00.002+05:30

ఈ ఫోటో చూడండి.. ఎంత అందంగా మనవాళ్లు ఫోజులిచ్చారో.. మెగా కుటుంబానికి చెందిన వాళ్లంతా విదేశాలకు వెళ్లినప్పుడు సరదాగా ఇచ్చిన ఫోజ్ ఇది.. ఎంత మోడ్రన్ ఫ్యామిలోనో కదా..!

సంక్రాంతి అయ్యింది.. మార్చి, ఏప్రిల్ మిగిలింది

2012-02-05T16:21:00.002+05:30

తెలంగాణ ఉద్యమాన్ని దఫదఫాలుగా వాయిదా వేస్తూ వస్తున్న తెలంగాణ జేఏసీ, టీఆర్ ఎస్ పార్టీలు.. ఇప్పుడు మరో కొత్త పల్లవి అందుకున్నాయి. సంక్రాంతి తర్వాత తేల్చుకుంటామంటూ డిసెంబర్ నెలలో నానా హడావిడి చేసినవాళ్లు కాస్తా.. పండుగయ్యాక ఒకే ఒక్క ధర్నాతో సరిపెట్టారు. ఇక తెలంగాణ ఉద్యమ రధసారధిగా చెప్పుకునే కేసీఆర్, చాలా వరకూ ఇంటికే పరిమితమవుతున్నాయి. ఈ మధ్య కాలంలో ఆయన బయటకు వచ్చిన కనిపించిన సంఘటనలు చాలా తక్కువ. ఇవాళ మంచిర్యాలలో పర్యటించిన కేసీఆర్.. మళ్లీ మార్చి తర్వాత తెలంగాణ ఉద్యమాన్ని ఉధృతం చేస్తామన్నారు. అయితే, పరీక్షలు ఉండే మార్చి, ఏప్రిల్ నెలలను ఎందుకు ఎంచుకుంటున్నారన్నది అంతుచిక్కని ప్రశ్న. లేదంటే, అప్పుడు పరీక్షలను సాకుగా చూపించి వాయిదా వేస్తారేమో..? ఇప్పటికే తెలంగాణ జేఏసీ, టీఆర్ఎస్, ఇతర రాజకీయ పార్టీలను నమ్ముకొని సకలజనుల సమ్మెలో పాల్గొన్న ఉపాధ్యాయులంతా జీతాలందక చేతులు కాల్చుకున్నారు. వారి కోసం ఏవో ప్రెస్ మీట్లు పెట్టి డిమాండ్ చేయడం తప్పితే, జనం మధ్యకు వచ్చి పోరాడిన చరిత్ర ఈ పార్టీలకు లేదు. ఈ నేపథ్యంలో మరో విడత ఉద్యమం ఎలా జరుగుతుందన్నది ఊహించడం కష్టమే..

వడ్డీకి ఇచ్చారు... వ్యాపారం చేసుకోమన్నారు..

2012-01-29T22:59:00.000+05:30

మద్యం మాఫియాలో చీకటి కోణం వెలుగులోకి వచ్చింది. మద్యం సిండికేట్లపై, ఎక్సైజ్ అధికారులపై ఏసీబీ పలు దఫాలుగా చేసిన దాడులు.. ఆశ్చర్యకరమైన వివరాలను బయటపెట్టాయి. సిండికేట్లను అరికట్టాల్సిన ఎక్సైజ్ అధికారులే.. వాళ్లకు అప్పులు ఇచ్చి ప్రోత్సహిస్తున్నారని ఏసీబీ గుర్తించింది. సిండికేట్లపై ఏసీబీ రూపొందించిన 750 పేజీల నివేదికలో పలు కీలక విషయాలున్నాయి. ఏడు జిల్లాల్లో 22 ప్రాంతాల్లో 33 మద్యం సిండికేట్‌ కార్యాలయాలపై ఏసీబీ ఇటీవల దాడులు జరిపింది. మద్యం సిండికేట్లకు.. ఏసీబీ అధికారులు అప్పులు ఇస్తున్నట్లు ఏసీబీ గుర్తించింది. ఓ జిల్లాలో మద్యం సిండికేట్ నాయకుడికి ఆ ప్రాంత ఎక్సైజ్‌ సిబ్బంది రెండు కోట్ల 40 లక్షల రుపాయాలను అప్పుగా ఇచ్చారు. ఇందులో కేవలం ఓ హెడ్‌ కానిస్టెబుల్‌ వాటానే 53 లక్షలు ఉందంటే.. ఏ రేంజ్‌లో అవినీతి ప్రవాహం సాగిందో అర్థం చేసుకోవచ్చు. మరో జిల్లాలో ఎక్సైజ్‌ అధికారుల నుంచి అప్పు తీసుకున్నందుకు ఎక్సైజ్‌ ఇన్స్‌పెక్టర్‌కు 22 లక్షలు, ఓ సబ్‌ ఇన్స్‌పెక్టర్‌ 10 లక్షల వడ్డీని కట్టారని ఆధారాలు దొరికాయి. ఓ జిల్లాకు చెందిన సిండికేట్‌ నాయకుడు మరో జిల్లాకు చెందిన ఇద్దరు ఇన్స్‌పెక్టర్‌లకు ఏడాది కాలంగా 37 లక్షల వడ్డీని చెల్లించినట్లు కీలక పత్రాలు ఏసీబీ చేతికి చిక్కాయి. ఈ ఆధారాలు చూస్తుంటే ఎక్సైజ్ అధికారులే మద్యం సిండికేట్లలో పెట్టుబడులు పెట్టి చీకటి వ్యాపారాన్ని పెంచి పోషిస్తున్నారని అర్థమవుతోంది. ఇప్పటి వరకూ ఎక్సైజ్‌ అధికారులు, 11 మంది మద్యం సిండికేట్ల నాయకులతో పాటు మరో 10 మందిని అరెస్టు చేశారు. ఇప్పటికి చిన్న చేపలే ఏసీబీకి చిక్కాయి.. ఇక పెద్ద చేపలు వలలో పడితే.. ఇంకెన్ని సమ్‌..గతులు బయటకువస్తాయో.. !

చంద్రబాబుపై గాలి మాటలు

2012-01-29T22:57:00.000+05:30

తెలుగుదేశం పార్టీ అధినేత చంద్రబాబు నాయుడు ప్రధానిమంత్రి కావాలని దేశంలోని చాలా ప్రాంతాల్లో ప్రజలు కోరుకుంటున్నారని ఆ పార్టీ సీనియర్‌ నేత గాలి ముద్దుకృష్ణమ నాయుడు అన్నారు. బాబు ప్రధాని అయితే దేశాన్ని అభివృద్ధి చేసేందుకు అవకాశం దొరుకుతుందన్నారు. కాంగ్రెస్‌ పార్టీ జాతీయ స్థాయిలో రోజురోజుకు దిగజారుతోందని వచ్చే ఎన్నికల్లో ఆ పార్టీకి మూడో స్థానం దక్కుతుందన్నారు. మొత్తానికి బాబు ప్రధాని అభ్యర్థి అయితే బాగుంటుందని గాలి చెప్పడంతో.. టీడీపీలో వచ్చే ఎన్నికలకు ఏదో బలమైన స్కెచ్చే వేస్తున్నట్లు అనుమానాలు వ్యక్తమవుతున్నాయి.

మద్యం వ్యాపారులకు మూడింది

2012-01-29T06:21:00.000+05:30

మద్యం సిండికేట్లపై రెండోరోజూ ACB దాడులు కొనసాగాయి. మొదటిసారి జరిపిన దాడుల్లో లభించిన ఆధారాల మేరకు ACB పక్కాగా దాడులు నిర్వహించింది. నెల్లూరు జిల్లాలో భారీగా అరెస్టులు చోటుచేసుకున్నాయి. సింగరాయకొండ ఎక్సైజ్ సీఐ గురవయ్య, సిండికేట్ అధ్యక్షుడు వెంకట్రావు, కోవూరు ఎక్సైజ్ ఎస్సై విజయకుమార్,బుచ్చిరెడ్డిపాళ్యం సిండికేట్ అధ్యక్షుడు శ్రీనివాసులురెడ్డిని ఏసీబీ అధికారులు అరెస్ట్ చేశారు. ప్రకాశం జిల్లాలో మద్యం వ్యాపారి వెంకట్రావు ఇంట్లో సోదాలు నిర్వహించిన అధికారులు తర్వాత అరెస్ట్‌ చేశారు. ఆదాయానికి మించి ఆస్తులున్న ఎక్సైజ్‌ సీఐ గురవయ్యని అదుపులోకి తీసుకున్నారు...ఇక ఉత్తరాంధ్రలో రెండ్రోజుల సోదాల్లో ముగ్గురు ఎక్సైజ్‌ అధికారులు, ఓ హెడ్‌కానిస్టేబుల్‌ సహా 11మందిని అరెస్ట్‌ చేశారు. సోదాల్లో ఎక్సైజ్‌ సిబ్బందితో పాటు మీడియా ప్రతినిధులకు నెలవారి కమిషన్లు అందినట్లు పక్కా ఆధారాలు లభించాయి. వ్యాపారుల అరెస్ట్‌ను వ్యతిరేకిస్తూ మద్యం డీలర్లు ACB కార్యాలయానికి తరలివచ్చారు. ప్రభుత్వం వేధిస్తోందని ఆరోపించారు. వరంగల్‌లో ఎనిమిదిమంది వ్యాపారులతో పాటు ఓ ఎక్సైజ్‌ సీఐని అరెస్ట్‌ చేసిన ACB వారికి MGMలో వైద్య పరీక్షలు నిర్వహించింది. తర్వాత వారిని హైదరాబాద్‌ తరలించింది. ఇంతకాలం దర్జాగా సిండికేట్లతో దోచుకున్న అక్రమార్కులు ఎప్పుడు ACB విరుచుకుపడుతుందా అన్న ఆందోళనతో కాలం గడుపుతున్నారు.

టీడీపి వదిలినా..మేం పార్టీని వదలం..: హరికృష్ణ

2012-01-29T06:14:00.000+05:30

టీడీపీలో ఫ్యామిలీ ఫైట్..హరికృష్ణను వెలివేస్తారా..?సీతయ్య టీడీపీని వీడుతారా..?బాలయ్య రాకతో ఆత్మరక్షణలో ..?టీడీపీలో మళ్లీ చక్రం తిప్పాలని భావిస్తున్న సీతయ్య.. స్పీడ్ పెంచారు. కొన్నాళ్లుగా పార్టీకి అంటీముట్టనట్లుగా ఉన్న ఆయన.. బాలకృష్ణ రాజకీయాల్లోకి వస్తానని ప్రకటించడంతో, మళ్లీ యాక్టివ్ అయ్యారు.. పార్టీ కార్యక్రమాల్లో తరచూ పాల్గొంటున్నారు. అయితే.. రాజకీయాల్లోకి వస్తానంటూ బాలయ్య ప్రకటించడంతోనే హరికృష్ణలో ఇంతమార్పు వచ్చిందన్న వార్తలు టీడీపీ వర్గాల్లో ప్రచారమవుతున్నాయి. దీనికి తోడు.. హరికృష్ణకు, జూనియర్ ఎన్టీఆర్‌కు చెక్ చెప్పడానికే.. చంద్రబాబు బాలయ్యను బరిలోకి దింపారన్న వాదనా ఉంది..హరికృష్ణ కూడా తాజా పరిణామాలతో కలత చెందినట్లే కనిపిస్తోంది. తెలుగుదేశం పార్టీ తమను వదిలిపెట్టుకోవాల్సిందే తప్ప.. తాను,జూనియర్ ఎన్టీఆర్ టీడీపీని వదలిపెట్టే ప్రసక్తే లేదన్నారు. తనలోనూ..తన కొడుకులోనూ ప్రవహించేది ఎన్టీఆర్ రక్తమేనన్నారు. ఎన్టీఆర్ పేరు భూమిమీద వినిపించినంతకాలం, టీడీపీ బతికే ఉంటుందన్నారు. ప్రకాశం జిల్లా కందుకూరుకు వచ్చిన ఆయన ఈ వ్యాఖ్యలు చేశారు. హరికృష్ణ వ్యాఖ్యల్లో మర్మం ఏమిటి..? తనపై కుట్ర జరుగుతోందని హరికృష్ణ భావిస్తున్నారా..? ఇవే అనుమానాలు ఇప్పడు టీడీపీ కార్యకర్తల్లో వ్యక్తమవుతున్నాయి. హరికృష్ణ వ్యాఖ్యలతో టీడీపీలో ఏదో గూడుపుఠాణీ జరుగుతోందన్న విషయం అర్థమవుతోంది. అయితే.. ఇది ఎంతవరకూ దారితీస్తుందన్నదే ఇప్పుడు సస్పెన్స్..

దాసరిపై చిరంజీవి ప్రతీకారం

2012-01-28T18:52:00.000+05:30

దర్శకరత్న దాసరి నారాయణరావుకు, మెగాస్టార్ చిరంజీవికి అసలు పడదన్న సంగతి అందరికీ తెలిసిందే. ఒకే వేదిక మీద ఉన్నప్పుడు చిరును పొగిడే దాసరి .. మరో వేదిక ఎక్కగానే మాత్రం విరుచుకుపడుతుంటారు. అయితే.. దాసరి విమర్శలకు ప్రతీకారం తీర్చుకునే అవకాశం చిరంజీవికి మరోలా చేతికందింది. ప్రజారాజ్యాన్నివిలీనం చేసుకోనున్న కాంగ్రెస్ పార్టీనే ఈ అవకాశాన్ని అందిస్తోంది. రాష్ట్రం నుంచి త్వరలో ఆరు రాజ్యసభ సీట్లు ఖాళీ అవుతున్నాయి. వీటిలో దాసరి సీటు కూడా ఉంది. ఇప్పటికే వరసగా రెండుసార్లు రాజ్యసభ అవకాశాన్ని కాంగ్రెస్ పార్టీ దాసరికి అందించింది. మరోసారి ఇచ్చే అవకాశాలు ఏమాత్రం కనిపించడం లేదు. దాసరి స్థానంలో, చిరంజీవికి అవకాశం కల్పించాలని హైకమాండ్ నిర్ణయించుకున్నట్లు సమాచారం. పీఆర్పీ విలీనం సమయంలో ఇచ్చిన హామీ మేరకే, ఈ అవకాశం ఇస్తున్నారు. మిగిలిన సీట్లలో రాజకీయంగా పోటీ ఉండడంతో, దాసరి స్థానంలో ఆయన సామాజిక వర్గానికి చెందిన చిరంజీవికే ఛాన్స్ దక్కనుంది. ఈ రకంగా దాసరిపై ప్రతీకారం తీర్చుకునే అవకాశం చిరంజీవికి వచ్చింది.

నెల్లూరి నెరజాణకు ఏమయ్యింది?

2012-01-28T18:39:00.002+05:30

నెల్లూరి నెరజాణకు భారతదేశాన్ని ఊపేసిన నేపాలి సుందరి మనీషా కోయిరాల తాజా చిత్రమిది. ఎన్నో బాలీవుడ్ సినిమాల్లో నటించిన మనీషా.. 2010లో వివాహం తర్వాత ఫిల్మ్ ఇండస్ట్రీకి దూరమయ్యింది. అయితే.. ఇటీవలే ముంబైలో ఓ రెస్టారెంట్ ఓపెనింగ్ కు హాజరైన మనీషా.. ఫుల్ గా మందు కొట్టేసింది. ఆ తర్వాత ఇలా ఫొటోలకు చిక్కింది. అందాల తారగా కనిపించిన మనీషా.. ఒక్కసారిగా ఇంత దారుణంగా చూసి చాలా మంది తేరుకోలేకపోయారు. అయితే, కుటుంబ కలహాలతో మనస్తాపం చెందే ఇలా తయారయ్యిందని ఆమె సన్నిహితులు చెబుతున్నారు.

తెలుగువారికి ఈ సారీ అన్యాయమే..!

2012-01-25T15:44:00.002+05:30

ఐదు పద్మవిభూషణ్‌లు, 27 పద్మ భూషణ్‌లు.. 77 పద్మశ్రీలు... వీటన్నింటిలోనూ మన రాష్ట్రానికి దక్కింది కేవలం రెండంటే రెండు పద్మశ్రీలు.. ఒకటి చిత్తూరు జిల్లాకు చెందిన మునిరత్నానికి, మరొకటి బ్యాడ్మింటన్ కోచ్ ఆరిఫ్‌కు దక్కాయి. ఢిల్లీ నుంచి తెలుగువ్యక్తి.. టి.వి.రాజేశ్వర్‌కు పద్మవిభూషణ్, ఎన్‌.ఆర్.ఐ కోటాలో జర్మనీలో ఉంటున్న తెలుగు వ్యక్తి పాటిబండ్ల చంద్రశేఖర్ రావుకు పద్మభూషణ్ పురస్కారం వరించాయి. రాష్ట్రం పంపించిన జాబితాలో సుప్రసిద్ధ దర్శకుడు, చిత్రకారుడు బాపు, భారత బ్యాడ్మింటన్ కే వన్నె తెచ్చిన గుత్తా జ్వాలల పేర్లున్నప్పటికీ, వారికి ప్రభుత్వం పట్టించుకోలేదు. బాపు పేరును కేంద్రం చాలాసార్లు తిరస్కరించింది. మీరానాయర్ కు, షబానా అజ్మీకి పద్మభూషణ్ లు ఇచ్చిన కేంద్రం, బాపూను తిరస్కరించడం దారుణమే..మనవాళ్లపై, తెలుగువాళ్లకు ఢిల్లీ పెద్దలు ఇస్తున్న గౌరవం ఏమిటో దీంతో మరోసారి స్పష్టమయ్యింది.

సచిన్‌కు ఈ సారి భారతరత్న లేనట్లే..!

2012-01-25T12:34:00.000+05:30

సచిన్‌కు, సచిన్ అభిమానులకు నిరాశ కలిగించే వార్తఇది. భారతదేశ అత్యున్నత పురస్కారం, భారతరత్నను సచిన్ కు ఇవ్వాలంటూ చాలాకాలంగా డిమాండ్ దేశంలో ఊపందుకొంది. దీనికి తగ్గట్లే, క్రీడాకారులకు సైతం అవార్డు ఇవ్వొచ్చంటూ ఇటీవలే భారతరత్న నిబంధనల్లో మార్పులు కూడా చేశారు. ఇంకేముంది, ఈ సారి సచిన్ కు అవార్డు ఖాయమని అంతా అనుకున్నారు. కానీ, ఆ ఆశలను కేంద్ర క్రీడా మంత్రిత్వ శాఖ అడియాశలు చేసింది. భారతరత్న అవార్డుకు ఈ సారి సచిన్ పేరును పంపలేదు. అయితే, దేశంలోని ప్రధాన క్రీడాకారులంతా కోరుకుంటున్నట్లు.. హాకీ మాంత్రికుడు ధ్యాన్ చంద్ పేరును మాత్రం అవార్డుకు సిఫార్సు చేసింది. చెప్పాలంటే, ధ్యాన్ చంద్ కు ఈ సారి భారతరత్న అవార్డు దక్కడం ఖాయంగానే కనిపిస్తోంది. దేశ ప్రతిష్టను ప్రపంచవ్యాప్తంగా చాటిచెప్పిన తొలి క్రీడాకారుడు ధ్యాన్ చందే. అలాంటి మహోన్నత వ్యక్తికి ఇవ్వకుండా సచిన్ కు ఇవ్వమని కోరితే, విమర్శలు వస్తాయని భావించిన నేపథ్యంలోనే, ముందుగా ధ్యాన్ చంద్ పేరును సిఫార్సు చేసినట్లు తెలుస్తోంది. దీన్ని బట్టి చూస్తే, భవిష్యత్తులో సచిన్ కు భారతరత్న పురస్కారం అందడం ఖాయంగానే కనిపిస్తోంది.

సునీల్‌రెడ్డి ఎవరు..? జగన్ తో సంబంధం ఏమిటి?

2012-01-24T19:32:00.000+05:30

సునీల్ రెడ్డిది కడప జిల్లా వీరపునాయునిపల్లె మండలం అనిమెల గ్రామం.. నర్రెడ్డి సంగిరెడ్డి రెండో కుమారుడు ఈ సునీల్‌రెడ్డి. 30 సంవత్సరాల క్రితం సంగిరెడ్డి తన కుటుంబంతో సహా పులివెందులకు వచ్చి స్థిరపడ్డాడు. వైఎస్‌ బావ సీవీ సుబ్బారెడ్డికి ... సంగిరెడ్డి బంధువు కావడంతో వైఎస్‌ కుటుంబంతోనూ పరిచయం ఏర్పడింది. అప్పట్లో జియాలజిస్ట్‌గా పనిచేసిన సంగిరెడ్డి... వైఎస్‌ కుటుంబ సభ్యులతో కలిసి పులివెందుల ప్రాంతంలో మైన్స్‌ వ్యాపారాలు చేశాడు.. నష్టాలు రావడంతో సంగిరెడ్డి ఆర్ధికంగా కుంగిపోయాడు. దీంతో సంగిరెడ్డి ఆస్తులను కూడా వైఎస్‌ కుటుంబీకులు తీసుకున్నారని సమాచారం. ఆర్థిక ఇబ్బందుల్లో ఉన్న సంగిరెడ్డి కుటుంబాన్ని YSR చేరదీశారు. సంగిరెడ్డి కుమారుడు సునీల్‌రెడ్డికి జగన్‌ కంపెనీలో ఓ చిరుద్యోగం ఇచ్చారు.. సునీల్‌లో ఉన్న చురుకుదనం, ఉత్సాహం గమనించిన జగన్‌.. సునీల్‌రెడ్డిని తన ఆంతరంగికుడిగా, వ్యక్తిగత సహాయకుడిగా నియమించుకున్నారు. అధికారికంగా పీఏ కాకపోయినా, అన్ని వ్యవహారాలను సునీల్ రెడ్డే నిర్వహించేవాడు. అతి తక్కువ కాలంలోనే జగన్‌ ఆర్థిక, వ్యక్తిగత కార్యకలాపాల్లో సునీల్‌ ప్రముఖ పాత్ర పోషించే స్థాయికి ఎదిగాడు. సునీల్ రెడ్డికి కమలాపురం ఎమ్మెల్యే వీరశివారెడ్డితోనూ బంధుత్వం ఉంది. ఆయన సోదరుడి కుమార్తె కృష్ణతేజతో సునీల్ రెడ్డికి వివాహమ్యయింది. ఇప్పుడు సునీల్ రెడ్డిని సీబీఐ ప్రశ్నిస్తుండడంతో జగన్ కేసుపై మరింత ఉత్కంఠ పెరిగింది.

జగన్ చుట్టూ బిగుసుకుంటున్న ఉచ్చు

2012-01-24T19:10:00.000+05:30

వైఎస్సార్ పార్టీ అధ్యక్షుడు, కడప ఎంపీ జగన్ చుట్టూ సీబీఐ ఉచ్చు బిగిస్తోంది. ఇప్పటికే విజయసాయి అరెస్ట్ తో జగన్కు కంటిమీద కునుకు లేకుండా చేసిన సీబీఐ అధికారులు, తాజాగా జగన్ సన్నిహితుడు, ఆయన భార్య భారతి బంధువు సునీల్ రెడ్డిని అదుపులోకి తీసుకుంది. ఇవాళ ఉదయం గోపన్ పల్లిలోని సునీల్ రెడ్డి ఇంటికి వెళ్లిన సీబీఐ అధికారులు, ఆయన్ను తమతో పాటు కార్యాలయానికి తీసుకెళ్లి, చాలా సేపు ప్రశ్నించారు. అనంతరం మళ్లీ ఆయన్ను తమ వాహనంలోనే ఇంటికి తీసుకువెళ్లి, అక్కడ సోదాలు చేశారు. సునీల్ రెడ్డి నివాసం నుంచి కీలక వివరాలను ల్యాప్ టాప్ ను స్వాధీనం చేసుకున్నారు. జగన్ ఆస్తుల గురించి, అక్రమ పెట్టుబడుల గురించి చాలా వివరాలు సునీల్ రెడ్డికి తెలుసని సీబీఐ భావిస్తోంది. జగన్ వెన్నంటి ఉండే సునీల్ రెడ్డి కూడా, ఈ అక్రమాల్లో పాలుపంచుకున్నాడని అనుమానిస్తోంది. సునీల్ రెడ్డి అరెస్ట్ను ఇంకా ధృవీకరించకపోయినా, త్వరలోనే సీబీఐ జేడీ ఆ ప్రకటనా చేసే అవకాశం కనిపిస్తోంది. ఓ రకంగా జగన్ చుట్టూ ఉన్న అన్ని మార్గాలను మూసివేసి, అక్రమాలకు సంబంధించి పక్కా ఆధారాలు సంపాదించి ఆ తర్వాతే జగన్ పై దృష్టి పెట్టాలని సీబీఐ భావిస్తున్నట్లు తెలుస్తోంది. ఈ నేపథ్యంలోనే ఈ కేసులో A1 గా ఉన్న జగన్ ను వదిలి, ఒక్కొక్కరిపైనా పంజా విసురుతోంది. అయితే, జగన్ చుట్టూ ఉన్న వారిని అరెస్ట్ చేసి, ఆయన్ను ఆత్మరక్షణ నెట్టడానికి అధికారపార్టీ ప్రయత్నిస్తోందన్న ఆరోపణలూ లేకపోలేవు. వచ్చే ఎన్నికల్లో కాంగ్రెస్కు అతి పెద్ద ప్రమాదంగా భావిస్తున్న జగన్ ను, సీబీఐతోనే చెక్ చెప్పి, తమకు లొంగి ఉండేలా చేసుకోవడానికే, ఈ తరహా దర్యాప్తును తెరపైకి తెచ్చిందన్న విమర్శలూ వినిపిస్తున్నాయి.

పనీ పాటా లేనివాళ్లకే మనోభావాలా...?

2012-01-23T19:21:00.000+05:30

ఉయ్ లైక్ బ్యాడ్ బాయ్స్... అంటూ బిజినెస్ మేన్ లో పెట్టిన పాట ఇప్పటికే వివాదాస్పదమైన సంగతి అందరికీ తెలిసింది. రాముడిని కించపరిచారని, పాటను సినిమా నుంచి తొలగించాలంటూ విశ్వహిందూ పరిషత్ కొన్ని రోజులుగా ఆందోళన చేస్తూనే ఉంది. కొంతమంది సికింద్రాబాద్ మహంకాళి పోలీస్ స్టేషన్లో దీనిపైనే ఇవాళ ఫిర్యాదు కూడా చేశారు. దీనిపై స్పందన కోరినప్పుడు బిజినెస్ మేన్ డైరెక్టర్ పూరి జగన్నాథ్ చేసిన వ్యాఖ్యలు ఈ వివాదానికి మరింత ఆజ్యం పోశాయి. పనీపాటా లేనివాళ్లకే మనోభావాలుంటాయంటూ, కేసులు పెట్టడంపై ఘాటుగా స్పందించారు పూరీ. పాటపెట్టడమే పెద్ద తప్పైతే, అవమానించి, మరో తప్పు చేశారంటూ మండిపడుతున్నారు హిందుత్వ సంస్థల నేతలు.

వాడు.. వీడు..అనే తెలుగు రాజకీయ సినిమా

2012-01-23T19:04:00.002+05:30

వాడు.. వీడు.. ఇది తమిళ డైరెక్టర్ బాల సినిమా కాదు.. తెలుగు రాజకీయ తెరపై ఆడుతున్న టాలీవుడ్ సూపర్ హీరోల సినిమా. అవును.. ఇందులో హీరోలు.. ఒకరు బాలకృష్ణ అయితే.. మరొకరు చిరంజీవి. రాజకీయాల్లోకి వస్తున్నానంటూ ప్రకటించిందే తడువుగా.. చిరంజీవిని లక్ష్యం చేసుకుని విమర్శలు గుప్పిస్తున్నారు నందమూరి హీరో. చిరంజీవికి తేరుకునే సమయం కూడా ఇవ్వకుండా వరసగా విమర్శల బాణాలను గుప్పిస్తున్నారు. కృష్ణా జిల్లా తొలిపర్యటనలో.. సామాజిక న్యాయాన్ని రాజకీయ అవసరానికి కొంతమంది వాడుకున్నారని, అదే తన తండ్రి ఎన్టీఆర్, ఆ పేరు చెప్పకుండానే బడుగుబలహీన వర్గాలకు అన్నీ చేశారని చిరంజీవి ఎద్దేవా చేస్తూ ప్రకటించారు. దీనిపై స్పందించిన చిరంజీవి.. బాలయ్యది పసిపిల్లాడి మనసని, ఆ వ్యాఖ్యలకు సమాధానం చెప్పాల్సిన అవసరం లేదని తీసిపడేశారు. అక్కడితో గొడవ అయిపోయిందంటే.. ఇవాళ(సోమవారం) విశాఖ పర్యటనలో మరోసారి బాలయ్య రెచ్చిపోయారు.."వాడెవడో.. నన్ను బాలుడన్నాడు... వాడు ఒకవైపే చూశాడు.. రెండోవైపు బాలకృష్ణ ఉన్నాడన్న సంగతి తెలియదంటూ.. "ఏకవచనంతో చిరంజీవికి ఏకిపారేశారు. దీన్ని బట్టి చూస్తే.. చిరంజీవితో తాడోపేడో తేల్చుకోవాలనే బాలయ్య డిసైడైనట్లు కనిపిస్తోంది. టాలీవుడ్లో ఇద్దరిదీ సమాన స్థాయే అయినా.. విజయాల పరంగా మెగాస్టార్ ఓ మెట్టు ముందే ఉన్నారు. మరి, రాజకీయాల్లోనైనా బాలయ్య నెగ్గుతారో లేదో చూడాలి..

ఉత్తరాంధ్రపై బాలయ్య కన్ను

2012-01-22T11:45:00.001+05:30

కృష్ణాజిల్లాలో రాజకీయ పర్యటనతో రాష్ట్ర వ్యాప్తంగా కలకలం పుట్టించిన నందమూరి బాలకృష్ణ, ఉత్తరాంధ్రపై కన్నేశారు. తండ్రి స్థాపించిన పార్టీకి తిరిగి పునర్వైభవం తీసుకురావడానికి కకణం కట్టుకున్న బాలయ్య.. ఉత్తరాంధ్రలో పార్టీని పటిష్టం చేసే పనిలో పడ్డారు. ఇందులో భాగంగా ఆది,సోమవారాల్లో విశాఖ జిల్లాలో పర్యటిస్తున్నారు. పాడేరులో ఎన్టీఆర్ విగ్రహావిష్కరణ, బహిరంగ సభల్లో పాల్గొంటారు. వచ్చే ఎన్నికల్లో పోటీ చేస్తానంటున్న బాలయ్య.. ఏదో ఓ ప్రాంతానికి పరిమితం కాకుండా.. రాష్ట్ర స్థాయి నేతగా ఎదగడానికే ఈ పర్యటనలు చేస్తున్నట్లు టీడీపీ వర్గాలు అభిప్రాయపడుతున్నాయి.

ఎర్ర ప్లేట్ లో తింటే బరువు తగ్గుతారా..!

2012-01-20T16:52:00.000+05:30

రెడ్ ప్లేట్లో భోజనం ఓవర్ వెయిట్ కు రెడ్ సిగ్నల్ అంటున్నారు జర్మన్, స్విస్ పరిశోధకులు. ఇతర రంగుల పళ్లాలు, కప్పులతో పోల్చితే, ఎర్రటి రంగున్న పళ్లాలు, కప్పుల్లో భోజనం చేసినప్పుడు చాలా తక్కువగా తినడమే దీనికి కారణమట. ఎరుపు ప్రమాదానికి చిహ్నమని, ఆ రంగే చాలా తక్కువగా తినడానికి కారణమవుతుందని పరిశోధకులు చెబుతున్నారు. కొంతమంది మగాళ్లపై పరిశోధన చేసి మరీ దీన్ని రుజువు చేసుకున్నారట. నీలం, ఎరుపు రంగు కప్పుల్లో టీ ఇచ్చిన తాగమన్నప్పుడు.. నీలం కప్పులో టీతో పోల్చితే.. ఎర్ర కప్పులో 44 శాతం తక్కువగా టీ తాగారట. దీన్ని బట్టి బరువు తగ్గాలనుకుని, నోరు కట్టేసుకోలేని వారు ఎరుపురంగు ప్లేట్లో తింటే సరని చెబుతున్నారు. ప్రభుత్వం కూడా బార్లు, పబ్ లు ఎరుపు రంగులో ఉండేలా చూడడంతో పాటు, మద్యం, సిగరెట్లు, అనారోగ్యకరమైన ఆహార పదార్థాల ప్యాకెట్లు, ఎరుపు రంగులో ఉండేలా చర్యలు తీసుకోవాలని జర్మన్, స్విస్ పరిశోధకులు కోరుతున్నారు.

సచిన్ డ్యాన్స్ ఎలా ఉంటుంది?

2012-01-20T16:29:00.002+05:30

భారత క్రికెట్ ప్రపంచానికి ఆరాధ్య దైవం సచిన్ టెండుల్కర్.. సరదా సమయంలో ఎలా ఉంటాడో తెలిపే చిత్రమిది. క్రికెట్ గ్రౌండ్లో ఎప్పుడూ కూల్ అండ్ కామ్ గా ఉండే సచిన్, ఛాన్స్ వస్తే మాత్రం ఇలా స్టెప్పులతో ఇరగదీస్తానంటున్నాడు. ఎంత ఎత్తుకు ఎదిగినా.. అతనూ మనలాంటి వాడేగా..

కిస్ కిక్: కత్రీనా లక్కీనా.. షారుక్ లక్కీనా.?

2012-01-18T19:33:00.000+05:30

బాలీవుడ్ సెక్సీబాంబ్.. చిక్నీ చమేలీ.. కత్రీనా కైఫ్ కు ఘాటు ముద్దిచ్చాడు కింగ్ ఖాన్ షారుక్. కత్రీనా ప్రేమ కోసం ఏళ్ల తరబడి సల్మాన్ ఎదురు చూస్తూనే ఉండగా, అందరిముందూ.. కత్రీనా బుగ్గమీద ముద్దు పెట్టాడు షారుక్. కలర్స్ టెలివిజన్ ఇటీవలే నిర్వహించిన స్క్రీన్ అవార్డ్స్లో ఈ ఘటన చోటు చేసుకుంది. కత్తిలాంటి కత్రీనాను చూడగానే ... బహుశా షారుక్ కంట్రోల్ తప్పి ఉంటాడు. షారుక్ కిస్ తో ఒక్కసారిగా షాక్ కు గురయ్యింది కత్రీనా. చాలాసేపు తేరుకోలేకపోయింది. ఇక షారుక్ కు ఇంటికెళ్లాక.. గౌరీఖాన్ తలెంటేసి ఉంటుంది.

అన్నట్లు.. అసలే విరోధి.. పైగా ఘాటు లవర్.. కత్రీనాకు కిస్ ఇస్తున్న షారుక్ ను చూస్తే.. సల్మాన్కు ఎలాంటి ఫీలింగ్ కలిగి ఉంటుంది.. అదృష్టం బాగుండి.. ఆ కండలవీరుడు.. ఈ ఈవెంట్లో పార్టిసిపేట్ చేయలేదు.. కాబట్టి షారుక్ బతికిపోయిఉంటాడు.. లేదంటే, పబ్లిక్ గానే డిష్యూం..డిష్యూం.. అయిపోయేది.. ఇంతకీ షారుక్ కిస్ దక్కించుకున్న కత్రీనా.. లక్కీనా.. సైలెంట్ గా కలల సుందరికి ముద్దిచ్చేసిన షారుక్ లక్కీనా..?

మంత్రి కన్నా కొడుకు అరెస్ట్

2012-01-18T10:56:00.000+05:30

విదేశాల నుంచి అక్రమంగా వస్తువులను తెచ్చిన కేసులో మంత్రి కన్నా కొడుకు ఫణీంద్ర అరెస్ట్ అయ్యాడు. కన్నా కుమారుడితో పాటు, రంగారెడ్డి జిల్లా శేరిలింగంపల్లి ఎమ్మెల్యే భిక్షపతి యాదవ్ కుమారుడని కూడా డైరెక్టరేట్ ఆఫ్ రెవన్యూ ఇంటెలిజెన్స్ అధికారులు శంషాబాద్ ఎయిర్ పోర్టులో అదుపులోకి తీసుకున్నారు. లండన్ నుంచి దుబాయ్ మీదుగా వీరు హైదరాబాద్ వచ్చారు. వీరితో పాటు విలువైన మద్యం, ఎలక్ట్రానిక్ వాచీలు తీసుకొచ్చారు. వీటికి కస్టమ్స్ సుంకాన్ని చెల్లించకుండానే తరలిస్తున్నారు. తనిఖీల్లో ఈ విషయం బయటపడడంతో పాటు మొత్తం నలుగురిని అరెస్ట్ చేశారు.

మాయాబజార్ షూటింగ్లో మహానుభావులు

2012-01-17T23:50:00.000+05:30

మాయాబజార్ షూటింగ్ కు సంబంధించిన అరుదైన ఫోటోల్లో ఇదీ ఒకటి. శ్రీకృష్ణుడు ఇచ్చిన ప్రియదర్శినిలో అభిమన్యుడిని శశిరేఖ చూసే సన్నివేశం ఇది. సినిమా దర్శకుడు కె.వి.రెడ్డిని, కెమెరా మాంత్రికుడు మార్కస్ బాంట్లేను కూడా చిత్రంలో చూడొచ్చు.

కేవీపీ నిజం చెప్పారా..?

2012-01-16T23:36:00.000+05:30

ఎమార్ కేసులో సీబీఐ ముందడుగు వేసింది. ఈ కేసులో కీలకమైన వ్యక్తిగా భావిస్తున్న కేవీపీ రామచంద్రరావును అధికారులు మూడుగంటల పాటు ప్రశ్నించారు. వైఎస్ హయాంలో APIICకు వాటాలు తగ్గడంలో కేవీపీ కీలకపాత్ర పోషించి ఉంటారని సీబీఐ అనుమానిస్తోంది. ఎమార్ కేసులో వచ్చే నెలలో ఛార్జిషీట్ దాఖలు చేయనున్న నేపథ్యంలో, కీలక వివరాలను తెలుసుకోవడానికి.. కేవీపీని అధికారులు ప్రశ్నించారు. APIIC వాటా తగ్గడంపైనా, విల్లాల కేటాయింపుపైనా.. కేవీపీపై ప్రశ్నలవర్షం కురిపించారు సీబీఐ అధికారులు. ఎమార్ కుంభకోణం జరిగిన సమయంలో APIIC డైరెక్టర్‌గా ఉన్న పార్థసారధి.. కేవీపీ బంధువు కావడంతో.. కథంతా ఆయనే నడిపించారని సీబీఐ భావిస్తోంది. దీనికి తోడు ఈ కేసులో A1 నిందితుడిగా ఉన్న బీపీ ఆచార్యతో ఉన్న సంబంధాలపైనా అధికారులు ఆరా తీశారు. ప్రభుత్వ సలహాదారుగా ఉన్న సమయంలోనే ఎమార్‌లో విల్లాల కేటాయింపు జరిగింది. కేవీపీ భార్య సునీత పేరుతో, వియ్యంకుడు రఘురామరాజు, అతని స్నేహితులకు 16 విల్లాలు కేటాయించడంలో కేవీపీ ప్రధాన పాత్ర పోషించినట్లు తెలుస్తోంది. దీనిపైనా సీబీఐ ప్రశ్నించి, వివరాలను నమోదు చేసుకుంది. కేవీపీ మాత్రం తనను సాక్షిగానే పిలిచారని, తనదగ్గరున్న సమాచారాన్ని అందించానని మీడియాకు తెలిపారు. ఎమార్ ప్రాపర్టీస్ కేసులో కేవీపీ రామచంద్రరావు ఇచ్చిన సమాచారమే.. సిబిఐ దర్యాప్తులో కీలకం కానుంది. ఆయన ఇచ్చిన సమాచారం మేరకు, బీపీ ఆచార్య, పార్ధసారధిల అరెస్టుకు సీబీఐ సిద్ధమవుతున్నట్లు తెలుస్తోంది. జగన్ కేసులో అరెస్టుల ప్రకియ మొదలైనట్లే, ఎమార్ లోనూ అరెస్టులు త్వరలోనే ప్రారంభం అయ్యే సూచనలు కనిపిస్తున్నాయి.

కొరియర్లో తల్లిపాలు

2012-01-16T23:27:00.000+05:30

నవమాసాలు మోసి కన్న బిడ్డ ఇంట్లో ఉంటుంది. ఆ బిడ్డకు ఆకలేసిన సమయంలో పాలు ఇవ్వలేని స్థితిలో తల్లి ఉంటుంది. ఎందుకంటే ఆమె వర్కింగ్‌ వుమెన్‌ కాబట్టి. వరల్డ్‌వైడ్‌గా ఆఫీస్‌, ఫ్యాక్టరీ, కంపెనీల్లో పనిచేస్తున్న తల్లులు ఎదుర్కొనే సమస్యే ఇది. మరి దీనికి పరిష్కారం లేదా..? కొరియర్‌లో తల్లిపాలు...కాన్సెప్ట్‌ కొత్తగా ఉంది కదూ... ఫిలిప్పీన్స్‌లో వర్కింగ్‌ వుమెన్ ఇప్పుడీ పద్దతినే అవలంభిస్తున్నారు. శిశువు ఆకలి అలమటిస్తున్న వేళ...తల్లి పాలే అందిస్తే. అంతకన్నా కావాల్సింది ఇంకేముంది. ఓ ఇండోనేషియన్ ఆలోచన ఎంతోమంది నవజాతశిశువుల ఆకలిని తీర్చడమే కాదు, ఆరోగ్యాన్ని కాపాడుతోంది. ఎంతోమంది తల్లులకు, తమ పిల్లలకు తమ పాలే ఇవ్వగలుగుతున్నామన్న తృప్తినీ కలిగిస్తోంది. ఇటీవలే రాజధాని జకార్తాలో సర్వీస్‌ను ప్రారంభించిన బ్రెస్ట్‌ మిల్క్‌ కొరియర్‌... తల్లికి, బిడ్డకు మధ్య వారధిగా పనిచేస్తోంది. బ్రెస్ట్‌ మిల్క్‌ కొరియర్‌ ప్రారంభానికి వెనుక ఓ సదుద్దేశం ఉంది. పోషక విలువలున్న తల్లి పాలు లభించకపోతే శిశువుల్లో ఎన్నో ఆరోగ్య సమస్యలు తలెత్తుతాయి. 2007లో ఇండోనేషియాలో 38 శాతం పిల్లలు.. తల్లిపాలకు దూరమయ్యారు. దీనిపై తీవ్రంగా ఆలోచించిన...40 ఏళ్ల ఫిక్రీ నౌవల్‌ అనే ఈ వ్యక్తి...బ్రెస్ట్‌ మిల్క్‌ కొరియర్‌ను ప్రారంభించాడు. భవిష్యత్తు తరం ఆరోగ్యంగా ఉండాలన్నది ఇతని లక్ష్యం. అందుకోసం వివిధ రూట్లను సెర్చ్‌ చేస్తూ... తల్లి ఇచ్చే పాలను తీసుకెళ్లి బిడ్డకు అందేలా చేస్తున్నాడు.. కాంపిటీషన్ వరల్డ్‌లో వర్కింగ్ వుమెన్‌ సంఖ్య రోజురోజుకీ పెరిగిపోతుంది. ఫిలిప్పీన్స్‌లో అయితే.. నవమాసాలు మోసి కన్న బిడ్డలను కనీసం.. మూడు నెలలన్నా అల్లారుముద్దుగా చూసుకోలేని పరిస్థితి. సమయానికి తల్లిపాలందించడానికి కొరియర్స్ సిద్ధంగా ఉండడంతో.. తల్లులకు ఇప్పుడు టెన్షన్ తీరిపోయింది. 45 నిమిషాల నుంచి గంట మధ్యలో డెలివరీ చేసే బ్రెస్ట్‌ మిల్క్‌ కోసం...కొరియర్స్ సంస్థ..మన కరెన్సీలో...దాదాపు..175 రూపాయల నుంచి...225 రూపాయలు ఛార్జ్ చేస్తోంది. అమ్మో ఇంత ధరా అనుకోకండి. కన్నబిడ్డ ఆరోగ్యంతో పోల్చితే.. ఈ మొత్తం చాలా తక్కువేకదా..Click Here For English Version

మిస్టర్ పర్‌ఫెక్ట్‌లు ఉన్నారా..?

2012-01-16T18:38:00.000+05:30

మిస్టర్‌ పర్‌ఫెక్ట్ ఎవరు..?హీరో ప్రభాస్‌లా ఉంటే మిస్టర్ పర్‌ఫెక్ట్ అయిపోతారా..?అమ్మాయిలను పడేయాలంటే మిస్టర్ పర్‌ఫెక్ట్ అనిపించుకోవాల్సిందేనా...?అసలు, ప్రపంచంలో మిస్టర్ పర్‌ఫెక్ట్‌లు ఉన్నారా..?స్మార్ట్‌గా.. సిక్స్‌ప్యాక్‌తో ఉంటే.. పర్‌ఫెక్ట్‌గా ఉన్నట్లేనన్నది చాలామందికున్న కామన్ ఒపీనియన్. అమ్మాయిలు కూడా ఇలాంటి వారితో 100 పర్సెట్‌ లవ్‌కు సిద్ధమవుతారన్న అభిప్రాయమూ ఉంది. కానీ.. ఇదంతా రాంగ్ అంటోంది ఓ సర్వే. మిస్టర్‌ పర్‌ఫెక్ట్‌ అనే మనిషే లేడంటున్నారు మన ఆడవాళ్లు. ఎంత మంచోడిని చూపించినా.. ఏదో ఓ లోపాన్ని ఎత్తి చూపిస్తున్నారు. ముఖ్యంగా కండలు పెంచేవారు అసలు... పర్‌ఫెక్టే కాదని తేల్చేస్తున్నారు. మంచి పర్సనాలిటీతో పాటు.. సెన్సాఫ్ హ్యూమర్ కూడా ఉండాలని, వాటితో పాటు మరో 20 లక్షణాలు ఉంటేనే మిస్టర్ ఫర్‌ఫెక్ట్ అవతారని చెబుతున్నారు. ఈ 20 లక్షణాల్లో, తల్లిచెప్పినట్లు వినకపోవడం, భార్య స్నేహితులను గౌరవించడం, టాయిలెట్‌ను శుభ్రంగా ఉంచడం, వేగంగా బండి నడపకపోవడం, కుక్కలంటే ఇష్టపడడం, ఇంటిపనిలో సాయపడడం, గోళ్లు ఎప్పటికప్పుడు తీసుకోవడం.. వంటి చిన్న చిన్న విషయాలు చాలానే ఉన్నాయి.. వీటన్నింటిలోనూ పాస్ అయినవారే మిస్టర్ ఫర్‌ఫెక్ట్ అంటున్నారు. రెమింగ్‌టన్ అనే సంస్థ చేసిన అధ్యయనంలో.. అసలు మిస్టర్ ఫర్‌ఫెక్ట్ తమకింతవరకూ తారసపడలేదని మహిళలు చెప్పారట.. సో..అబ్బాయిలూ.. మిస్టర్ పర్‌ఫెక్ట్ అని మీకు మీరు మురిసిపోవడం కాదు.. ఒక్క అమ్మాయితోనైనా అలా అనిపించుకోండి.. చూద్దాం..

భువనేశ్వర్ రైల్వే స్టేషన్లో బ్లూ ఫిల్మ్..

2012-01-14T20:49:00.000+05:30

ఒరిస్సా రాజధాని భువనేశ్వర్ రైల్వే స్టేషన్లో దారుణమైన ఘటన చోటుచేసకుంది. రైల్వే టైమింగ్స్, న్యూస్ ఇతర కార్యక్రమాలు ప్రసారం కావాల్సిన స్టేషన్ టీవీల్లో పది నిమిషాల పాటు అసభ్యకరమైన సన్నివేశాలు (బ్లూ ఫిల్మ్ క్లిప్పింగ్స్) ప్రసారమయ్యాయి. ప్లాట్ ఫామ్స్, వెయింటింగ్ రూమ్స్, రిజర్వేషన్ కౌంటర్లలో ఉన్న మొత్తం 24 టీవీ సెట్లలో ఈ దృశ్యాలు ప్రసారం అయ్యాయి. టెలివిజన్ ఆపరేటర్ అశుతోష్ ఈ పనికి పాల్పడినట్లు గుర్తించిన పోలీసులు వెంటనే ప్రసారాలు ఆపించి, అతన్ని అరెస్ట్ చేశారు. భువనేశ్వర్ స్టేషన్లో నాలుగు నెలల క్రితమే టెలివిజన్ ప్రసారాలను ఔట్ సోర్సింగ్ కు ఇచ్చారు. మొబైల్లో ఉన్న క్లిప్పులను రైల్వే సర్వర్లోకి ఎక్కించిన అశుతోష్ వాటిని టెలికాస్ట్ చేశాడు. Click Here For English Version

నల్లధనం గురించి మాట్లాడాడు.. నల్ల ఇంకు పోయించుకున్నాడు..

2012-01-14T20:23:00.002+05:30

ఇది బాబా రాందేవ్ కు ఢిల్లీలో ఎదురైన పరిస్థితి. దేశ రాజధానిలోని కాన్స్టిట్యూషనల్ క్లబ్లో నల్లధనం గురించి ఇవాళ(శనివారం మధ్యాహ్నం ఒంటి గంట సమయంలో) రాందేవ్ బాబా మీడియా సమావేశాన్ని నిర్వహించారు. విదేశాల్లో మూలుగుతున్న నల్లధనాన్ని దేశంలోకి తెచ్చి, అభివృద్ధికి వాడాలని మరోసారి డిమాండ్ చేశారు. సమావేశం ముగియగానే, ఆయన్ను ఫోటోగ్రాఫర్లు చుట్టుముట్టారు.

వారు ఫోటోలు తీసుకుంటుండగానే, ఓ వ్యక్తి బాబా రాందేవ్ మొహంపై పడేటట్లు నల్ల ఇంక్ పోశాడు. ఒక్కసారిగా జరిగిన ఈ దాడితో రాందేవ్ అవాక్కయ్యారు. వెంటనే స్పందించిన ఆయన అనుచరులు, ఇంక్ పోసిన వ్యక్తిని చితకబాదారు. ఆయన నోట్లోంచి రక్తం వచ్చేలా కొట్టారు. నల్లధనంపై మాట్లాడినందుకు.. నల్ల ఇంకు బహుమతి ఇచ్చారంటూ బాబా ఆవేదన వ్యక్తం చేశారు. ఇక, దాడి చేసిన వ్యక్తిని కమ్రాన్ సిద్దిఖీగా గుర్తించారు. బాట్లా ఎన్ కౌంటర్ పై ఇటీవల బాబా రాందేవ్ చేసిన కామెంట్కు నిరసనగా, ఈ దాడి చేశానని అతను చెబుతున్నాడు.Click Here for English Version

పాక్ అధ్యక్షుడు పారిపోయాడా..?

2012-01-12T22:11:00.000+05:30

పాకిస్తాన్లో మరో ప్రజాస్వామ్య ప్రభుత్వం పతనం అంచున నిలిచింది. అక్కడి ప్రభుత్వానికి, సైనానికి మధ్య సంక్షోభం ముదిరి పాకానపడింది. ప్రజాస్వామ్య ప్రభుత్వాన్ని పడగొట్టి అధికారం చేజిక్కించుకోవడానికి ఆర్మీ కుట్రపన్నుతోందని చాలాకాలంగా ఆరోపిస్తున్న ప్రధాని యూసఫ్ రాజా గిలానీ, ఇటీవలే డిఫెన్స్ సెక్రటరీపై వేటు వేశారు. పాక్ సైన్యాధ్యక్షుడు జనరల్ కియానీతో ఆయనకు సన్నిహిత సంబంధాలు ఉండడంతోనే ఈ వేటు పడిందన్న అనుమానాలు వ్యక్తమయ్యాయి. ఈ వ్యవహారంతో మరింత ఆగ్రహం చెందిన సైన్యాధ్యక్షుడు, తిరుగుబాటుకు సిద్ధమైనట్లు వదంతులు వ్యాపించాయి. ముందుగా ఎన్నికలకు వెళ్లడమా లేక, పాక్ సైన్యానికి అధికారం అప్పగించడమా అన్న సందిగ్ధస్థితిలో గిలానీ సర్కార్ కొట్టుమిట్టాడుతోంది. ముందుగా ఎన్నికలకు వెళ్లాలంటూ మాజీ ప్రధాని నవాజ్ షరీఫ్ డిమాండ్ చేస్తున్నారు. మరోవైపు మాజీ క్రికెటర్ ఇమ్రాన్ ఖాన్ దేశంలో అవినీతికి వ్యతిరేకంగా పోరాటం మొదలుపెట్టారు. దేశంలో ఇంత అలజడి నెలకొన్న తరుణంలో పరిస్థితులను చక్కదిద్ది, పాలనను గాడిలో పెట్టాల్సిన దేశాధ్యక్షుడు జర్ధారీ చక్కగా దుబాయ్ చెక్కేశారు. అకస్మాత్తుగా ఆయన వెళ్లడంపై భారీగానే ఊహాగానాలు వెల్లువెత్తుతున్నాయి. సైన్యం ఇచ్చిన అల్టిమేటంతోనే ప్రవాసంలోకి వెళ్లిపోయాడని కొంతమంది భావిస్తుండగా, పెళ్లికి హాజరు కావడానికి వెళ్లాడని మరికొందరు, చికిత్సకోసం వెళ్లాడని ఇంకొందరు అభిప్రాయపడుతున్నారు. ఏదేమైనా, జర్దారీ దేశం దాటడంతో సర్కార్కు కష్టకాలం వచ్చినట్లే కనిపిస్తోంది.

టెస్ట్ క్రికెట్ కు ధోనీ బైబై..

2012-01-12T22:02:00.000+05:30

భారత్ క్రికెట్ ప్రపంచానికి వరస విజయాల రుచి చూపించిన సూపర్ కెప్టెన్ ధోనీ టెస్ట్ క్రికెట్ కు గుడ్ బై చెప్పనున్నాడు. వచ్చే ఏడాదితో టెస్ట్ కెరీర్ ను ముగించాలని నిర్ణయించుకున్నాడు. 2015 వన్డే ప్రపంచ కప్ లో ఆడడానికి వీలుగా ఉండడం కోసమే ఈ నిర్ణయం తీసుకుంటున్నాడు. త్వరలోనో ఓ ఫార్మాట్ నుంచి తప్పుకుంటానని నేరుగా మహీనే ప్రకటించడంతో.. యావత్ క్రికెట్ ప్రపంచం షాక్ అయ్యింది. దేశం తరపున 66 టెస్టు మ్యాచ్ లు ఆడిన ధోనీ 36 మ్యాచ్ ల్లో కెప్టెన్ గా వ్యవహరించాడు. కెప్టెన్ గా 17 టెస్టుల్లో విజయాన్ని అందించాడు. మోస్ట్ సక్సెస్ ఫుల్ కెప్టెన్ గా , బ్యాట్స్ మెన్, కీపర్ గా పేరు గాంచిన ధోనీ ఇంత తక్కువ సమయంలోనే టెస్ట్ క్రికెట్ నుంచి రిటైర్ అవ్వాలనుకోవడం.. చాలామంది అభిమానులకు నిరాశనే కలిగిస్తోంది.

ఫ్రీ హోం డెలీవరీ అంటే ఇదే కాబోలు

2012-01-12T12:30:00.000+05:30

ఈ ఫోటో చూడండి.. డైరెక్ట్ టు హోం సర్వీస్.. ఫ్రీ హోం డెలివరీ అంటే ఇదే అనిపించడం లేదూ..

360 గంటల్లో 30 అంతస్తుల మేడ

2012-01-11T18:24:00.001+05:30

ఇండిపెండెంట్ ఇల్లు కట్టాలంటే.. కనీసం ఆర్నెళ్లు.. అదే రెండంతస్తుల మేడ కట్టాలంటే ఎంత లేదన్నా ఏడాది. అలాంటిది.. 30 అంతస్తుల మహా మేడ కట్టాలంటే.. మన దగ్గర మినిమం ఐదారేళ్లు పడుతుంది. కానీ, చైనాలో మాత్రం దీనికి పట్టిన సమయం.. కేవలం 360 గంటలు... మరోలా చెప్పాలంటే 15 రోజులు... నిజం.. ఊహకు అందని రీతిలో, రికార్డ్ స్థాయి టైమ్ లో చేసి చూపించారు చైనా చిచ్చరపిడుగులు. ఇదోదో సరదా కోసం కట్టింది కాదు. పక్కా ప్లానింగ్ తో, పర్ ఫెక్ట్ డిజైన్ తో రూపొందించారు. 9 మాగ్నిట్యూడ్ భూకంపం వచ్చినా, ఈ బిల్డింగ్ చెక్కుచెదరదని ఇంజనీర్లు భరోసా ఇస్తున్నారు. ది ఆర్క్ అనే హోటల్ కోసం దీన్ని నిర్మించారు. ప్రపంచం మొత్తాన్ని ఆకర్షిస్తున్న ఈ మల్టీస్టోర్‌డ్‌ బిల్డింగ్‌ను బ్రాడ్‌ గ్రూప్‌ అనే సంస్థ నిర్మించింది. హునాన్‌ ప్రావిన్స్‌లో డాంగ్‌టింగ్‌ సరస్సు పక్కన ఈ హోటల్ ఉంది. పిల్లర్లు, ఇతరత్రా కాంక్రీట్ షీట్లను ముందుగానే తయారు చేసుకుని వాటిని ఒక్కచోట చేర్చి ఈ రాజభవనాన్ని 360 గంటల్లో కట్టిపడేశారు. చైనా ఇంజనీరింగ్ శక్తిసామర్థ్యాలను ప్రపంచానికి చాటి చెప్పారు.. దీన్ని చూశాకా అయినా.. మనం చైనా ది గ్రేట్ అనక తప్పదు. మీకేమైనా అనుమానం ఉంటే ఈ వీడియోను చూడండి.

అండమాన్ ఆదివాసీలతో నగ్న నృత్యాలు చేయిస్తున్న టూరిస్టులు

2012-01-11T17:36:00.000+05:30

అండమాన్‌లో టూరిస్టుల అకృత్యాలు వెలుగులోకి వచ్చాయి. అక్కడ నివసించే అరుదైన గిరిజన జాతులతో అసభ్యంగా ప్రవర్తిస్తున్న విషయం బయటపడింది. దేశవిదేశాల నుంచి వచ్చే పర్యాటకులను అడవుల్లోకి తీసుకువెళుతున్న టూరిస్ట్ కంపెనీలు.. అక్కడ నివసించే ఆదివాసీలతో నగ్న నృత్యాలు చేయిస్తున్నాయి. జరావా తెగకు చెందిన వారికి డబ్బులు ఇస్తామంటూ మభ్య పెట్టి డ్యాన్సులు చేయిస్తున్నారు. దీనికి స్థానిక పోలీసులు కూడా సహకరిస్తున్నారు. ఈ తెగలో కేవలం 403 మంది మాత్రమే జీవించి ఉన్నారు. ఇలాంటి వారిని కాపాడాల్సిన సర్కార్ కూడా దీనిపై దృష్టి పెట్టడం లేదు. ఈ దృశ్యాలను ఓ టూరిస్ట్ చిత్రీకరించి, బ్రిటన్‌లోని ది గార్డియన్ పత్రికకు అందించారు. ఈ వీడియోపై కేంద్ర ప్రభుత్వం కూడా సీరియస్ గానే స్పందించింది. దీనిపై నివేదిక ఇవ్వాల్సిందిగా అండమాన్ అధికారులను ఆదేశించింది. అయితే, అండమాన్ డీజీపీ మాత్రం, ఈ వీడియో కొత్తది కాదని, పదేళ్ల క్రితానిదని ప్రకటించారు. అప్పట్లో జరావా తెగలో చాలామంది బట్టలు వేసుకునేవారు కాదని, ఇప్పుడు వారిలో మార్పు వచ్చిందని అన్నారు. ఇక గార్డియన్ పత్రిక మాత్రం ఈ విషయాన్ని ఖండించింది. ఇది తాజా వీడియోనే అని ప్రకటించింది. జరావా తెగ మనిషి తొలితరం జాతుల్లో ఒకటిగా భావిస్తారు. దాదాపు 30వేల సంవత్సరాల క్రితమే వీరు ఆఫ్రికా నుంచి వచ్చి ఇక్కడ స్థిరపడినట్లు చరిత్రకారులు చెబుతున్నారు. అండమాన్లో నివసిస్తున్న నాలుగు అరుదైన జాతుల్లో ఇదీ ఒకటి. వాస్తవానికి అండమాన్కు సొంత హక్కుదారులు ఈ నాలుగు తెగల వారే. స్వేచ్ఛగా జీవించే వీరికి, బ్రిటీష్ కాలంలోనే కష్టాలు మొదలయ్యాయి. అండమాన్కు వలసలు మొదలైనప్పటినుంచి ఈ తెగల జీవితాలు ఛిద్రమైపోయాయి.

బాలయ్యకు అంత సీన్ లేదన్న చిరు

2012-01-10T19:12:00.000+05:30

కొంతమంది సామాజిక న్యాయమంటూ వచ్చారు.. పోయారు.. మా నాన్న సామాజిక న్యాయాన్ని ఓటుబ్యాంకుగా చూడలేదంటూ కృష్ణా జిల్లా పర్యటనల్లో వీరలెవల్లో బాలయ్య మాట్లాడిన సంగతి అందరికీ తెలిసిందే. చిరంజీవి ఉద్దేశించే ఈ వ్యాఖ్యలు చేశారని అందరికీ అర్థం కూడా అయ్యింది. చిరంజీవికీ అర్థమయ్యింది. దీని మీద మీ రెస్పాన్స్ ఏమిటంటూ.. విశాఖలో చిరంజీవిని అడిగిన రిపోర్టర్లకు, ఊహించని సమాధానంఇచ్చారు మెగాస్టార్. "బాలకృష్ణది చిన్నపిల్లాడి మనస్తత్వం. ఆయన వ్యాఖ్యలకు నేను సమాధానం చెప్పాల్సిన పనిలేదు" అని కారెక్కి అరకుకు వెళ్లిపోయారు చిరు. బాలయ్యకు అంత సీన్ లేదన్న విషయాన్ని ఇలా సెలవిచ్చారు మెగాస్టార్. అన్నట్లు.. ఆ మాధ్య రాంచరణ్ను ఉద్దేశించి బాలయ్య మాట్లాడినప్పుడు.. ఇదే చిరంజీవి, ఆయనేం మాట్లాడినా కరెక్టే నంటూ తిరుపతిలో సెలవిచ్చారు. మరి అప్పటికీ ఇప్పటికీ తేడా ఏమిటో...!

బాబుకూ..జగన్కూ ఎంత తేడా..?

2012-01-10T18:29:00.002+05:30

పోరాట స్వరూపాలు వేరైనప్పటికీ, ఇద్దరి యాత్ర పరమార్ధం ఒక్కటే. రైతు సమస్యలు తెలుసుకోవడం కోసం పాలకుర్తికి చంద్రబాబు వెళితే, రైతులకు న్యాయం చేయాలంటూ ఆర్మూర్ కు వెళ్లారు జగన్. ఇక చంద్రబాబు టూర్ ను అడ్డుకోవాలని పిలుపు నిచ్చిన తెలంగాణ జేఏసీ, జగన్ విషయంలోనూ అదే పిలుపును పునరుద్ఘాటించింది. జగన్ ను అడ్డుకోవాలని, అడ్డుకుంటామని చెప్పింది. కానీ, వాస్తవంలోకి వచ్చేసరికి మాత్రం పరిస్థితి పూర్తిగా మారిపోయింది... పాలకుర్తిలో చంద్రబాబు యాత్రకు వారం రోజుల ముందు నుంచే టీఆర్ఎస్ ర్యాలీలు, ధర్నాలు, ఆందోళనలతో నానా రభస సృష్టించింది. చంద్రబాబు దండుపై దాడి చేసింది. బాబు యాత్రను భగ్నం చేయడానికి శతవిధాలా ప్రయత్నించింది. మరి జగన్ విషయంలో అలాంటి దృశ్యాలు మచ్చుకైనా లేవు. హైదరాబాద్లో జగన్ బయలు దేరి నిజామాబాద్ టౌన్కు చేరుకునే దాకా చిన్న చిన్న అవాంతరాలు తప్ప, జగన్ టూర్ కు బ్రేక్ వేయగలిగేంత స్థాయిలో టీఆర్ఎస్ గానీ తెలంగాణ వాదులు కానీ ఆందోళనలు చేపట్టలేదు. కాన్వాయ్ ను నిలపలేదు. పైపెచ్చు.. ఎక్కడికక్కడ జగన్ కు అపూర్వ నీరాజనం. నిజామాబాద్ టౌన్లో మాత్రం మహిళలు జగన్ కాన్వాయ్ పైకి కోడిగుడ్లు, రాళ్లు విసిరారు. వీర లెవల్లో ప్రకటనలిచ్చే నేతలందరూ ఇళ్లకే పరిమితమైపోతే, దిశానిర్దేశం లేని క్యాడర్ మనకెందుకులే అనుకుంది. ఇక ఆవేశం ఉన్న కుర్రవాళ్లు మాత్రం అక్కడక్కడా జగన్ ను అడ్డుకుందామని ప్రయత్నించారు. కానీ, వారి శక్తి సరిపోలేదు. చంద్రబాబు విషయం అంత హడావిడి చేసిన టీఆర్ఎస్... పార్లమెంట్ల సమైక్య ప్లకార్డును పట్టుకుని మరీ నుంచున్న జగన్కు ఎందుకు మినహాయింపు ఇచ్చినట్లు.. ఇది తెలంగాణ భవన్ ఏలికలే తెలియాలి..?

రేపటి నుంచే జగన్ దీక్ష.. భారీ ఉత్కంఠ

2012-01-09T19:03:00.001+05:30

నిజామాబాద్ జిల్లా ఆర్మూర్లో వైఎస్ జగన్మోహన్ రెడ్డి తలపెట్టిన రైతుదీక్ష రేపు మొదలుకానుంది. జగన్ దీక్ష కోసం ఇప్పటికే వైఎస్సార్ సీపీ నేతలు భారీ ఏర్పాట్లు చేశారు. ఆర్మూరు శివారులో భారీ వేదికను నిర్మించారు. వేలాది మంది దీక్షలో పాల్గొనేందుకు వీలుగా ఏర్పాట్లు చేస్తున్నారు. తమ దీక్షకు సహకరించాలని, జగన్ ను అడ్డుకోవద్దని తెలంగాణ వాదులకు వైఎస్సార్ సీపీ నేత బాజిరెడ్డి గోవర్ధన్ విజ్ఞప్తి చేశారు. కానీ, ఆర్మూర్లో జగన్ను కాలు పెట్టనివ్వమని, అసలు తెలంగాణలోకే రానివ్వమని తెలంగాణవాదులు ఢంకా భజాయించి మరీ చెబుతున్నారు. జగన్ ను అడ్డుకోవడానికి పూర్తిస్థాయిలో సిద్ధమవుతున్నారు. ఈ నేపథ్యంలో ప్రభుత్వం ఎలా వ్యవహరిస్తుందన్నది ఆసక్తికరంగా మారింది. భారీగా సెక్యూరిటీ ఇచ్చి జగన్ ను పంపుతుందా, లేక మధ్యలోనే అరెస్ట్ చేసి హైదరాబాద్లోని లోటస్ పాండ్ ఇంటికి పంపించేస్తుందా..? అదీ కాదంటే, బాబు టూర్ తరహాలో తెలంగాణ వాదులను ముందుగానే అరెస్ట్ చేసి లైన్ క్లియర్ చేస్తుందా అన్నది తేలాల్సి ఉంది. జగన్ మాత్రం ఈ దీక్ష విషయంలో ఎట్టిపరిస్థితుల్లోనూ వెనుకడుగు వేయకూడదనుకుంటున్నారు.

తొడగొడితే మీసం ఊడుతుంది

2012-01-09T18:41:00.002+05:30

కృష్ణా జిల్లా పర్యటనలో బాలయ్య తీరుపై కాంగ్రెస్ నేత తులసిరెడ్డి నిప్పులు చెరిగారు. జనం మధ్య తొడ కొట్టడం, మీసం మెలివేయడం మంచిపద్దతి కాదన్నారు. తొడగొడితే మీసం ఊడిపోతుందన్న సంగతిని బాలకృష్ణ గుర్తుపెట్టుకోవాలన్నారు. 2009 ఎన్నికల్లో బాలకృష్ణ ప్రచారం చేస్తే ఎంత మంది గెలిచారో ఒక్కసారి గుర్తు చేసుకోవాలని తులసిరెడ్డి సూచించారు. రాష్ట్రంలో 1983 నాటి పరిస్థితులు లేవని, బాలకృష్ణ కలలను నెరవేరవని తులసిరెడ్డి ప్రకటించారు.

బాబు ట్రీట్ మెంటే జగన్ కూ..

2012-01-09T05:11:00.000+05:30

తెలంగాణలో పర్యటించే విషయంలో బాబుకిచ్చిన ట్రీట్ మెంట్నే జగన్ కూ ఇవ్వాలని తెలంగాణ జేఏసీ నిర్ణయించింది. తెలంగాణకు అనుకూల ప్రకటన చేయని జగన్ ను అడ్డుకోవాలంటూ తెలంగాణ వాదులకు జేఏసీ ఛైర్మన్ కోదండరామ్ పిలుపునిచ్చారు. టీఆర్ఎస్ అధినేత కేసీఆర్ కూడా దాదాపుగా ఇదే అభిప్రాయాన్ని వెలుబుచ్చారు. అయితే, రైతుల కోసం పోరాడుతున్న తమ నేతను అడ్డుకోవద్దంటూ వైఎస్సార్ సీపీ తెలంగాణ నేతలు విజ్ఞప్తి చేశారు. జగన్ తెలంగాణకు సానుకూలమేనని ఆ పార్టీనేత బాజిరెడ్డి గోవర్ధన్ నిన్న నిజామాబాద్ లో చెప్పారు. జేఏసీ అడ్డుకోమని పిలుపు నిచ్చిన నేపథ్యంలో జనవరి 10న మొదలు కావాల్సిన జగన్ దీక్షపై ఉత్కంఠ నెలకొంది. బాబు లాగానే జగన్ కూడా దీక్షను పూర్తి చేసుకుని వస్తారా.. లేక మానుకోట ఘటనలా మధ్యలోనే వెనుదిరుగుతారా అన్నది ఆసక్తికరంగా మారింది. జగన్ ఆర్మూర్ దీక్ష విజయవంతం అయితే, తెలంగాణలో ఆయన పర్యటనలకు ఉన్న అడ్డంకులన్నీ తొలిగిపోయినట్లే. ఉపఎన్నికల్లో తెలంగాణ ప్రాంతంలో తన అభ్యర్థులను నిలబెట్టనని ప్రకటించడం ద్వారా, ఇప్పటికే సగం లైన్ క్లియర్ చేసుకున్నారు జగన్. ఆర్మూర్ దీక్షతో మొత్తం రూట్ ను సెట్ చేసుకోవాలనుకుంటున్నారు.

మహేశ్ ముద్దును ఎంజాయ్ చేసిన నమ్రత

2012-01-09T05:02:00.000+05:30

టాలీవుడ్ ప్రిన్స్ మహేశ్ బాబు.. ఈ సారి రెచ్చిపోతున్నాడు. బిజినెస్ మేన్ గా ప్రేక్షకుల ముందుకు రానున్న మహేశ్, హీరోయిన్ కాజల్ ను లిప్ లాక్ చేశాడు. ఇప్పటివరకూ హీరోయిన్లతో ఇలాంటి సీన్లకు దూరంగా ఉన్న మహేశ్ ఈ సారి మాత్రం కట్టుదాటేశాడు. ఆర్య - 2లో అల్లు అర్జున్ తో పెదాలపై ముద్దు పెట్టించుకున్న కాజల్, మహేశ్ విషయంలో మరింత చొరవచూపించింది. ఈ లిప్ లాక్ సీన్ దాదాపు నిమిషం పాటు తెరపై కనిపించనుంది. ఈ విషయాన్ని స్వయంగా సినిమా డైరెక్టర్ పూరీ జగన్నాథే ప్రకటించాడు. కాజల్ కు ముద్దివ్వడానికి మహేశ్ భార్య నమ్రత కూడా సిగ్నల్ ఇచ్చిందట. ప్రివ్యూ చూపించినప్పుడు ఈ సీన్ ను ఆమె బాగా ఎంజాయ్ చేసిందట. ఈ సంగతీ పూరీగారే సెలవిచ్చారు.

అందుకే రాజకీయాల్లోకి:బాలకృష్ణ

2012-01-08T21:12:00.000+05:30

1983 నాటి పరిస్థితులు రాష్ట్రంలో నెలకొన్నందుకే.. తాను క్రియాశీల రాజకీయాల్లోకి వస్తున్నానని.. సినీనటుడు నందమూరి బాలకృష్ణ ప్రకటించారు. ఎన్టీఆర్‌ స్ఫూర్తితో నిస్వార్తంగా ప్రజాసేవ చేయాలనుకుంటున్నట్లు కృష్ణా జిల్లా పర్యటనలో ఆయన తెలిపారు. తుదిశ్వాస విడిపించేంతవరకూ ప్రజాసేవలోనే తరిస్తానన్నారు. కృష్ణాజిల్లా ఘంటశాలలో ఏర్పాటు చేసిన ఎన్టీఆర్ విగ్రహాన్ని ఆయన ఆవిష్కరించారు. తెలుగుజాతి ఆత్మగౌరవం ఢిల్లీలో హేళనకు గురవుతోందని బాలయ్య ఆవేదనవ్యక్తం చేశారు. ఇంతవరకూ త్వరలో వస్తానంటూ చెప్పుకొచ్చిన బాలయ్య.. వచ్చే ఎన్నికల్లోనే బరిలోకి దిగుతాననడంతో టీడీపీలో కొత్త ఉత్సాహం నెలకొంది. బాలయ్య ఎక్కడనుంచి పోటీ చేస్తారన్నదానిపై అప్పుడే ఊహాగానాలు కూడా మొదలయ్యాయి..

ఛానళ్ల అమ్మకంపై రామోజీ ప్రకటన...

2012-01-04T04:08:00.000+05:30

నెట్‌వర్క్ 18 చేసిన ప్రకటనకు కాస్త భిన్నమైన ప్రకటనను రామోజీ గ్రూప్ సంస్థ ఉషోదయా ఎంటర్‌ప్రైజెస్ చేసింది. దీని ప్రకారం, ఈటీవీలో ఛానళ్ల అమ్మకం ఎప్పుడో పూర్తైపోయింది. ఈటీవీ తెలుగు, ఈటీవీ 2 మినహా మిగిలిన అన్ని ఛానళ్లను ముఖేష్ అంబానీ చాలా రోజుల క్రితమే కొనేశారు. ఈటీవీ తెలుగు, ఈటీవీ 2 ల్లో మాత్రం 49 శాతం రిలయన్స్ కొనుగోలు చేసింది. రిలయన్స్ కొన్న ఛానళ్లలోనే వాటాలను.. టీవీ 18 దక్కించుకుంది. దీన్ని బట్టి చూస్తే, ఇది టీవీ 18కు, రిలయన్స్‌కు మధ్య కుదిరిన ఒప్పందమే తప్ప.. ఈటీవీకి, టీవీ 18కు కుదిరిన ఒప్పందం కాదని తెలుస్తోంది. ఈటీవీ నెట్‌వర్క్‌ను రిలయన్స్ కొనుగోలు చేసిందన్న విషయమూ ఇంతవరకూ బయట పడకపోవడం విశేషమే.. బహుశా, ఈటీవీ గ్రూప్ ఎంప్లాయిస్‌కు ఇది మరింత పెద్ద షాక్ కావచ్చు.. ఛానళ్ల అమ్మకంపై రామోజీ గ్రూప్ ఇచ్చిన వివరణ ఇదీ.. ఈటీవీ ఛానెళ్లలో వాటాల మార్పిడి జరిగింది. రామోజీరావుకు చెందిన మీడియా సంస్థ ఉషోదయా ఎంటర్‌ప్రైజెస్‌ ప్రైవేట్‌ లిమిటెడ్‌లో కొద్దికాలం క్రితం రిలయన్స్‌ ఇండస్ట్రీస్‌ లిమిటెడ్‌ తన గ్రూపు కంపెనీల ద్వారా పెట్టుబడి పెట్టింది. ఉషోదయా ఎంటర్‌ప్రైజెస్‌కు రెండు తెలుగు ఛానళ్లు(ఈటీవీ, ఈటీవీ-2), పది ఇతర భాషా ఛానళ్లు ఉన్న విషయం విదితమే. ఇందులో ఈటీవీ బంగ్లా, ఈటీవీ మరాఠీ, ఈటీవీ కన్నడ, ఈటీవీ గుజరాతీ, ఈటీవీ ఒరియాలు భాషా ఛానళ్లు కాగా, ఈటీవీ ఉర్దు, ఈటీవీ ఉత్తరప్రదేశ్‌, ఈటీవీ బీహార్‌, ఈటీవీ రాజస్థాన్‌, ఈటీవీ మధ్యప్రదేశ్‌ మాత్రం వార్తా- వినోద ఛానళ్లు. ఇంతకుముందు కుదిరిన ఒప్పందం ప్రకారం రెండు తెలుగు ఛానళ్లు మినహా, మిగిలిన 10 ఛానళ్లలో 100% వాటా రిలయన్స్‌ గ్రూపు సంస్థలకు దక్కుతుంది. రెండు తెలుగు ఛానళ్లలో మాత్రం 49% వాటా కేటాయిస్తారు. మిగిలిన 51% వాటా ఉషోదయా ఎంటర్‌ప్రైజెస్‌కే ఉంటుంది.రిలయన్స్‌ నుంచి టీవీ 18కు ....మరోవైపు రిలయన్స్‌ గ్రూపు సంస్థలు ఈటీవీ ఛానళ్లలోని తమ వాటాను కొంత మేరకు టీవీ 18 బ్రాడ్‌కాస్ట్‌ లిమిటెడ్‌, నెట్‌వర్క్‌ 18లకు విక్రయిస్తున్నాయి. ఈ విషయాన్ని రిలయన్స్‌ ఇండస్ట్రీస్‌ లిమిటెడ్‌, టీవీ 18 బ్రాడ్‌కాస్ట్‌, నెట్‌వర్క్‌ 18 సంస్థలు మంగళవారం వెల్లడించాయి. దీని ప్రకారం రిలయన్స్‌ గ్రూపు సంస్థల నుంచి అయిదు ఈటీవీ ప్రాంతీయ వార్తా- వినోద ఛానళ్లలో(ఈటీవీ ఉర్దు, ఈటీవీ ఉత్తరప్రదేశ్‌, ఈటీవీ బీహార్‌, ఈటీవీ రాజస్థాన్‌, ఈటీవీ మధ్యప్రదేశ్‌) నూరు శాతం వాటాను నెట్‌వర్క్‌ 18 కొనుగోలు చేస్తోంది. అదేవిధంగా అయిదు ఇతర భాషా ఛానళ్లలో (ఈటీవీ బంగ్లా, ఈటీవీ మరాఠీ, ఈటీవీ కన్నడ, ఈటీవీ గుజరాతీ, ఈటీవీ ఒరియా) 50% వాటా తీసుకుంటోంది. అంతేగాక రెండు తెలుగు ఈటీవీ ఛానళ్లలోనూ తనకు ఉన్న 49% వాటా నుంచి రిలయన్స్‌ గ్రూపు సంస్థలు 24.5% వాటాను నెట్‌వర్క్‌ 18 సంస్థలకు విక్రయిస్తున్నాయి.నిధుల సేకరణకు నెట్‌వర్క్‌ 18 సన్నాహాలుఈటీవీ ఛానళ్లలో వాటాల కొనుగోలు నిమిత్తం అవసరమైన నిధుల సేకరణకు నెట్‌వర్క్‌ 18, టీవీ 18 సన్నాహాలు చేస్తున్నాయి. రైట్స్‌ ఇష్యూ ద్వారా నిధులు సేకరించనున్నట్లు ఈ కంపెనీలు వెల్లడించాయి. రైట్స్‌ ఇష్యూలో భాగంగా ఈ రెండు సంస్థల ప్రమోటర్లు కూడా తమ వంతు వాటా నిధులు తెచ్చేందుకు సంసిద్ధమవుతున్నారు. నెట్‌వర్క్‌ 18 మీడియా, టీవీ 18 బ్రాడ్‌కాస్ట్‌లు రెండూ స్టాక్‌ మార్కెట్లో నమోదైన సంస్థలు. ఈ రెండూ మంగళవారం రైట్స్‌ ఇష్యూ ప్రకటన చేశాయి.

ఈటీవీ నెట్‌వర్క్ అమ్మేసిన రామోజీ..

2012-01-04T02:59:00.000+05:30

ఈటీవీ నెట్‌వర్క్ అమ్మకంపై చాలాకాలంగా కొనసాగుతున్న ఉత్కఠ వీడిపోయింది. సీఎన్‌బీసీ, సీఎన్‌ఎన్ ఐబీఎన్, కలర్స్ లాంటి ఛానల్స్ నిర్వహిస్తున్న టీవీ 18 గ్రూప్.. ఈటీవీ నెట్‌వర్క్‌లో మెజార్టీ వాటాను సొంతం చేసుకుంది. హిందీ ఛానళ్లైన ఈటీవీ ఉత్తర ప్రదేశ్, ఈటీవీ మధ్యప్రదేశ్, ఈటీవీ రాజస్థాన్, ఈటీవీ బీహార్‌తో పాటు ఈటీవీ ఉర్ధూను పూర్తిగా సొంతం చేసుకుంది. ఈటీవీ మరాఠీ, ఈటీవీ కన్నడ, ఈటీవీ బంగ్లా, ఈటీవీ గుజరాతీ, ఈటీవీ ఒరియాల్లో యాభైశాతం వాటాను సొంతం చేసుకుంది. ఈటీవీ తెలుగు, ఈటీవీ రెండులో 24.5 శాతం వాటాను దక్కించుకుంది. ఈ డీల్ విలువ 2100 కోట్ల రూపాయలని టీవీ 18 గ్రూప్ ప్రకటించింది. టీవీ 18, ఈటీవీల మధ్య డీల్ కుదర్చడంలో రిలయన్స్ ఇండస్ట్రీస్ ఛైర్మన్ ముఖేష్ అంబానీ కీలక పాత్ర పోషించినట్లు తెలుస్తోంది. ఈటీవీకి చెల్లించాల్సిన 2100 కోట్ల రూపాయలను టీవీ 18 గ్రూప్‌కు రిలయన్స్ ట్రస్ట్‌ ద్వారా ఆయన అందిస్తున్నారు. ప్రతిగా, టీవీ 18, ఈటీవీ గ్రూప్‌ ఛానళ్ల వైరెలెస్‌ ప్రసారాలను చేసుకునే హక్కును ఆయన నేతృత్వంలోని ఇన్ఫోటెల్‌ బ్రాడ్‌బ్యాండ్ సర్వీస్‌కు దక్కుతాయి. దేశవ్యాప్తంగా 4జీ లైసెన్సులు ఇన్ఫోటెల్‌కు ఉన్నాయి. త్వరలోనే బ్రాడ్‌బ్యాండ్ రంగంలో విప్లవం సృష్టించడానికి సిద్ధమవుతున్న ముఖేశ్ అంబానీ, వైర్‌లెస్ పద్దతిల్లో, బ్రాడ్‌బ్యాండ్ ద్వారా టీవీ ఛానళ్లను కూడా అందించడానికి తాజా డీల్ ఉపయోగపడుతుంది. ఛానళ్లలో వాటాలు అమ్మడం ద్వారా రామోజీ ఆర్థిక కష్టాలు చాలా వరకూ తీరిపోనున్నాయి. టీవీ 9ను కూడా దాని ప్రమోటర్లు అమ్మేయడానికి చాలాకాలంగా ప్రయత్నిస్తున్నారు. త్వరలోనే టైమ్స్‌ నౌ గానీ, మరో సంస్థ గానీ టీవీ 9ను టేకోవర్ చేసే అవకాశాలున్నాయి.కొసమెరుపు.. ఈటీవీ 2, టీవీ 9 కన్నా ఓ నెల రోజులు ముందుగా ప్రసారాలు ప్రారంభించింది. ముందుగానే అమ్ముడయ్యింది. టీవీ 9 అమ్మకానికి సిద్ధం గాఉంది.

టాటా నానోకు బజాజ్ సవాల్

2012-01-03T18:31:00.001+05:30

ప్రపంచంలో అత్యంత చవక కారైన టాటా నానోకు.. బజాజ్ సవాల్ విసిరింది. తన సరికొత్త, మొట్టమొదటి కారు ఆర్.ఇ. 60ని జనం ముందుకు తెచ్చింది. న్యూఢిల్లీలో జరుగుతున్న ఆటో షోలో దీన్ని ప్రదర్శిస్తున్నారు. గ్రీన్ కార్ గా దీన్ని టాటా ప్రచారం చేస్తోంది. కిలోమీటర్ కు 60 గ్రాముల కార్బన్ డై ఆక్సైడ్ ను మాత్రమే ఈ కారు విడుదల చేస్తుందని బజాజ్ ఎండీ రాజీవ్ బజాజ్ ప్రకటించారు. ఇక లీటరు పెట్రోల్ కు 35 కిలోమీటర్ల మైలేజీ ఇస్తుందనీ ఆయన చెప్పారు. నలుగురు కూర్చోవడానికి వీలుగా తయారు చేసిన ఈ కారులో గరిష్ట వేగం మాత్రం 70 కిలోమీటర్లే సాధ్యం. నగరాల్లో వాడకానికి అనువుగా తీర్చి దిద్దిన ఆర్.ఇ.60 .. టాటా నానోకు గట్టి పోటీ ఇస్తుందని ఆటో ఇండస్ట్రీలో చర్చసాగుతోంది. డిజైన్ విషయంలో నానోతో పోలిక లేకపోయినా, ఆకట్టుకునే రీతిలోనే బజాజ్ డిజైన్ చేసింది. త్వరలోనే దీన్ని కస్టమర్లకు అందుబాటులోకి తెస్తామని కంపెనీ ప్రకటించింది. నిస్సాన్, రెనాల్ట్ ల భాగస్వామ్యంలో దీన్ని ఉత్పత్తి చేయాలని బజాజ్ భావిస్తోంది. దీని ధర ఎంతన్నది అధికారికంగా ప్రకటించకపోయినా.. లక్షా 25 వేల నుంచి రెండు లక్షల మధ్య ఉండవచ్చన్న ఊహాగానాలు వినిపిస్తున్నాయి.

సబ్బులో టెర్రరిస్టుల ఎస్కేప్ స్కెచ్

2012-01-02T18:30:00.002+05:30

అత్యంత ప్రమాదకర ఐఎస్‌ఐ ఉగ్రవాది వికారుద్దీన్‌ వరంగల్‌ జైలు నుంచి తప్పించుకునే ప్రయత్నంలో ఉన్నట్లు జైలు అధికారులకు ఆధారాలు దొరికాయి. వరంగల్‌ సెంట్రల్‌ జైలు లో ఉంటున్న ఐఎస్‌ఐ ఉగ్రవాది వికారుద్దీన్‌, సులేమాన్‌, ఖాజాలు.. చాలా రోజులుగా అధికారులను ముప్పుతిప్పలు పెడుతున్నారు. కోర్టు విచారణల కోసం.. నాంపల్లికి తరచూ రావాల్సి ఉండడంతో.. మార్గమధ్యలోనే తప్పించుకోవడానికి వారు వ్యూహరచన చేశారు. డిసెంబరు నెలలో నాంపల్లి కోర్టులో హాజరుపరిచి.. తిరిగి తీసుకువెళుతుండగా.. వికారుద్దీన్‌ చేసిన హంగామా అంతా ఇంతా కాదు.. బిర్యానీ ఇప్పించాల్సిందేనంటూ.. గొడవకు దిగాడు. ఈ టెర్రరిస్టును కంట్రోల్ చేయడానికి జనగాంలో అదనపు పోలీసులు రంగంలోకి దిగాల్సి వచ్చింది. కావాలనే, వికార్.. ఈ గొడవ సృష్టించినట్లు అనుమానాలు వ్యక్తమయ్యాయి. దీన్ని రుజువు చేస్తూ.. వరంగల్‌ జైలులో దొరికిన ఓ పేపర్ ముక్క.. ఉగ్రవాదుల ప్లాన్‌ను బయటపెట్టింది. రెండు రోజుల కిందట బ్యారెక్‌లో ఉన్న ఖైదీ సులేమాన్‌ ఓ సబ్బు ముక్కను మరో ఐఎస్‌ఐ నిందితుడు ఖాజాకు ఇవ్వాలని జైలు సిబ్బందిని కోరారు. అనుమానంతో, ఆ సబ్బును ముక్కలు చేసి చూడగా.. అందులో ఉర్దూలో రాసి ఉన్న ఓ పేపర్ కనిపించింది. దీంతో ఆ పేపర్‌ను జైలు అధికారులకు వార్డర్ అందించాడు. అందులో, ఏ ఏ కేసులు ఎప్పుడెప్పుడు కోర్టులో విచారణకు వస్తాయో తెలపాలని ఉన్నట్లు పోలీసులు చెబుతున్నారు. అయితే.. ఈ లెటర్‌లో జైలు నుంచి తప్పించుకోవడానికి కోడ్ వర్డ్స్‌తో వేసిన ఓ స్కెచ్‌ ఉన్నట్లు సమాచారం. ఈ విషయాన్ని బయటపెట్టిన సిబ్బందిని చంపేస్తానని సులేమాన్‌ బెదిరిస్తుండడంతో జైలు సిబ్బంది భయాందోళనలో ఉన్నారు. ఐఎస్‌ఐ ఖైదీల ప్లాన్ బయటపడడంతో, వారిని హైసెక్యూరిటీ జోన్‌లో పెట్టారు. తదుపరి కోర్టు విచారణలకు వీరిని తరలించడంపై ఉన్నతాధికారులతో సమీక్షిస్తున్నారు. జైలు భద్రతను కూడా కట్టుదిట్టం చేశారు.

కాటు సారా

2012-01-02T17:37:00.000+05:30

కృష్ణా జిల్లాలో కల్తీసారా విషాదం ప్రభుత్వం మెడకు చుట్టుకొంటోంది. ప్రభుత్వ నిర్లక్ష్యం వల్లే.. అమాయకుల ప్రాణాలు బలయ్యాయన్న విమర్శలు పెరుగుతున్నాయి. మృతుల సంఖ్య పెరుగుతుండడమూ కిరణ్ సర్కార్‌ను కలవరపెడుతోంది. ఇప్పటికే మైలవరం మండలంలోని పోరాటనగర్ కు చెందిన 18 మంది గిరిజనులు కల్తీసారా కాటుకు బలైపోయారు. ఇవాళ మైలవరం మండలంలోనే మరో చోట కూడా కల్తీసారా తాగి 14 మంది అస్వస్థతకు గురయ్యారు. వరసగా ఇలాంటి ఘటనలు జరుగుతుండడం.. ప్రభుత్వానికి కంటిమీద కునుకు లేకుండా చేస్తోంది. నిన్న పరామర్శించడానికి వెళ్లిన మంత్రి మోపిదేవిని బాధిత కుటుంబాలు నిలదీశాయి. రెండు లక్షల ఎక్స్ గ్రేషియా ఇస్తామని, నాటుసారా తయారీ దారులపై పీడీ యాక్ట్ అమలు చేస్తామంటూ మోపిదేవి ప్రకటించినా బాధితులు శాంతించలేదు. కల్తీసారాతో అనారోగ్యం పాలై ఆస్పత్రిలో చికిత్స పొందుతున్న వారిలో మరికొంత మంది పరిస్థితి విషమంగా ఉంది. కల్తీ కల్లులో విషపదార్థాలు ఉన్నట్లు ల్యాబ్ రిపోర్టుల్లో తేలింది. ఇది ప్రమాదవశాత్తూ జరిగిందా.. లేక, కావాలనే చేశారా.. అన్న దానిపై అధికారులు దర్యాపు మొదలుపెట్టారు. కల్తీ సారా ఘటన రాజకీయంగానూ దుమారాన్ని సృష్టిస్తోంది. ఇప్పటికే మద్యం సిండికేట్ల వ్యవహారంతో తలబొప్పి కట్టిన కిరణ్ సర్కార్‌కు.. ఇప్పుడు నాటు సారా వ్యవహారం తీవ్ర ఇబ్బందులకు గురిచేస్తోంది.

ఛీ..ఛీ.. సిగ్గేస్తోంది

2012-01-02T16:21:00.003+05:30

"ఛీ..ఛీ..సిగ్గేస్తోంది. అద్దంలో నా మొహం చూసుకోవడానికే నాకు సిగ్గుగా ఉంది.. " ఈ మాటలన్నది కాంగ్రెస్ సీనియర్ నేత కే.కేశవరావు. తెలంగాణ ఉద్యోగ సంఘాల డైరీ ఆవిష్కరణ కార్యక్రమంలో పాల్గొన్న ఆయన, తెలంగాణ వాదుల నుంచి తీవ్రస్థాయిలో విమర్శలు ఎదుర్కొన్నారు. కేసీఆర్ తనయుడు కేటీఆర్ అయితే.. కేశవరావు గారూ అంటూనే, కాంగ్రెస్‌ను ఏకి పారేశారు. తెలంగాణలో కాంగ్రెస్‌ను అసహ్యించుకునే పరిస్థితి వచ్చిందంటూ విమర్శించారు. అందరి ప్రసంగాలు అయ్యాక, చివరగా మైక్ అందుకున్న కేకే... ఎంతో ఉద్వేగంగా మాట్లాడారు. తాను కాంగ్రెస్ నేతలను కలిసికట్టుగా నడిపించడంలో విఫలమయ్యాయని ఒప్పుకున్నారు. కేసీఆర్ వల్లే రాష్ట్రపతి ప్రసంగంలో తెలంగాణ అంశం చేరిందన్నారు. అయితే, తాము తెలంగాణ ఉద్యమం విషయంలో వెనక్కి తగ్గలేదని, ఎంతకైనా వెనుకాడమన్నారు. అవసరమైతే ప్రాణ త్యాగాలకూ సిద్ధమన్నారు. తెలంగాణను ఏతాత దిగివచ్చినా అడ్డుకోలేడని అన్నారు.

పటోళ్లను చంపింది ఎవరు?

2011-12-28T10:20:00.002+05:30

రివల్యూషనరీ పాట్రియాటిక్ టైగర్స్ వ్యవస్థాపకుడు పటోళ్ల(పట్లోళ్ల) గోవర్ధన్ రెడ్డి నిన్న అత్యంత దారుణంగా, పట్టపగలే హత్యకు గురయ్యాడు. అయితే, ఇతన్ని హత్య చేసింది ఎవరు..? పైగా పట్టపగలే నడిరోడ్డుపై, జనం మధ్యన హత్య చేయడానికి కారణం ఏమిటి..? తాను హత్యకు గురవుతానని పటోళ్లకు ముందే తెలిసిపోయిందా..? పారిపోతుండగా అతన్ని గొంతుకోసి చంపేశారా..? ఈ ప్రశ్నలే ఇప్పుడు తేలాల్సి ఉంది. పటోళ్ల హత్య జరగడానికి ముందు కొన్నికీలక పరిణామాలు చోటుచేసుకున్నాయి. అతని అనుచరుడు అనిల్ తో కలిసి ఇంటినుంచి బయలుదేరిన పటోళ్ల.. ఓల్డ్ ఎమ్మెల్యే క్వార్టర్స్ లో వికారాబాద్ ఎమ్మెల్యే ప్రసాద్ను కలవడానికి వెళ్లాడు. అతని పీఏ రాములును కలుసుకున్నాడు. మధ్యాహ్నం 1.36 కు తన భార్య వింద్యారెడ్డికి ఫోన్ చేసి క్షేమంగానే ఉన్నానని చెప్పాడు. సాయంత్రంలోగా ఇంటికి రాకపోతే, బీసీ సంఘం అధ్యక్షుడు కృష్ణయ్యను కలవాలని చెప్పాడు. అప్పటికే పటోళ్లకు తనను హత్య చేయడానికి కుట్ర జరుగుతోందన్న విషయం అర్థమైనట్లుంది. ఎమ్మెల్యే క్వార్డర్స్ దగ్గర ఆటో ఎక్కి ఆబిడ్స్ పోనివ్వమన్న పటోళ్ల, మధ్యలో సందుల్లో నుంచి తీసుకువెళ్లాని ఆటో డ్రైవర్ కు చెప్పాడు. బొగ్గుల కుంట దగ్గరకు వచ్చేసరికి, బైక్ ల పై వచ్చిన దుండగులు ఆటోకు అడ్డంగా ఆపి, కత్తులతో ఒక్కసారిగా పటోళ్లపై దాడి చేశారు. ఆటోలో ఉన్న అనిల్ కూడా వారికి సహకరించాడు. ఆటో డ్రైవర్ పారిపోకుండా పట్టుకున్నాడు. పటోళ్ల గొంతు కోయడంతో పాటు, పొట్టలోనూ విచక్షణారహితంగా పొడిచి చంపారు. అక్కడికక్కడే పటోళ్ల చనిపోయాడంటే ఎంత కిరాతకంగా పొడిచారో ఊహించుకోవచ్చు. ఉప్పల్ సమీపంలో ఓ ల్యాండ్ సెటిల్ మెంట్ వివాదంలోనే పటోళ్ల హత్య జరిగినట్లు తెలుస్తోంది. నయూంను కొంతకాలం క్రితం పటోళ్ల బెదిరించినట్లూ సమాచారం. ఆ నేపథ్యంలోనే అతన్ని నయీం గ్యాంగ్ హత్య చేసినట్లు తెలుస్తోంది.

జయసుధకు క్రిస్మస్ గిఫ్ట్

2011-12-26T09:06:00.000+05:30

సికింద్రాబాద్ ఎమ్మెల్యే, సినీనటి.. జయసుధకు కాంగ్రెస్ పార్టీ క్రిస్‌మస్ గిఫ్ట్‌ను ఇవ్వబోతోంది. త్వరలోనే మహిళా కమిషన్‌ ఛైర్‌పర్సన్‌గా జయసుధను నియమించబోతోంది. అవిశ్వాస సమయంలో జగన్ గ్రూపు నుంచి బయటకు వచ్చి.. ప్రభుత్వానికి అండగా నిలబడినందుకు ఈ ప్రతిఫలాన్ని అందించాలని సీఎం,కాంగ్రెస్ నేతలు భావిస్తున్నారు. జయసుధ నియామకంతో నామినేటెడ్ పోస్టుల పందేరం మొదలవుతుంది.

సీఎం టార్గెట్ నెంబర్ 2

2011-12-26T09:04:00.000+05:30

రాష్ట్ర ప్రభుత్వంలో ఆసక్తికర పరిణామాలు చోటు చేసుకుంటున్నాయి. మంత్రులకు, సీఎంకు మధ్య జరుగుతున్న ఆధిపత్య పోరాటం.. అవినీతిని వెలుగులోకి తెస్తోంది. బొత్సను కంట్రోల్ చేయడానికి మద్యం సిండికేట్లపై ఏసీబీని పురిగొల్పిన సీఎం.. నెక్ట్స్‌ టార్గెట్‌గా, డిప్యూటీ సీఎం రాజనర్సింహను ఎంచుకున్నారు.. త్వరలోనే మంత్రివర్గ విస్తరణ ఖాయంగా కనిపిస్తుండడంతో, హోంమంత్రి పదవిని దక్కించుకోవడానికి రాజనర్సింహ తీవ్రంగా ప్రయత్నిస్తున్నారు. డిప్యూటీసీఎంగా ఉన్నవారే, హోంమంత్రిగా ఉండడం ఆనవాయితీగా వస్తోంది. కాబట్టి, ఆ పోస్ట్ తనకు ఇవ్వాలని రాజనర్సింహ కోరుతున్నారు. పైగా, సబితపై ఆరోపణలు రావడం, శంక్రరావు-సబిత మధ్య వివాదం రాజనర్సింహకు కలిసొచ్చేలానే ఉన్నాయి. కానీ, హోంమంత్రి పదవిని రాజనర్సింహ చేపడితే, తనకు ఇబ్బందులు తప్పవనుకుంటున్న సీఎం.. ఆయనకు పగ్గం వేయడానికి ప్రణాళిక రచిస్తున్నారు. బొత్స విషయంలో వేసిన ప్లాన్‌నే రాజనర్సింహకు కూడా వర్తింప చేయాలనుకుంటున్నారు. దామోదర్‌ రాజనర్సింహ ఉన్నత విద్యాశాఖామంత్రిగా వున్నప్పుడు జరిగిన అవకతవకలను వెలికితీసే పనిలో వున్నారు సీఎం. ఆ సమయంలో ఆయనపై వచ్చిన ఆరోపణల వివరాలను ... అలాగే, యూజీసీ గ్రాంట్స్‌కోసం ఉద్దేశించిన టీక్వీప్ జీవో జారీలో ముడుపులు ముట్టాయంటూ.. ఓ నివేదికను తయారు చేసి సీఎం హైకమాండ్‌కు పంపించినట్లు కాంగ్రెస్ వర్గాలు చెబుతున్నాయి. మరి సీఎం రిపోర్టులు దామోదర రాజనర్సింహకు హోంమినిస్ట్రీని దూరం చేస్తాయో.. లేదంటే, రాజనర్సింహ పలుకుబడే ఫలించి... పదవి అందుతుందో వేచిచూడాలి.

చిరంజీవి మళ్లీ పార్టీ పెడతారా..?

2011-12-22T14:38:00.001+05:30

మెగాస్టార్ చిరంజీవి కాంగ్రెస్ నుంచి బయటకు వస్తారా..? మళ్లీ ప్రజారాజ్యాన్ని పునరుద్దరిస్తారా..? ఈ అనుమానాలను సృష్టించే సంకేతాలు విడుదలయ్యాయి. నెల్లూరు జిల్లా పీఆర్పీ శానససభ్యుడు శ్రీధర్ కృష్ణారెడ్డి చేసిన ప్రకటన.. అటు కాంగ్రెస్‌లోనూ, అందులో విలీనమైన పీఆర్పీ నేతల్లోనూ కలకలాన్ని సృష్టించింది. రాజకీయాల్లో ఏదైనా సాధ్యమేనని, ప్రజారాజ్యం పునరుద్దరణ కూడా జరగొచ్చని ఆయన ప్రకటించారు. మంత్రి పదవులపై కాంగ్రెస్ ఎటూ తేల్చకపోవడం, కేంద్రంలో అజిత్ సింగ్‌ను మాత్రమే తీసుకుని, చిరును వెయిటింగ్ లిస్టులో పెట్టడంతో చిరంజీవి పునరాలోచనలో పడ్డారని తెలుస్తోంది. కాంగ్రెస్ పార్టీకి అత్యవసర సమయంలో విలీనం చేసినప్పటికీ, తమకు సరైన గౌరవం దక్కడం లేదన్న వేదనతో ఆయన ఉన్నారు. పైగా, అజిత్‌ సింగ్ గతంలో జనతాపార్టీలోనూ , కాంగ్రెస్‌లోనూ పార్టీని విలీనం చేయడం, మళ్లీ పునరుద్దరించడంతో.. చిరంజీవి కూడా అదే ఆలోచనలో ఉన్నట్లు అనుమానాలు వ్యక్తమవుతున్నాయి.

శశిని వదిలించుకున్న జయ

2011-12-19T19:43:00.000+05:30

స్నేహానికి మారుపేరుగా, అనుబంధానికి నిలువెత్తు నిదర్శనంగా ఇంతకాలం కనిపించిన తమిళనాడు ముఖ్యమంత్రి జయలలిత, ఆమె సహచరి శశికళ విడిపోయారు. విడిపోయారేనకన్నా, శశికళను జయలలితే వదిలించుకున్నారనడం వాస్తవం. శశికళ జోక్యం రోజురోజుకూ ఎక్కువవుతుండడం, ప్రభుత్వంలో పెత్తనం చెలాయిస్తుండడంతో, జయలలిత అత్యంత కఠినమైన నిర్ణయం తీసుకున్నారు. శశికళను, ఆమె భర్తను, ఆమెకు సంబంధించిన మరో పదిమందిని పార్టీనుంచి బహిష్కరించారు. ఇకపై పార్టీనేతలు వారితో ఏ స్థాయిలోనూ, ఎలాంటి సంబంధాలు కొనసాగించకూడదని కఠినమైన ఆదేశాలు జారీ చేశారు. ఎన్ని కేసులు వచ్చినా, ఎన్ని ఇబ్బందులు వచ్చిన శశికళను అంటిపెట్టుకునే ఇంతకాలం ఉన్న జయలలిత ఆకస్మికంగా ఇంత పెద్ద నిర్ణయం తీసుకోవడం డీఎంకే వర్గాలకు, రాజకీయ పండితులకు అంతుబట్టడం లేదు. అయితే, పార్టీలో మరో పవర్ సెంటర్ గా శశికళ ఎదగడానికి ప్రయత్నించడమే జయ ఆగ్రహానికి కారణమయ్యిందన్న అనుమానాలున్నాయి. వారం రోజుల క్రితమే శశికళకు దూరంగా ఉండాలని కొంతమంది మంత్రులకు జయలలిత సూచించినట్లు సమాచారం. శశికళ మాత్రం ఈ విషయంలో ఇంతవరకూ స్పందించలేదు.

పొట్టగొట్టదన్నందుకు.. కేసు పెట్టారు

2011-12-19T19:22:00.000+05:30

గనులు మాకొద్దు.. మా పొలాలే మాకు కావాలి. .మా గ్రామం మాకు కావాలి అన్న పాపానికి కిరణ్ కుమార్ సర్కార్ జనంపై కేసులు పెట్టింది. ప్రకాశం జిల్లా టంగుటూరు మండలంలోని మర్లపాడు చుట్టుపక్కల గ్రామాల్లో ఐరెన్ ఓర్ గనుల తవ్వకాలకు ఏపీ మైనింగ్ కార్పొరేషన్ తీవ్రంగా ప్రయత్నిస్తోంది. దీనికోసం ప్రజాభిప్రాయ సేకరణకు చాలా కాలం క్రితమే శ్రీకారం చుట్టింది. రెండోవిడత ప్రజాభిప్రాయ సేకరణకు ప్రకాశం జిల్లా కలెక్టర్, జాయింట్ కలెక్టర్ సహా ఇతర అధికారులు డిసెంబర్ 17న మర్లపాడుకు చేరుకున్నారు. తమతో పాటే గనుల తవ్వకాలకు అనుకూలంగా ఉన్న కొంతమంది జనాన్ని పోగేసుకువచ్చారు. ఇది స్థానికుల్లో ఆగ్రహావేశాలను రగిలించింది. గ్రామేతరులను అడ్డుకున్న స్థానికులు, వారి వాహనాలపై దాడి చేశారు. కలెక్టర్ నిర్వహిస్తున్న సభ జరగకుండా అడ్డుపడ్డారు. కలెక్టర్ వెళ్లకుండా ఆయన కారు టైర్లలో గాలి తీసేశారు. దీంతో పోలీసులు జనంపై విరుచుకుపడ్డారు. ఓ దశలో తీవ్రస్థాయిలో తోపులాట జరిగింది. ఓ మహిళ ఈ తొక్కిసలాటలో స్పృహ కోల్పోయింది. గ్రామస్తులు ఇదంతా చేసింది, తామెంతో కాలంగా నమ్ముకుని బతుకున్న గ్రామాన్ని, పొలాలను కాపాడుకోవడానికి. కానీ, పోలీసులకు మాత్రం ఇదంతా చట్ట వ్యతిరేక పనిలా కనిపించింది. అంతే, పోలీసులు,అధికారులపై దాడి చేశారంటూ మర్లపాడుకు చెందిన చాలామందిపై కేసులు నమోదు చేశారు. దీన్ని నిరసిస్తూ, ఇవాళ మర్లపాడు చుట్టుపక్కలకు చెందిన ఐదు గ్రామాల వాసులు ఒంగోలుకు కాలినడకన వచ్చి, ఎస్పీ కార్యాలయాన్ని ముట్టడించారు. తమపై అక్రమ కేసులు ఎత్తివేయాలని విజ్ఞప్తి చేశారు. పొరపాటునే అతిగా ప్రవర్తిస్తే, క్షమించాలని వేడుకొన్నారు. తమ తాపత్రయమంతా భూములకోసమేనని వివరణ ఇచ్చుకున్నారు. అయితే, కేసుల ఎత్తివేత విషయంలో మాత్రం ఎస్పీ నుంచి ఎలాంటి హామీ రాలేదు.

వైకల్యం పీడించింది..గిన్నీస్ బుక్ తలవంచింది

2011-12-19T18:52:00.002+05:30

నాగపూర్‌కు చెందిన జ్యోతి ఆమ్గే స్టైలే వేరు. ఎందుంకంటే ఆమె అందరికన్నా ప్రత్యేకం. ఆ ప్రత్యేకతే ఆమె ముందు గిన్నీస్ రికార్డ్ తలవంచేలా చేసింది. జ్యోతి ఆమ్గేకు డిసెంబర్‌ 16తో పద్దెనిమిదేళ్లు నిండాయి. ఈ పుట్టినరోజే, ఆమెకు గిన్నీస్ రికార్డును కానుకగా ఇచ్చింది. ఇప్పుడు ప్రపంచంలోనే అతి చిన్న మహిళ.. జ్యోతి ఆమ్గే. కేవలం 59 సెంటీమీటర్ల ఎత్తుతో ఈ రికార్డును జ్యోతి సాధించగలిగింది. ఇంతవరకూ అమెరికాకు చెందిన బ్రిడ్గెట్టె జోర్డాన్ పేరిట ఈ రికార్డ్ ఉంది. ఆమె ఎత్తు 69 సెంటీమీటర్లు. ఇప్పుడు ఆ రికార్డు జ్యోతిది.
జ్యోతి ఫస్ట్ బర్త్‌డే జరిగిన తర్వాత ఆమె ఎదుగుదల ఆగిపోయింది. అకోండ్రోప్లాసియా అనే వ్యాధి ఆమెకు సోకిందని, ఇక పెరగడం కష్టమేనని వైద్యులు తేల్చేశారు. అయితే, అందరిలా శారీరంగా ఎదగలేకపోయినా, ఎంతో ధైర్యంతో ఈ వైకల్యాన్ని అధిగమించింది జ్యోతి. రెగ్యులర్‌గా స్కూల్‌కు వెళ్లింది. బాగా చదువుకొంది. జ్యోతికి అనువుగా ఉండడం కోసం, స్కూల్లో ప్రత్యేక బెంచ్‌ను కూడా ఏర్పాటు చేశారు.
ప్రపంచంలోనే స్మాలెస్ట్ ఉమెన్‌గా రికార్డు సాధించడం ఎంతో ఆనందంగా ఉందని జ్యోతి చెబుతోంది. ఇంతకాలం ఆమెను తలచుకుని బాధపడ్డ, తల్లిదండ్రులు కూడా ఇప్పుడెంతో కుషీగా ఉన్నారు. జ్యోతి త్వరలోనే రెండు బాలీవుడ్ సినిమాల్లోనూ కనిపించనుంది.

కాంగ్రెస్ పై అలిగిన చిరంజీవి..

2011-12-04T02:31:00.001+05:30

అవిశ్వాసం సమయంలో కాంగ్రెస్‌లో అలజడి సృష్టిస్తున్నారు పీఆర్పీ ఎమ్మెల్యేలు. తమకు కాంగ్రెస్‌లో సరైన స్థానం లభించడం లేదని అలిగారు. తీర్మానం సభలో చర్చకు వచ్చే సమయం దగ్గర పడుతున్న సమయంలో.. తమ వ్యూహాలకు పదును పెడుతున్నారు. కాంగ్రెస్‌లో విలీనం అయినప్పటికీ, తమను ఇంకా వేరుగానే చూస్తున్నారన్న భావనలో ఉన్న పీఆర్పీ ఎమ్మెల్యేలు.. అవిశ్వాసాన్నే అస్త్రంగా మలుచుకోవాలనుకుంటున్నారు. సభలో ఓటింగ్ ఎలా వేయాలన్నదానిపై చిరంజీవితో సమావేశమై చర్చలు జరిపారు. కాంగ్రెస్ సర్కార్‌కు వ్యతిరేకంగా ఓటేద్దామంటూ కొంతమంది ప్రస్తావించినట్లు సమాచారం.. పరిస్థితి తీవ్రతను గమనించిన కాంగ్రెస్ పార్టీ, పీఆర్పీనేతలను కలుపుకొని వెళ్లవడానికి ప్రయత్నాలు మొదలుపెట్టింది. పీసీసీ అధ్యక్షుడు బొత్స సత్యనారాయణ చిరంజీవి నివాసానికి వెళ్లి, ఎమ్మెల్యేలతో చర్చలు జరిపారు. కాంగ్రెస్ పార్టీలో పీఆర్పీ ఎమ్మెల్యేలకు అన్యాయం జరుగుతోందని ఒప్పుకున్న బొత్స.. త్వరలోనే సమస్యను పరిష్కరిస్తానని హామీ ఇచ్చారు. అవిశ్వాసం సమయంలో ప్రభుత్వానికి అండగా ఉండాలని కోరారు. కాంగ్రెస్ పార్టీలో విలీనం అయినప్పటికీ, ఈ అసెంబ్లీ సమావేశాల్లో పీఆర్పీగానే కొనసాగుతుండడంతో, అవిశ్వాసంపై విప్ జారీ చేయకూడదనే చిరంజీవి భావిస్తున్నారు. అదే జరిగితే, పీఆర్పీ ఓట్లన్నీ, కాంగ్రెస్‌కు పడకపోవచ్చు. అటు జగన్ వర్గం, ఇటు పీఆర్పీ ఓట్లు వ్యతిరేకంగా పడితే మాత్రం.. ప్రభుత్వం అవిశ్వాస గండాన్ని దాటడం కష్టమే..

హాట్‌బాంబ్‌కు హాట్ వార్నింగ్

2011-12-04T02:29:00.001+05:30

పాకిస్తాన్ హాట్‌బాంబ్ వీణా మాలిక్‌ మరో వివాదంలో చిక్కుకుంది. ఓ మ్యాగజైన్‌కు న్యూడ్ ఫోజులు ఇచ్చి.. కావల్సినంత ప్రచారం పొందడమే కాదు.. అంతకన్నా ఎక్కువే విమర్శల పాలవుతోంది. పాకిస్తాన్ ప్రభుత్వం అయితే.. దేశం పరువు తీసిందంటూ ఆగ్రహంగా ఉంది. హాట్‌ హీరోయిన్ వీణామాలిక్.. FHM అనే మ్యాగజైన్ కవర్‌ పేజ్‌పై నగ్నంగా దర్శనమిచ్చింది. ఈ ఫోటోలను చూసి పాకిస్తాన్‌ వాసులు.. వీణామాలిక్‌పై భగ్గుమంటున్నారు. పాక్ హోం శాఖ మంత్రైతే.. వీణా మాలిక్‌పై కఠిన చర్యలు తీసుకుంటామని తీవ్రస్వరంతో హెచ్చరించారు. ఫోటోలపై వివాదం చెలరేగడంతో వీణ స్పందించింది. తాను నగ్నంగా ఫోటోలను దిగలేదంది. ఆ ఫోటోలు మార్ఫింగ్ చేశారని, మ్యాగజైన్ నిర్వాహకులపై న్యాయపరమైన చర్యలు తీసుకుంటానని హెచ్చరించింది. అయితే, మ్యాగజైన్ ఎడిటర్ మాత్రం.. అవి వీణామాలిక్ అసలైన ఫోటోలే అని ప్రకటించారు. దానికి సంబంధించిన ఆధారాలు కూడా తన దగ్గర ఉన్నాయన్నారు. వీణా మాలిక్ ఫోటోలు ప్రపంచవ్యాప్తంగా హాట్ టాపిక్‌గా మారాయి. కొంతమంది ఆమెకు మద్దతు పలికితే, మరికొందరు మాత్రం ఆమె తెగింపును విమర్శిస్తున్నారు.

ఐస్ కూతురికి ఐదు కోట్ల డిమాండ్..

2011-12-02T11:17:00.002+05:30

అందాలతార ఐశ్వర్యారాయ్ కూతురు ఫోటోల కోసం క్రేజ్ మొదలయ్యింది. ఐస్ ఎవరిని కంటారని ఇంతకాలం ఎదురుచూసిన ప్రపంచం.. ఇప్పుడు ఐస్ కూతురు ఎలా ఉంటుందో చూడాలనుకొంటోంది. అయితే, బచ్చన్ లు మాత్రం ఇంతవరకూ తమ వారసురాలి ఫోటోలను విడుదల చేయలేదు. ఆస్పత్రినుంచి డిశ్చార్జ్ అయిన సమయంలోనూ.. ఎవరికీ పాప కనిపించకుండా జాగ్రత్త పడ్డారు. అయితే.. ఇప్పుడు ఆ అమ్మాయి ఫోటోల కోసం కొన్ని మ్యాగజైన్లు బచ్చన్ కుటుంబాన్ని సంప్రదిస్తున్నాయని పత్రికల్లో కథనాలు వెలువడుతున్నాయి. ఓ ఇంటర్నేషనల్ మ్యాగజైన్ అయితే, ఏకంగా ఐస్ కూతురి ఫస్ట్ ఫోటోల కోసం ఐదుకోట్లు ఇవ్వడానికి సిద్ధపడిందట. అయితే.. ఇవన్నీ వట్టి పుకార్లేనని అమితాబ్ బచ్చన్ ప్రకటించారు. తమ వ్యక్తిగత విషయాలతో వ్యాపారం చేయమని తేల్చి చెప్పారు. అభి-ఐస్ ల వివాహ సమయంలోనూ ఇలాంటి వదంతులే పుట్టించారని, కానీ తామెవరికీ హక్కులు అమ్ముకోలేదని చెప్పారు.

అమెరికాపై పాక్ యుద్ధం..?

2011-12-02T11:07:00.001+05:30

ఇటీవల నాటో దళాలు జరిపిన దాడులతో, ఆగ్రహంతో ఉన్న పాకిస్తాన్ ఓ సంచలన నిర్ణయం తీసుకొంది. నాటో దళాలు దాడులు జరిపితే.. తిరగబడాలని, వారితో యుద్ధం చేయాలని ఆదేశించింది. ఈ మేరకు పాకిస్థాన్ సైన్యాధ్యక్షుడు జనరల్ పర్వేజ్ కియానీ ఆదేశాలు జారీ చేశారు. ఈ తరహా దాడులకు ఏ స్థాయి నుంచీ క్లియరెన్స్ అవసరం లేదని, వెంటనే తిరగబడాలని సైనికులను ఉద్దేశించి ప్రకటించాయి. ఆప్ఘనిస్తాన్ కేంద్రంగా తాలిబన్లను ఎదుర్కొంటున్న నాటో దళాలు, చాలాకాలంగా ఆప్ఘన్-పాక్ సరిహద్దుల్లో విధ్వంసాన్ని సృష్టిస్తున్నాయి. బాంబుల వర్షం కురిపిస్తున్నాయి. ఇంతకాలం పాకిస్తాన్ ఈ విషయంలో మౌనంగానే ఉన్నప్పటికీ, తాజాగా నాటో దాడిలో 24 మంది పాకిస్తాన్ సైనికులు చనిపోవడంతో, మనసు మార్చుకుంది. చూస్తూ ఊరుకుంటే, దేశంపైనే అమెరికా దాడికి సిద్ధమవుతుందనుకుంటున్న పాక్.. దానికి తగిన రీతిలోనే జవాబు చెప్పాలనుకొంటోంది. పాక్ సైనికులపై దాడికి అమెరికా క్షమాపణ చెప్పననడంతో, ఎదురుదాడికి సిద్ధమయ్యింది పాకిస్తాన్. మరి, నాటో దళాలు వెనక్కి తగ్గుతాయా.. లేదంటే, పాకిస్తాన్ ను కూడా మరో ఆప్ఘనిస్తాన్ గా మార్చేస్తాయా..?

చరణ్ ను పట్టుకొచ్చిన పవన్.. ఎక్స్ క్లూజివ్ ఫోటోలు

2011-12-01T23:21:00.002+05:30

రామ్ చరణ్ నిశ్చితార్థ వేడుక.. చిరు ఫ్యామిలీలో వివాదాలు తొలిగిపోయేలా చేసింది. కొత్త పెళ్లి కొడుకు రామ్ చరణ్ ను పవన్ కళ్యాణ్ స్వయంగా ట్రీఫామ్ హౌస్ కు తీసుకొచ్చారు. పవన్ డ్రైవ్ చేస్తుంటే, ఆయన పక్కనే చరణ్ కూర్చుని నిశ్చితార్థానికి తరలివచ్చాడు. చిరంజీవి ఫ్యామిలీ మరో కారులో వేదిక వద్దకు చేరుకుంది.

పంజా ఆడియో ఫంక్షన్ కు ఎవరూ రాకపోవడం, పవన్ వివాదాస్పద వ్యాఖ్యలు చేయడంతో, చిరు కుటుంబంలో చీలికలు వచ్చాయని పుకార్లు చెలరేగాయి. రామ్ చరణ్ నిశ్చితార్థానికి పవన్ కళ్యాణ్ హాజరవుతారా లేదా అన్నదీ ఆసక్తికరంగా మారింది. ఈ నేపథ్యంలో పవనే స్వయంగా చరణ్ ను కారులో ఎక్కించుకుని రావడంతో వివాదాలకు తెరపడినట్లయ్యింది. నిశ్చితార్థానికి రావడం కోసం మెర్సిడజ్ సీ55ను ప్రత్యేకంగా కొనుగోలు చేశారు.

ప్రపంచంలోనే తొలి సెక్స్ స్కూల్ ప్రారంభం

2011-12-01T22:50:00.001+05:30

స్కూళ్ల జాబితాలో మరో కొత్త స్కూల్ చేరింది. అదే సెక్స్ స్కూల్. ఇందులో సెక్స్ పాఠాలు మాత్రమే చెబుతారు. ప్రపంచంలోనే మొట్టమొదటిగా భావిస్తున్న...ఆస్ట్రియన్ ఇంటర్నేషనల్ స్కూల్.. ఆ దేశ రాజధాని వియన్నాలో ప్రారంభమయ్యింది. ఎల్వా మారియా థాంప్సన్ అనే మహిళ దీన్ని ప్రారంభించింది. సెక్స్ ఎలా చేయాలనే దానిపై అద్భుతమైన తర్ఫీదును ఇందులో ఇస్తారట. 16 ఏళ్ల పైబడిన వారెవరైనా ఈ స్కూల్లో చేరవచ్చు. కేవలం థియరీ క్లాసులు మాత్రమే కాదని.. ప్రాక్టికల్స్ కే ఎక్కువ ప్రాధాన్యం ఇస్తామని మారియా చెబుతున్నారు. స్టూడెంట్స్ హోంవర్క్ చేసుకోవడానికి ప్రత్యేకంగా కో-ఎడ్ డార్మిటరీని ఏర్పాటు చేశారు. కోర్సు విజయవంతంగా పూర్తి చేసుకున్నవారికి.. సర్టిఫికెట్ కూడా ఇస్తారట.

మావోయిస్టుల వెనుక అదృశ్యశక్తి?

2011-11-29T09:14:00.001+05:30

ఒక్కో అగ్రనేత అశువులు బాస్తున్నాడు. పోలీసుల చేతికి చిక్కి ప్రాణాలు కోల్పోతున్నాడు. మొన్న ఆజాద్.. నిన్న కిషన్ జీ.. రేపు.. మరో నేత.. ఎన్ కౌంటర్లు ఆగే సంకేతాలే లేవు. మావోయిస్టు పార్టీలోని కీలక వ్యక్తులను ఒక్కొక్కరినే తెలివిగా మట్టుబెడుతూ, ఎర్రసామ్రాజ్యంలోకి చొచ్చుకుపోతున్నాయి భద్రతాబలగాలు. కానీ, ఎంతమంది పెద్ద నేతలను మరణిస్తున్నా, మావోయిస్టుల కార్యకలాపాలు మాత్రం ఆగడం లేదు. పైపెచ్చు.. మరింత చురుగ్గా సాగుతున్నాయి. దీనికి కారణం ఏమిటి..? ఇంతవరకూ అందరికీ తెలిసినట్లు, భద్రతా బలగాలు అనుమానిస్తున్నట్లు.. గణపతి నేతృత్వంలో మాత్రమే మావోయిస్టులు కార్యకలాపాలు సాగడం లేదు. మరో నాయకత్వం వీరిని నడిపిస్తున్నట్లు తెలుస్తోంది. చివరకు గణపతికి కూడా ఆదేశాలు జారీ చేసే శక్తి తెరవెనుక ఉన్నట్లు సమాచారం. సీఆర్పీఎఫ్ బలగాలకు చిక్కిన సవ్యసాచి పాండే ల్యాప్ టాప్ ను డీకోడ్ చేసిన భద్రతా బలగాలు.. అందులో దీనికి సంబంధించిన వివరాలు చూసి అవాక్కయ్యారు. అందరికీ తెలిసిన నాయకత్వం కాక, మరో నాయకత్వం మావోయిస్టులను నడిపిస్తోందన్న నిర్ధారణకు వచ్చారు. అయితే.. ఆ శక్తి, ఆ నాయకత్వం ఎవరన్నదే ఇప్పటివరకూ పోలీసులకు అంతుబట్టలేదు.. ? అది స్వదేశీ శక్తా.. లేక విదేశీ శక్తా..? ఇదే ఇప్పుడు తేలాలి.

ఒకే దెబ్బకు 61 పిట్టలు

2011-11-29T09:07:00.001+05:30

స్పీకర్ తీసుకున్న నిర్ణయానికి ఒకే సారి 61 మంది ఎమ్మెల్యేలకు షాక్(?) తగిలింది. మూకుమ్మడిగా చేసిన రాజీనామాలను అంగీకరించేది లేదంటూ, తెలుగుదేశం తెలంగాణ ప్రాంత ఎమ్మెల్యేలు, టీఆర్ఎస్ ఎమ్మెల్యేలు చేసిన రాజీనామాలను స్పీకర్ నాందెడ్ల మనోహర్ తిరస్కరించారు. ఇక పార్టీలు మారిన వారి రాజీనామాలను మాత్రం ఆమోదించారు. అనర్హత వివాదంలో ఉన్నవారి రాజీనామాలను మాత్రం పెండింగ్ లో ఉంచారు. ఈ లెక్కన చూస్తే, జగన్ కు మద్దతుగా రాజీనామాలు చేసిన వారంతా ఇప్పుడు ఊపిరి పీల్చుకోవచ్చు. ఆవేశంలో రాజీనామాలు చేసిన వారంతా, కొంతకాలంగా కాంగ్రెస్కు చేరువవుతున్నారు. జగన్ వైపు ఉంటూనే, కిరణ్ సర్కార్కు మద్దతిస్తామంటున్నారు. పైగా, టీడీపీ అవిశ్వాసానికి సిద్ధమవుతున్న తరుణంలో వీరిని వదులుకోవడం ఇష్టం లేకనే రాజీనామాలను తిరస్కరించినట్లు తెలుస్తోంది. రాజీనామాలు ఆమోదం పొందినవారిలో జూపల్లి కృష్ణారావు, గంపాగోవర్ధన్, జోగురామన్న, రాజయ్యలు ఉన్నారు. ఈ రాజీనామాల తిరస్కరణతో.. మరో రాజకీయ రగడకు తెరలేపినట్లయ్యింది. ఇవాళ్టినుంచి టీఆర్ఎస్,టీటీడీపీ నేతలు ఎంత హడావిడి చేస్తారో చూడాల్సిందే..

చిరంజీవి ఫ్యామిలీలో విభేదాలు లేవంట

2011-11-23T17:36:00.001+05:30

పంజా ఆడియో ఫంక్షన్‌లో పవన్ కళ్యాణ్ వ్యాఖ్యలతో చిరంజీవి ఫ్యామిలీ విబేధాలంటూ వెలువడ్డ వ్యాఖ్యలకు తెరదించే పని చేసే ప్రయత్నం చేశారు హీరో అల్లు అర్జున్. పవన్ కళ్యాణ్ ఒంటరివాడు కాదని, అంతా కలిసే ఉన్నామని తెలిపారు. మీడియాలో వచ్చిన వార్తలు తనకు ఎంతో బాధకలిగించాయని, ఒక్క ఆడియో ఫంక్షన్‌కు రానంత మాత్రాన ఇంత గొడవ చేయడం సరికాదని బన్నీ అభిప్రాయపడ్డాడు. తమ ఫ్యామిలీలో నలుగురం హీరోలం ఉన్నామని.. ఏడాదికి రెండు చొప్పున ఎనిమిది ఫంక్షన్లు చేస్తామని, ఒక్కదానికి రానంత మాత్రాన పుకార్లు పుట్టించడం సరికాదన్నారు. చరణ్ ఊర్లో లేడని, తాను షూటింగ్ నుంచి వచ్చేసరికి ఆలస్యం అయ్యిందని అందుకే పంజా ఆడియో ఫంక్షన్‌కు వెళ్లలేకపోయానని వివరించారు. మా ఫ్యామిలీని ఎవరూ విడదీయలేరని కూడా బన్నీ చెప్పాడు. నిజమేనా..?పీఆర్పీ - కాంగ్రెస్ విలీనం ప్రతిపాదన దగ్గరనంచి చిరంజీవికి,పవన్ కళ్యాణ్‌కు మధ్య విబేధాలు పెరిగిపోయాయి. ఇద్దరూ బహిరంగంగా ఎక్కడా కలిసి కనిపించడం లేదు. యువరాజ్యం అధ్యక్షుడుగా ... ఎన్నికల ప్రచారంలో కాంగ్రెస్‌ను నానాతిట్లూ తిట్టిన పవన్‌కు, కాంగ్రెస్‌తో కలవడం ఏమాత్రం ఇష్టం లేదు. కానీ, చిరంజీవి మాత్రం పవన్ కళ్యాణ్ అభిప్రాయాన్ని పట్టించుకోకుండా, రాజకీయ భవిష్యత్తు కోసం కాంగ్రెస్‌లో పార్టీని విలీనం చేసేశారు. దీంతో ఇద్దరిమధ్యా దూరం పెరిగింది. దీనికి తగ్గట్లే, పులి, తీన్ మార్ , పంజా ఆడియో ఫంక్షన్లకు చిరంజీవి హాజరు కాలేదు. ఈ మధ్య చిన్నా చితకా ఆడియో ఫంక్షన్లకు, డబ్బింగ్ సినిమాల ఫంక్షన్లకూ వెళుతున్న చిరంజీవి, సొంత తమ్ముడు ఆడియో ఫంక్షన్‌కు రాకపోవడం విచిత్రమే. తీన్ మార్ ఫంక్షన్లో కనీసం అల్లు అరవింద్, నాగబాబులైనా కనిపించారు.. ఈ సారి వాళ్లూ రాలేదు.. కనీసం రామ్ చరణ్, అల్లు అర్జున్‌లూ రాకపోయే సరికి (చరణ్ ఆ సమయంలో చైనాలో ఉన్నాడట) పవన్‌కు ఒళ్లు మండినట్లుంది. అందుకే... తనకు వారసత్వ అభిమానం వద్దంటూ స్టేజ్ పైనే కుండబద్దలు కొట్టి చెప్పాడు..ఆరోజు పవన్ చెప్పిన డైలాగ్స్‌..." వారసత్వంగా నాకు ఇది అవసరం లేదు. వారసత్వంగా నాకు అర్హత లేదు. కష్టపడి మీ అభిమానాన్ని నేను సంపాదించుకున్నాను. వారసత్వంగా సంపాదించుకోవడం లేదు. దానికోసం నేను ఎలాంటి ప్రయత్నం చేయలేదు.."

రాముడి రావణుడిగా నాగార్జున

2011-11-22T16:35:00.001+05:30

రాముడి అపర భక్తుడైన శ్రీరామదాసుగా నటించి మెప్పించిన అక్కినేని నాగార్జున త్వరలోనే రావణుడి అవతారం ఎత్తబోతున్నారు. అదీ.. రామ్ గోపాల్ వర్మ తీయబోయే రామాయణం సినిమాలో. ఈ విషయాన్ని స్వయంగా వర్మే తన ట్విట్టర్ లో పోస్ట్ చేశారు. మిగిలిన నటీనటుల వివరాలన్నీ త్వరలోనే తెలియజేస్తానన్నారు. రామాయణ కథనే నేటి నేటివిటీకి తగ్గట్లుగా సినిమా తీయాలనుకుంటున్న రామ్ గోపాల్ వర్మ... రామాయణం తీస్తున్నట్లు కొన్ని రోజుల క్రితమే ప్రకటించారు. అందులో అయోధ్య గ్రూప్ ఆఫ్ కంపెనీస్ కు అధిపతి దశరథుడు. అతని మొదటి భార్య కౌసల్య. రెండో భార్య కైకేయి. కౌసల్య కొడుకు రామ్ శంకర్. కైకేయి కొడుకు భరత్ కుమార్. తన ఆస్తికి వారసుడు భరత్ కుమారేనని ఓ సందర్భంలో కైకేయికి మాట ఇస్తాడు దశరథుడు. ఆ నేపథ్యంలో రామ్ శంకర్ ను తన కంపెనీల్లో ఓ సిక్ యూనిట్ కు పంపిస్తాడు. ఇదీ కథ. అయితే.. ఇందులో లంక కూడా ఉంటుంది. అదే లంకా గ్రూప్ ఆఫ్ కంపెనీస్. దీని యజమానే రావణుడు. అదే ఇప్పుడు నాగార్జున చేయబోయే పాత్ర. ఈయనకో చెల్లెలు ఉంటుంది. ఆమే శూర్పణక. ఓ సందర్భంలో రాముడిని చూసి మోజు పడి పరాభవం పాలవుతుంది. అయోధ్య గ్రూప్ కు, లంకా గ్రూప్ మధ్య వ్యాపారపరమైన పోటీ ఉంటుంది. ఈ రెండు కంపెనీల మధ్య జరిగే సంఘర్షణలోంచే రామాయణం సినిమా పుట్టిందంటున్నాడు రామ్ గోపాల్ వర్మ. ప్రతినాయక ఛాయలున్న లంకా గ్రూప్ ఛైర్మన్ పాత్రకు నాగార్జునను ఎంచుకున్నాడు. నాగార్జున దీనికి ఒప్పుకున్నాడా లేదా అన్నది ఇంతవరకూ తెలియలేదు. కానీ, నాగ్ నటిస్తున్నాడని వర్మే స్వయంగా ప్రకటించాడు. ఈ విలన్ క్యారెక్టర్ ను నాగ్ ఎందుకు ఎంచుకున్నాడన్నది అర్థంకాని ప్రశ్న. అయితే.. దానవీర శూరకర్ణలో ఎన్టీఆర్ పోషించిన ధుర్యోధనుడి పాత్ర రేంజ్ లో రావణ్ పాత్ర ఉందని నమ్మబలుకుతున్నాడు వర్మ. సినిమా మొదలుపెట్టడానికి ముందే కోతలు కోయడంలో వర్మను మించినోడు లేడన్న సంగతి అందరికీ తెలిసిందే. మరి నాగ్ పోషించబోయే పాత్ర ధుర్యోధనుడికి దీటుగా నిలబడుతుందా లేక అట్టర్ ప్లాప్ అయ్యి నాగ్ ఇమేజ్ ను దెబ్బతీస్తుందా..? వేచి చూడాల్సిందే.

రాముడయ్యాడు.. రావణబ్రహ్మ మిగిలాడు

2011-11-19T23:23:00.001+05:30

శ్రీరామరాజ్యంలో పోషించిన రాముడు పాత్ర తనకెంతో సంతృప్తినిచ్చిందని బాలకృష్ణ తెలిపారు. సినిమా కూడా ఘనవిజయం సాధించడం ఆనందంగా ఉందన్నారు. పౌరాణిక పాత్రల్లో మరింతగా నటించాలని ఉందని, నిర్మాతలు ముందుకు వస్తే నటిస్తానని చెప్పారు. అయితే, అందుకు ఎవరినీ బలవంతపెట్టనని కూడా చెప్పారు. రాజమండ్రిలో మెగా హెల్త్ క్యాంప్ ను సందర్శించిన బాలయ్య ఈ వ్యాఖ్యలు చేశారు. రావణ బ్రహ్మ పాత్ర గురించి జర్నలిస్టులు అడగ్గా.. తప్పకుండా చేస్తానని ప్రకటించారు.

ఇది వర్మ రామాయణం

2011-11-19T21:37:00.001+05:30

రామ్ గోపాల్ వర్మ.. సినీ ఇండస్ట్రీలో విలక్షణంగా ఆలోచించే డైరెక్టర్. స్టోరీ కన్నా, ప్రచారంతోనే సగం బిజినెస్ చేసుకునే టైప్. సిచ్యువేషన్‌కు తగ్గ సినిమాలు తీయడంలో ఆయనది ప్రత్యేకమైన స్టైల్. బెజవాడకు చెందిన ఓ లీడర్‌ చనిపోగానే.. బెజవాడ రౌడీలంటూ సినిమా మొదలుపెట్టేసిన ఘనత వర్మది. అలాంటి రామ్‌గోపాల్ వర్మ ఇప్పుడు రామాయణంపై కన్నేశారు. రామాయణాన్ని ఇతివృత్తంగా తీసుకొని, ఆ స్టోరీని ప్రస్తుత పరిస్థితులకు ఆపాదించి.. సినిమా తీయాలనుకుంటున్నారు. దానికి పేరు కూడా రామాయణం అనే పెట్టారు. త్వరలోనే సినిమా తీస్తానంటూ మీడియాకు ప్రకటన విడుదల చేశారు. స్టోరీని కూడా ముందే ప్రకటించారు వర్మ. అయోధ్య గ్రూప్ ఆఫ్ కంపెనీస్.. లంక గ్రూప్ ఆఫ్ కంపెనీస్ మధ్య జరిగే ఆధిపత్య పోరాటం అన్నారు. సినిమాలో క్యారెక్టర్ల పేర్లను కూడా రామాయణం నుంచే తీసుకున్నారు. వర్మ తీసే మోడ్రన్ రామాయణంలో రాముడిపేరు రామ్ శంకర్. కైకేయి పేరు కైకేయి అగర్వాల్.. భరతుడి పేరు భరత్ కుమార్. బాపు-బాలకృష్ణల శ్రీరామరాజ్యం సక్సెస్‌ ఫుల్‌గా నడుస్తున్న సమయంలో ఆ క్రేజ్‌ను క్యాష్ చేసుకోవాలనుకుంటున్నారు వర్మ. మరి వర్మ ప్లాన్ సక్సెస్ అవతుందా.. వర్మ రామాయణం సక్సెస్ అవుతుందా..? ఇదే ఇప్పుడు తేలాలి..

ఐశ్వర్యది సాధారణ కాన్పట.. నిజంగా గ్రేట్

2011-11-18T21:53:00.001+05:30

ఐశ్వర్యారాయ్ అందమైన అమ్మాయికి జన్మనిచ్చిందన్న సంగతి అందరికీ తెలిసిందే. అయితే, సాధారణ కాన్పులో ఈ అమ్మాయి జన్మించడం నిజంగా అద్భుతమైన విషయం. చిన్న మధ్యతరగతి వాళ్లే ఈమధ్య సిజేరియన్ డెలివరీకే ప్రాధాన్యం ఇస్తున్నారు. సాధారణ కాన్పంటే వింతగా చూడాల్సిన పరిస్థితి ప్రస్తుతం నెలకొని ఉంది. ఈ సమయంలో బాలీవుడ్ స్టార్ అయి ఉండీ, ఐశ్వర్య సాధారణ కాన్పులో బిడ్డకు జన్మనివ్వడం ఎంతోమందికి ఆదర్శం కానుంది. అంతేకాదు.. ఐశ్వర్యకు ఇప్పుడు 38 సంవత్సరాలు. లేటు వయస్సులో గర్భం దాల్చడం, ప్రసవించడం కష్టమైన పనే. ఈ వయస్సులో డెలివరీలన్నీ వీలైనంతవరకూ సిజేరియన్ పద్దతిలోనే చేస్తారు. కానీ, ఐశ్వర్య మాత్రం పురిటినొప్పులు పడడానికే నిశ్చయించుకొంది. అందమైన బిడ్డను ప్రసవించింది. ఐశ్వర్య తీసుకున్న నిర్ణయం ఎంతోమందిపై ప్రభావం చూపిస్తుందని వైద్యరంగ నిపుణులు అభిప్రాయపడుతున్నారు. సిజేరియన్ డెలివరీ కన్నా సాధారణ కాన్పులో పుట్టిన బిడ్డలో రోగనిరోధకశక్తి ఎక్కువగా ఉంటుందని, కాలేయం పూర్తిస్థాయిలో ఎదుగుతుందని చెబుతున్నారు. ఏమైనా.. ఐశ్వర్య నిజంగా గ్రేట్.

జగన్ కు జయసుధ జెల్లకాయ

2011-11-18T20:55:00.001+05:30

జగన్ నెత్తిన జయసుధ జెల్లకాయిచ్చింది. ఓ వైపు సీబీఐ దర్యాప్తు.. ఈడీ విచారణతో తెగ టెన్షన్ పడుతున్న జగన్, ఊహించని రీతిలో జయసుధ కాంగ్రెస్ లోకి జంప్ అయ్యింది. ఇంతకాలం జగన్ వెంటే అంటూ రాజీనామా లేఖను కూడా సమర్పించిన జయమ్మ.. వాటి ఆమోద సమయం వచ్చేసరికి రూట్ మార్చేసింది. గోడ మీద పిల్లిలా.. కిరణ్ కుమార్ రెడ్డివైపు దూకేసింది. దీనికి నిదర్శనంగా ఈరోజు ముఖ్యమంత్రి కిరణ్‌కుమార్‌రెడ్డితో క్యాంపు కార్యాలయంలో ఆమె భేటీ అయ్యింది. కిరణ్‌కుమార్‌రెడ్డికి తన మద్దతు ఎప్పుడు ఉంటుందని మీడియాతో చెప్పిన జయసుధ.. సీఎంను పొగడ్తల్లో ముంచెత్తారు. ఆయన పనితీరు ఎంతో ప్రశంసనీయమన్నారు. రాజీవ్ యువకిరణాలు ఎంతోమంచి 0పథకమని, మంచి పేరు తెచ్చుకోవడం కోసం సీఎం నిరంతరం కృషి చేసే వ్యక్తి అని చెప్పారు. ఈ మాటలు విండే జగన్ గుండెలు ఏమైపోతాయో..? అసలే పశ్చిమగోదావరి ఎమ్మెల్యేలు ఆళ్లనాని, రాజేష్, బాలరాజులు సీఎం గ్రూప్ లో చేరిపోయిన సంగతే ఇంకా జీర్ణం కాలేదు. అంతలోనే జయసుధ ఝలక్. ఇంకెంతమంది అధికారపార్టీ వైపు జంప్ అవతారో చూడాలి.

మేడం ముందుకు మెగాస్టార్..

2011-11-16T05:47:00.001+05:30

మెగాస్టార్‌ చిరంజీవి ఢిల్లీ నుంచి పిలుపు వచ్చింది. కాంగ్రెస్ అధినేత్రి సోనియాతో ఆయన సమావేశం కానున్నారు. సాధారణ భేటీనే అని పార్టీ వర్గాలు చెబుతున్నా... చాలా విషయాలపై చర్చ జరిగే అవకాశం ఉన్నట్లు తెలుస్తోంది. ముఖ్యంగా చిరంజీవి మంత్రి పదవిపైనా చర్చ జరగొచ్చు.. ప్రజారాజ్యం పార్టీని కాంగ్రెస్‌ పార్టీలో విలీనం చేసి.. ఆ పార్టీ నేతగా మారిపోయిన చిరంజీవి... అధినేత్రి సోనియాతో సమావేశం కానున్నారు. వారం రోజుల క్రితం చిరంజీవి సోనియా అపాయింట్‌మెంట్‌ను కోరారు. దీనిపై స్పందించిన మేడం.. ఢిల్లీకి రావాలంటూ కబురుపంపారు. అనారోగ్యానికి గురైన సోనియాను పరామర్శించడానికే చిరంజీవి అపాయింట్‌మెంట్ కోరారని ఆయన సన్నిహితులు చెబుతున్నారు. మేడంను పరామర్శించడంతో పాటు.. సొంత విషయాలను కూడా చిరంజీవి ప్రస్తావించే అవకాశాలున్నాయి. పీఆర్పీని విలీనం చేసినప్పుడు ఇచ్చిన హామీని సోనియాకు చిరంజీవి గుర్తు చేయాలనుకుంటున్నారు. రాష్ట్ర కేబినెట్ విస్తరణలతో పీఆర్పీ ఎమ్మెల్యేలకు మంత్రి పదవులు, కేంద్ర కేబినెట్‌లో తనకూ మంత్రి పదవి ఇచ్చే విషయాన్ని ప్రస్తావించవచ్చు. ఇక తన కుమారుడు చరణ్ నిశ్చితార్థం, వివాహం సంగతులు కూడా సోనియాకు చిరంజీవి చెప్పనున్నారు. ఈ టూర్‌లోనైనా చిరంజీవి తమకు మంత్రిపదవులను తాయిలంగా తెస్తారన్న ఆశలో పీఆర్పీ ఎమ్మెల్యేలున్నారు. చిరంజీవి వారి ఆశలను నిలబెడతారా లేక.. మరికొంతకాలం ఆగమంటారా అన్నదే ఇప్పుడు కీలకం.

బాబు గూట్లో భయం..భయం

2011-11-16T05:46:00.001+05:30

టీడీపీలో సీబీఐ కలకలం.. పైకి గాంభీర్యం.. లోలోపల భయం భయం.. తెలుగుదేశం పార్టీ అధినేత చంద్రబాబు ఆస్తులపై CBI విచారణకు హైకోర్ట్ ఆదేశించడం ఆ పార్టీ నేతలకు మింగుడుపడడం లేదు. ఎలాంటి విచారణకైనా సిద్ధమంటూ పైకి చెబుతున్న చంద్రబాబు సైతం లోలోపల కంగారు పడుతున్నారు. దురుదేశపూర్వకంగా తన ఆస్తులపై పిటిషన్‌ను వేశారని ఆరోపిస్తున్నారు. CBI విచారణ విషయంలో టీడీపీ పరిస్థితి అడకత్తెరలో పోకచక్కగా మారిపోయింది. విచారణ వద్దంటే ఓ సమస్య.. విచారణ జరిగితే మరో సమస్య. దీన్ని ఎలా ఎదుర్కోవాలన్న అంశంపై పార్టీనేతలు ఓ నిర్ణయానికి రాలేకపోతున్నారు. న్యాయపరంగా ఎదుర్కోవాలా లేక రాజకీయంగా అనుకూలంగా మార్చుకోవాలా అన్న అంశంపై ఎటూ తేల్చుకోలేకపోతున్నారు. సుప్రీం కోర్టుకు వెళ్లే అంశాన్ని సీనియర్‌ నేతలతో పాటు న్యాయనిపుణలతోనే చంద్రబాబు చర్చించనున్నారు. పిటీషనర్లు కోర్టుకు తెలిపిన పలు అంశాల్లో ఇప్పటికే కొన్ని కోర్టు తీర్పులు బాబుకు సానుకూలంగా ఉండడంతో వాటిని కోర్టు ముందు ఉంచాలనే అభిప్రాయం కూడా వ్యక్తం అవుతోంది. అయినా విచారణకు తమకు ఎలాంటి అభ్యంతరం లేదంటున్నారు తెలుగుతమ్ముళ్లు. CBI విచారణ వ్యవహారంతో పార్టీకి ఎదురయ్యే ఇబ్బందులపై చంద్రబాబు దృష్టి పెట్టారు. దీన్ని రాజకీయం ఎలా ఎదుర్కోవాలన్న దానిపై నేతలతో చర్చించనున్నారు. రాజకీయ దురుద్దేశ్యంతోనే బాబుపై అవినీతి బురద జల్లుతున్నారని టీడీపీ ఆరోపిస్తోంది. పార్టీ నేతలతో ఇవాళ జరిగే సమావేశంలో.. సీబీఐ విచారణపై చంద్రబాబు తుదినిర్ణయానికి వచ్చే అవకాశం ఉంది.

టీఆర్‌ఎస్‌పై బాబు ప్రభావం

2011-11-16T05:44:00.001+05:30

అన్ని సమస్యలూ తెలంగాణ అంశంతోనే ముడిపడిఉన్నాయని తరచూ చెప్పే టీఆర్‌ఎస్.. వ్యూహాన్ని మార్చుకొంది. తెలంగాణ కోసం పోరాడుతూనే ప్రజాసమస్యలపైనా దృష్టి పెట్టాలని నిర్ణయించింది. అందులో భాగంగా తెలంగాణ జిల్లాల్లో నేటి నుంచి ఆరు రోజుల పాటు పాదయాత్ర చేపట్టింది. టీఆర్‌ఎస్ ఎమ్మెల్యేలు.. నేతలు ఈ పాదయాత్రలో పాల్గొంటారు. ప్రజలతో మమేకమై.. ఉద్యమంపై వారిని మరింత చైతన్యవంతం చేస్తామని టీఆర్‌ఎస్ నేతలు చెబుతున్నారు. ముఖ్యంగా తెలంగాణకు కాంగ్రెస్సే ప్రధాన అడ్డంకి అని ప్రచారాన్ని చేయనున్నారు.. తెలంగాణ అంశానికి మాత్రమే పరిమితం కాకుండా.. ప్రజాసమస్యలపైనా ఈ యాత్రలో దృష్టి పెట్టాలని టీఆర్‌ఎస్ నేతలు నిర్ణయించుకున్నారు. చంద్రబాబు రైతుపోరు బాట తెలంగాణలో సాగుతుండడంతో, రైతు సమస్యలపైనా తామూ ఉద్యమించాలని భావిస్తున్నారు. అయితే.. చంద్రబాబు యాత్రకూ.. తమ యాత్రకూ పోలిక లేదంటున్నారు టీఆర్‌ఎస్ నేతలు. ఆయన్ను చూసి చేయడం లేదంటున్నారు. ఉద్యమాన్ని మరింత బలోపేతం చేయడానికే పాదయాత్రలు చేస్తున్నామని ప్రకటించారు. తెలంగాణ ఉద్యమంతో ఇప్పటికే బలపడ్డ టీఆర్‌ఎస్.. ఈ పాదయాత్రతో కాంగ్రెస్, టీడీపీలపై పూర్తిస్థాయి ఆధిపత్యాన్ని సాధించాలని భావిస్తోంది.

తెలంగాణ తేల్చేస్తున్నారా..?

2011-11-16T05:41:00.001+05:30

తెలంగాణపై త్వరలోనే నిర్ణయం ప్రకిటించాలనుకొంటోంది కాంగ్రెస్ పార్టీ. దానికోసం వడివడిగా పావులు కదుపుతోంది. రాష్ట్రస్థాయిలో సంప్రదింపులు పూర్తి కావడంతో.. జాతీయ స్థాయి సంప్రదింపులపై దృష్టి పెట్టింది. రాష్ట్ర కాంగ్రెస్ వ్యవహారాల ఇంఛార్జ్ గులాంనబీ అజాద్ ఇంతకాలం చెప్పుకొచ్చినట్లుగానే.. యూపీఏ మిత్ర పక్షాలతో చర్చలు మొదలయ్యాయి. ఇవి పూర్తైన తర్వాతే.. తెలంగాణపై కాంగ్రెస్ పార్టీ ఓ నిర్ణయాన్ని ప్రకటించవచ్చు. సోమవారం భేటీ అయిన కాంగ్రెస్ కోర్ కమిటీ.. ఈ విషయంపై తీవ్రంగా చర్చించి.. ముందుకు వెళ్లాలనే నిర్ణయించుకొంది. దీనికి అనుగుణంగానే డీఎంకే నేత టీఆర్ బాలుతో ప్రణబ్ ముఖర్జీ సమావేశమై చర్చలు జరిపారు. తెలంగాణపై అభిప్రాయాలను తెలుసుకున్నారు.. ఒకటీ రెండు రోజుల్లో.. యూపీఏలో మరో కీలక భాగస్వామి ఎన్సీపీ అధినేత శరద్‌పవార్‌తో ప్రణబ్ చర్చలు జరిపే అవకాశాలున్నాయి...ఢిల్లీలో స్పీడ్ ఎందుకు పెరిగింది..?సంప్రదింపులు వేగంగా జరుగుతాయా..?తెలంగాణపై కాంగ్రెస్ నిర్ణయం త్వరలోనే వెలువడుతుందా..? తెలంగాణ అంశాన్ని ఇంతకాలం దాటవేసుకుంటూ వచ్చిన కాంగ్రెస్ హైకమాండ్.. ఇప్పుడు తొందరపడడానికి పార్లమెంట్ సమావేశాలే కారణంగా కనిపిస్తోంది. నవంబర్ 22 నుంచి డిసెంబర్ 21 వరకూ పార్లమెంట్ సమావేశాలు జరగనున్నాయి. తెలంగాణపై ముందడుగు వేయకుండా సమావేశాలకు వెళితే.. సొంతపార్టీ ఎంపీల నుంచే ఇబ్బందులు ఎదురయ్యే అవకాశం ఉంది. ప్రతిపక్షం కూడా ఇరుకునపెట్టొచ్చు. అందుకే, ఏదో ఒకటి జరుగుతుందన్న ఫీలింగ్.. నేతల్లోకి పంపిస్తే, పరిస్థితిని కంట్రోల్ చేయవచ్చని ఢిల్లీ పెద్దలు భావిస్తున్నారు. అందులో భాగంగానే సంప్రదింపులు మొదలుపెట్టారు. అయితే.. తెలంగాణపై ఏదో ఓ ప్రకటనను పార్లమెంట్ సమావేశాల్లోపు చేస్తారా.. అంటే.. ఆ సంకేతాలు మాత్రం ఇంతవరకూ కనిపించడం లేదు.

డీజీపీ ఆస్తులపై హైకోర్ట్ విచారణ

2011-11-15T05:46:00.001+05:30

రాష్ట్రంలోని సీనియర్ ఐపీఎస్ అధికారుల మధ్య కొనసాగుతున్న వివాదం మరో మలుపు తిరగనుంది. రాష్ట్ర డీజీపీ దినేశ్‌ కుమార్, భారీగా అక్రమాస్తులు కూడా బెట్టారని ఆరోపిస్తూ దాఖలైన పిటిషన్‌పై హైకోర్ట్ విచారణ జరపనుంది. విజిలెన్స్, ఎన్‌ఫోర్స్ మెంట్ విభాగంలో పనిచేసినప్పుడు దినేశ్‌కుమార్ అనేక అక్రమాలకు పాల్పడ్డారంటూ, సీనియర్ ఐపీఎస్ అధికారి ఉమేశ్‌కుమార్ ఈ పిటిషన్‌ను హైకోర్ట్‌లో దాఖలు చేశారు. ఆయన భార్య కమలారెడ్డి పేరిట భారీగా ఆస్తులున్నాయంటూ ఉమేశ్‌కుమార్ ఆరోపిస్తున్నారు. దీనిపై సమగ్రమైన విచారణ జరపాలని కోర్టును ఆశ్రయించారు. ఈ పిటిషన్‌పై స్పందించిన హైకోర్ట్.. కేసును విచారణకు స్వీకరించింది. డీజీపీ ఆస్తులకు సంబంధించిన వివరాలను అందివాలని ప్రభుత్వాన్ని ఆదేశించింది. కోర్టు ఆదేశాల ప్రకారం, ఇవాళ డీజీపీ.. తన పేరిట, తన కుటుంబ సభ్యుల పేరిట ఉన్న ఆస్తులను వెల్లడించాల్సి ఉంది. విజిలెన్స్, ఎన్‌ఫోర్స్‌ మెంట్ డైరెక్టర్ జనరల్‌గా ఉన్న సమయంలో.. తనపేరిట, తన భార్య పేరిట ఎలాంటి ఆస్తులు లేవని ప్రభుత్వానికి అధికారికంగా తెలియజేసినట్లు సమాచారం. అయితే, డీజీపీ భార్య కమలారెడ్డి భార్య పేరిట జరిగినట్లుగా భావిస్తున్న కొన్ని వివరాలను ఉమేశ్‌కుమార్ కోర్టుకు సమర్పించారు. ఈ నేపథ్యంలో డీజీపీ ఏ వివరాలను కోర్టుముందు ఉంచుతారన్నది ఆసక్తికరంగా మారింది.

శని రూటు మార్చాడు..!

2011-11-15T05:45:00.001+05:30

నేటి నుంచి కాల చక్రం దిశ మారింది. 30 ఏళ్లకు ఓసారి వచ్చే తులాయనం ప్రారంభమైంది. శని తులారాశిలోకి ప్రవేశించింది. మందగమనుడిగా పేరొందిన శని గ్రహం బలపడిందని..దీని వల్ల రాష్ట్రం, దేశంలోనే కాక ప్రపంచ వ్యాప్తంగా అనేక పరిణామాలు చోటు చేసుకుంటాయని బెజవాడలోని జ్యోతిష్య నిపుణులు చెబుతున్నారు. శనిగ్రహం ఉచ్ఛస్థితికి చేరడంతో ప్రతికూల ప్రభావాలు కలిగే అవకాశం ఉందంటున్నారు జ్యోతిష్యులు. కాలచక్రం మారడంతో తుల, వృశ్చిక రాశుల వారికి ఏలినాటి శని ప్రారంభమవుతుంది. కర్కాటక, మీన రాశులకు అష్టమ, అర్ధాష్టమ శని ప్రారంభమవుతోంది. దీని వల్ల రానున్న ఏడాది కాలంలో ప్రపంచ వ్యాప్తంగా అనేక ఉపద్రవాలు, దుస్సంఘటనలు జరిగే అవకాశం ఉంది. పొలిటికల్‌ లీడర్లు, సినిమా, క్రికెట్‌ సెలబ్రెటీలకు గండం తప్పదంటున్నారు పండితులు. శని రాశి మారడం వల్ల స్త్రీలకు కష్టాలు.. పిల్లలకు బాలారిష్టాలు అధికమవుతాయి. శని ప్రభావం తప్పించుకునేందుకు.. శనీశ్వర ఆలయాల్లో త్రయోన్నిక గ్రహశాంతి హోమాలను నిర్వహిస్తున్నారు. తాజా పరిణాలతో.. సింహ, వృషభ, ధను రాశుల వారికి శని పీడ నుంచి విముక్తి లభించినట్లేనంటున్నారు జ్యోతిష్యులు. అయితే మిగతా రాశులు మాత్రం శని ప్రభావం నుంచి తప్పించుకోలేవంటున్నారు.

మాంసం తింటే మటాష్..!

2011-11-15T02:25:00.001+05:30

మాంసం తింటున్నారా... అయితే మీరు ఖచ్చితంగా మధుమేహం భారిన పడకతప్పదు... ఇది లండన్‌లోని ఓ యూనివర్సిటీ నిపుణులు చేస్తున్న హెచ్చరిక. కేవలం వార్నింగ్ ఇవ్వడమే కాదు.. డయాబెటీస్‌ను దూరంగా ఉంచాలంటే ఏం చేయాలో కూడా సూచిస్తున్నారు. ఆ సలహా ఏమిటంటే.. చేపలు తినాలని.మాంసం బదులు.. చేపలు.. చేప తింటే చక్కెర వ్యాధికి చెక్ చెప్పినట్లే. రోజూ ఫిష్ తినేవారికి షుగర్ వ్యాధి రానే రాదట. రోజూ చేపలు తినడం వల్ల డయాబెటీస్‌ను దూరంగా ఉంచవచ్చని... లండన్‌లోని వలెన్సియా యూనివర్సిటీ నిపుణులు పరిశోధించి తేల్చారు. 55 నుంచి 80 ఏళ్ల మధ్య ఉన్న 945 మందిపై జరిపిన పరిశోధనలో ఈ విషయాన్ని గుర్తించారు... చేపలు తిన్నవారిలో డయాబెటీస్‌ సాధారణ స్థితిలో ఉన్నట్లు కనిపెట్టారు. అదే సమయంలో మాంసం తిన్న వారిలో షుగర్ లెవల్స్ ప్రమాదకర స్థాయిలో ఉన్నట్లు నిర్ధారించారు... చేపలు తినడం వల్ల డయాబెటీస్‌ను కంట్రోల్‌ చేస్తున్నట్లు గుర్తించారు... చేపల వల్ల గుండె కూడా ఆరోగ్యంగా ఉంటుందని వలెన్సియా యూనివర్సిటీ పరిశోధకులు చెబుతున్నారు. చేప తినండి.. చక్కెర వ్యాధికి దూరం కండి.

TV9ని అమ్మేశారట..!

2011-11-14T15:03:00.001+05:30

తెలుగు టెలివిజన్ న్యూస్ లో ఓ కొత్త ఒరవడిని సృష్టించిన టీవీ9 యాజమాన్యం మారిపోతోంది. టీవీ9ని స్థాపించిన ఐలాబ్స్ ఛైర్మన్ శ్రీనిరాజు తన వాటాను అమ్మేయడానికి సిద్ధమయ్యారు. ఎడిల్ వీస్ అనే ఫండ్ మేనేజ్ మెంట్ సంస్థ, ముంబాయికి చెందిన ఓ మీడియా సంస్థ (ఇప్పటివరకూ తెలిసిన సమాచారం ప్రకారం టైమ్స్ గ్రూప్) సంయుక్తంగా శ్రీనిరాజు వాటాను కొనుగోలు చేస్తున్నాయి. ఐలాబ్స్ కున్న 60 శాతం వాటాను ఈ రెండు సంస్థలు కొంటున్నాయి. వాస్తవానికి 35 శాతం వాటాను మాత్రమే అమ్మాలని శ్రీనిరాజు కొంతకాలంగా ప్రయత్నాలు చేస్తున్నారు. అయితే, మొత్తం వాటాను అమ్మేయాలంటూ ఈ సంస్థలు అడిగినట్లు సమాచారం. డీల్ సైజ్ దాదాపు 500 కోట్ల వరకూ ఉండొచ్చని అంచనా. రెండేళ్ల క్రితం వరకూ శ్రీనిరాజుకు 80 శాతం వాటా ఉండేది అయితే, 20 శాతం వాటాను SAIF పార్టనర్స్ కు అమ్మేశారు. మిగిలిన 20 శాతం రవిప్రకాశ్ కు, అతని సహచరులకు ఉంది. టీవీ9 ప్రస్తుతం తెలుగు, కన్నడ, మరాఠీ, గుజరాతీ న్యూస్ ఛానళ్లతో పాటు, బెంగళూరు కేంద్రంగా న్యూస్ 9, హైదారాబాద్ కేంద్రంగా టీవీ1ను నడుపుతోంది. ఇవన్నీ కూడా కొత్త మేనేజ్ మెంట్ కిందకు వెళ్లిపోనున్నాయి. మార్చిలో టేకోవర్ జరిగే అవకాశాలు కనిపిస్తున్నాయి. ఇంతవరకూ టీవీ9లో రవిప్రకాశ్ ఆడింది ఆట..పాడింది పాటగా చెలామణీ అయ్యింది. మరి కొత్త మేనేజ్ మెంట్ వస్తే పరిస్థితి ఏమిటన్నది టీవీ9 వర్గాల్లో గుబులు పుట్టిస్తోంది.

సీబీఐ ఉచ్చులో చంద్రబాబు

2011-11-14T14:05:00.001+05:30

చంద్రబాబు ఆస్తులపై సీబీఐ దర్యాప్తు త్వరలో మొదలుకానుంది. ఇటీవలే తన కుటుంబ సభ్యుల ఆస్తులంటూ, ఎప్పటి లెక్కలనో ప్రకటించిన చంద్రబాబు.. ఇప్పుడు వాటి వాస్తవ విలువను చెప్పాల్సిన పరిస్థితి ఎదురుకాబోతోంది. వైఎస్సార్ పార్టీ గౌరవ అధ్యక్షురాలు, రాజశేఖరరెడ్డి సతీమణి విజయలక్ష్మి వేసిన పిటిషన్ పై విచారించిన హైకోర్ట్.. చంద్రబాబు ఆస్తులపై ప్రాథమిక విచారణకు ఆదేశించింది. ప్రాథమిక విచారణలో ఏమైనా అవకతవకలకు పాల్పడినట్లు తేలితే, అప్పుడు పూర్తిస్థాయి దర్యాప్తునకు ఆదేశించే అవకాశాలున్నాయి. రాష్ట్ర మంత్రి శంకర్రావు వేసిన పిటిషన్ పై ఇదే రీతిలో స్పందించిన న్యాయస్థానం జగన్ పై ముందు ప్రాథమిక విచారణకు, ఆ తర్వాత పూర్తిస్థాయి దర్యాప్తునకు ఆదేశించిన విషయం అందిరకీ తెలిసిందే. మరి చంద్రబాబు విషయంలోనూ అదే జరుగుతుందా లేదా అన్నది తేలాల్సి ఉంది. మూడు నెలల్లోగా ప్రాథమిక విచారణను పూర్తి చేసి వివరాలను సీల్డ్ కవర్ లో అందజేయాలని సీబీఐను కోర్టు ఆదేశించింది. ఎమ్మార్, గాలి కేసుల్లో తీరికలేకుండా ఉన్న సీబీఐ, ఇప్పుడు చంద్రబాబు కేసును కూడా మోయాల్సి ఉంది. ఓ రకంగా సీబీఐ ఉచ్చు చంద్రబాబు చుట్టూ బిగుసుకొంటోంది. మరి దాన్నుంచి బయటపడతారో లేక, చిక్కుకుపోతారో తేలాల్సిఉంది.

చిరు చేసే సమాజసేవ ఇదే..!

2011-11-13T18:55:00.001+05:30

సామాజిక సేవ అని, పేదలకు ఆపద్భాంవుడినని ప్రగల్భాలు పలికే చిరంజీవి నిజ స్వరూపం ఇది. ఓ పేద మహిళ కాళ్లావేళ్లా పడ్డా పట్టించుకోకుండా పారిపోయిన తీరిది. సేవంటే నటించడం కాదని చిరంజీవి నిరూపించిన సంఘటన ఇది. ఇది చిరంజీవికే సాధ్యం. చిరంజీవి చిన్న మాటన్నా పడలేని ఫ్యాన్స్, చిరు పేరుతో ఎన్నో సేవాకార్యక్రమాలు చేసే అభిమానులు దీనిపై ఏమంటారో..

మీ కోసం స్పెషల్ డిస్కౌంట్

2011-11-11T20:15:00.001+05:30

24 గంటలు బ్రౌజర్లకు స్పెషల్ న్యూస్. మీ కోసం Greendust.com స్పెషల్ ఆఫర్ ను అందిస్తోంది. LCD టీవీలపై 1500 రూపాయల అదనపు తగ్గింపు. Haier LCD 16L1673 ,Philips LCD 32’’ ,LG LCD 32’’, LG LCD 22’’ల కొనుగోలుపై అదనంగా మీరు 1500 రూపాయల డిస్కౌంట్ ను పొందొచ్చు. బిల్ కట్టే ముందు LCDSPLఅనే కోడ్ ను తప్పకుండా నమోదు చేయండి.
click here to buy lcd

హోం అప్లయెన్స్ పై అదనంగా 200 రూపాయల డిస్కౌంట్ ను అందిస్తోంది. దీన్ని సద్వినియోగం చేసుకోవడానికి కింద లింకును క్లిక్ చేసి, బిల్ పే చేసేటప్పుడు కూపన్ కోడ్ GD200Nov ను ఎంటర్ చేయండి.. మహారాజా డ్రై ఐరన్, హ్యాండ్ బ్లెండర్, టోస్టర్, హాట్ లైన్ శాండ్ విచ్ మేకర్ పై ఈ ఆఫర్ లభ్యం.
click here to get discount

నవంబర్ 30 వరకే ఈ అవకాశం అందుబాటులో ఉంటుంది. కాబట్టి త్వరపడండి.

11.11.11. మహేశ్ బాబు బిజినెస్ మ్యాన్ ఫస్ట్ పోస్టర్

2011-11-11T20:00:00.001+05:30

11.11.11 ను ప్రత్యేకంగా సెలబ్రేట్ చేసుకున్నాడు డైరెక్టర్ పూరీ జగన్నాథ్. మళ్లీ తెలుగులో భారీ హిట్ కొట్టాలని ఎంతో కసిగా మహేశ్ బాబుతో తీస్తున్న బిజినెస్ మ్యాన్ పోస్టర్ ను ఈ సందర్భంగా రిలీజ్ చేశాడు. వచ్చే నెల 11కు ఆడియోను లాంచ్ చేసే ఆలోచనలో కూడా ఉన్నాడు. అంతేకాదు, జనవరి 11 న రిలీజ్ కు సన్నాహాలు చేసుకుంటున్నాడు. అన్నీ పదకొండ్లే కుదిరేలా కదులుతున్నాడు. పోకిరి రికార్డులను మహేశ్ తాజా చిత్రం దూకుడు బద్దలు కొట్టడంతో, వాటిని బిజినెస్ మ్యాన్ తిరగరాస్తుందన్న నమ్మకంతో ఉన్నాడు పూరీ. అంతేకాదు, వరసగా ప్లాప్ లతో ఇబ్బందుల్లో పడ్డ తన కెరీర్ ను, ఆర్థిక స్థితిని ఈ సినిమాతో మార్చుకోవాలనుకుంటున్నాడు. బెస్టాఫ్ లక్ జగన్.

పూనం అందరికే షాకిస్తే.. ఈ సారి పూనంకే షాక్..

2011-11-11T18:49:00.001+05:30

అర్ధనగ్న ఫోజులతో, కౌంట్ డౌన్ అంటూ మగాళ్లకు మత్తెక్కించే ఫోటోలను అర్థరాత్రి పూట రిలీజ్ చేయడంలో బాగా పేరుగడించిన పూనం పాండేకు దిమ్మ తిరిగిపోయింది. అవును మరి, ఆమె ఫోటోను చూసుకుని ఆమెకు అంతవరకూ ఉన్న మత్తు వదిలిపోయింది. పూర్తి నగ్నంగా ఫోటోలు దిగుతానని అప్పుడెప్పుడో వాడీవేడి ప్రకటనలు గుప్పించిన ఈ అమ్మడు, నగ్నంగా ఉంటే ఎలా ఉంటుందో చూడమంటూ కొంతమంది న్యూడ్ ఫోటోలను ఇంటర్నెట్ లో వదిలారు. వీటిని చూసి తెగ మండిపడుతోంది పూనం. పూర్తినగ్నంగా ఉన్న పూనం.. విష్ణుమూర్తి రూపంలో ఉన్న సచిన్ ఫోటో ఫ్రేమ్ ను పట్టుకొని నిలబడి ఉంది. ఆ ఫోటో ముందు షోయబ్ అక్తర్ మోకరిల్లి ఉన్నట్లు కనిపిస్తోంది. దీనిపై పూనం ట్వీట్ కూడా చేసింది. ఈ ఫోటో చూసి బాధపడుతున్నట్లు చెప్పింది. అయితే, నగ్నంగా చూపించనందుకు కాదట.. క్రికెట్ ను అవమానించినందుకట. ఇలాంటి ఫోటోను సృష్టిస్తారని కలలో కూడా ఊహించలేదంటోంది పూనమ్.

తాజ్ మహల్ చూడడం ఇక కష్టమే

2011-11-11T18:39:00.001+05:30

అమర ప్రేమకు అదో నిర్వచనం. షాజహాన్-ముంతాజ్ బేగంల బంధానికి అదో నిదర్శనం. అదే... ప్రపంచ వింతల్లో ఒకటిగా వినుతికెక్కిన తాజ్‌మహల్. ఎన్నిసార్లు చూసినా, ఎంతసేపు చూసినా తనవితీరదు.. కానీ ఇకపై అలా తాజ్‌మహల్‌ చూస్తూ మైమరిచిపోతామంటే కుదరదు.. ఎందుకంటే.. తాజ్‌మహల్ పర్యాటకులపై త్వరలోనే కొత్త రూల్స్ కసితీర్చుకోబోతున్నాయి.. తాజ్‌మహల్‌ను చూడాలనుకునేవారికి, చూడడానికి ఆగ్రా వరకూ వెళ్లేవారికి ఓ చేదువార్త. తాజ్‌మహల్‌ను మైమరిచిపోయి చూడడానికి ఒప్పుకోమంటోంది భారత పురావస్తుశాఖ. విపరీతంగా వస్తున్న పర్యాటకులతో, అపురూప కట్టడానికి ప్రమాదం పొంచి ఉందని ఆర్కియాలజీ డిపార్ట్‌మెంట్ భయపడుతోంది. అందుకే, పర్యాటకులను కంట్రోల్ చేయడానికి ఇకపై షిఫ్ట్ సిస్టంను ప్రవేశ పెట్టాలనుకొంటోంది. కొన్నేళ్లుగా తాజ్‌మహల్‌ చూడడానికి వచ్చే దేశవిదేశీ పర్యాటకుల సంఖ్య విపరీతంగా పెరిగిపోయింది. ఇది ఆహ్వానించదగ్గ పరిణామమే అయినా, దాని వల్ల, తాజ్‌మహల్‌కు ప్రమాదం అని అధికారులు ఆందోళన వ్యక్తం చేస్తున్నారు. దీనికి తోడు.. యమునా నదిలో నీటి ప్రవాహం గణనీయంగా తగ్గిపోవడం వల్లా.. ఈ ప్రేమమందిరం పునాదులకు సమస్యలు రావచ్చంటున్నారు. యమునలో నీరు తగ్గిపోవడం, భారీగా పర్యాటకులు రావడం వల్ల.. తాజ్‌మహల్ కూలిపోయినా ఆశ్చర్యం లేదంటున్నారు. అందుకే, తాజ్‌మహల్‌ను రక్షించడం కోసమే.. షిఫ్ట్ పద్దతికి జై కొడుతున్నారు. అధికారుల నిర్ణయం పట్ల పర్యాటకులు మాత్రం తీవ్ర అసంతృప్తిని వ్యక్త చేస్తున్నారు. సుదూర ప్రాంతాల నుంచి వచ్చిన వారిని కాసేపట్లోనే పంపేయాలనుకోవడం సరికాదంటున్నారు.

బీరాలు పోయారు.. బెదిరించారు.. చివరకు తోక ముడిచారు

2011-11-08T19:19:00.002+05:30

పెట్రోల్ ధరలు పెరిగీ పెరగగానే తృణమూల్ అధినేత్రి మమతా బెనర్జీ అగ్గిమీద గుగ్లిలం అయ్యారు. ప్రభుత్వం ప్రజావ్యతిరేక చర్యలకు పాల్పడుతోందని, ధరల పెంపుతో సామాన్యుడి జీవితం అతలాకుతలమైపోయిందని ఆవేదన వ్యక్తం చేశారు. తమ ఎంపీలంతా మద్దతు ఉపసంహరించమంటున్నా, ప్రధానితో భేటీకోసం ఆగామన్నారు. వెనక్కి తగ్గకపోతే, సర్కార్ నుంచి వైదొలగడానికీ సిద్ధమేనన్నారు. మమత మాటలతో యూపీఏ విచ్చిన్న ఖాయమనే అంతా అనుకున్నారు. మన్మోహన్ సర్కార్ ధరలు తగ్గించమని స్పష్టంగా ప్రకటించడంతో, యూపీఏ నుంచి తృణమూల్ చీలిపోతుందనే చాలా మంది అంచనాకు వచ్చారు. మమత పెట్టిన డెడ్ లైన్ దగ్గర పడింది. TMC కి చెందిన 18 మంది లోక్ సభ ఎంపీలు, ఆరుగురు రాజ్యసభ ఎంపీలు మంగళవారం ప్రధానితో ములాఖత్ అయ్యారు. రాజీనామా లేఖలు ఇచ్చి వస్తారనుకుంటే, రాజీ పడి వచ్చారు. సమావేశం అయ్యాక, ప్రధానికి తమ అసంతృప్తిని తెలయజేశామని, సామాన్యులు ఈ ధరల పోటును భరించలేరని చెప్పామని, ప్రధాని కూడా తమతో ఏకీభవించారని స్టేట్ మెంట్ ఇచ్చారు. మరోసారి ధరలు పెరిగితే మాత్రం మద్దతు ఉపసంహరిస్తామంటూ, ప్రస్తుతానికి ఉన్న అనుమానాలను పటాపంచలు చేశారు. ఆది నుంచీ అంతే..మమత వ్యవహార శైలిని దగ్గరనుంచి పరిశీలించినవారికి, ఆమెదంతా హడావిడిగానే కనిపిస్తుంది. ఆవేశంగా ముందడుగు వేయడం, ఆ తర్వాత వెనక్కి తగ్గడం మమతకు కొత్తేమీ కాదు. రెండువేల సంవత్సరంలోనూ వాజ్‌పేయి ప్రభుత్వాన్ని ఇలానే ముప్పుతిప్పలు పెట్టారు మమతా బెనర్జీ. పెట్రోల్ ధరలు పెంచడాన్ని నిరసిస్తూ, సెప్టెంబర్ 30,2000 న మంత్రి పదవికి రాజీనామా చేశారు. కానీ, వాజ్‌పేయి హామీ ఇవ్వడంతో వారంలో వెనక్కి తగ్గారు. అదే ఏడాది డిసెంబర్ 3న పంజాబ్‌లో జరిగిన రైలు ప్రమాదానికి నైతిక బాధ్యత వహిస్తూ పదవికి రాజీనామా చేశారు. కానీ ప్రధాని ఆమోదించకపోవడంతో పదవిలోనే కొనసాగారు. 2001, మార్చి లో తెహల్కా కుంభకోణం బయటపడ్డప్పుడు , ఎన్డీఏకు తృణమూల్ మద్దతు ఉపసంహరించింది. ప్రభుత్వం నుంచి బయటకు వచ్చి.. కాంగ్రెస్‌కు స్నేహహస్తం చాచింది. అప్పట్లో బెంగాల్‌లో ఎన్నికలు ఉండడంతో బెంగాల్ దీదీ.. కాంగ్రెస్ వైపు అడుగులు వేశారు. కానీ, మే నెలలో జరిగిన ఎన్నికల్లో తృణమూల్‌కు చావు తప్పి కన్ను లొట్టపోయింది. దారుణంగా ఓడిపోవడంతో మమత మనసు మరోసారి మారింది. జూన్‌-జులైల మధ్య కాంగ్రెస్‌తో సంబంధాలు తెంచుకుని, మళ్లీ ఎన్డీఏ వైపు అడుగులు వేశారు. ఆగస్టు 27న ఎన్డీఏలో అధికారికంగా చేరారు. ఆ తర్వాత మళ్లీ ఎన్డీఏను వదిలిపెట్టి, యూపీఏతో సంబంధాలు కొనసాగిస్తున్నారు.

సీన్ రివర్స్: పట్నం నుంచి పల్లెకు

2011-11-08T19:11:00.002+05:30

పల్లె రమ్మంటుంది.. పట్నం పొమ్మంటుంది. ఇది పాత సామెతే.. కానీ ఈ మధ్య రూట్ మారింది. ఉపాధి కోసం పట్నాలకు వలసలు పెరిగిపోయాయి. ఇదీ ఇప్పుడు గతమే.. ఎందుకంటే.. పట్నాల నుంచి పల్లెలలకు వలసలు మొదలవుతున్నాయి.. పట్నం పొమ్మంటుంటే... పల్లె మాత్రం ఉపాధి చూపిస్తాం రమ్మంటోంది... ఖమ్మం జిల్లాలోనే ఏకైక పారిశ్రామిక పట్టణం పాల్వంచ. రెండు స్టీల్ ఫ్యాక్టరీలతో పాటు.. తెలంగాణలోనే అతిపెద్ద పవర్‌ ప్లాంట్ ఇక్కడ పనిచేస్తున్నాయి. వీటికి అనుబంధంగా చిన్నా చితకా చాలా పరిశ్రమలు కొలువుదీరాయి. వీటిల్లో పనిచేయడం కోసం, ఖమ్మం జిల్లాతో పాటు రాష్ట్రంలోని ఇతర జిల్లాల నుంచి వందలాది మంది పాల్వంచకు తరలివచ్చారు. ఇంతకాలం ఇక్కడ ఉపాధికి ఢోకా లేకున్నా.. ఇప్పుడిప్పుడే పరిస్థితిలో మార్పు వస్తోంది. పాల్వంచలో జనాభా విపరీతంగా పెరిగిపోయింది. జనానికి తగ్గట్లుగా కొత్త పరిశ్రమలు ఏర్పడలేదు. దీంతో, ఉన్నవారికి ఉపాధి కరువయ్యింది. ప్రత్యేకించి మహిళలకు పని దొరకడం గగనంగా మారింది. దీంతో.. మహిళలంతా పల్లెబాట పట్టారు. రోజూ 30-40 కిలోమీటర్లు వెళ్లి మరీ పొలాల్లో పనిచేస్తున్నారు. పాల్వంచ చుట్టుపక్కల పల్లెల్లో పత్తి,మిరప చేలల్లో పనిచేయడానికి వందలాది మంది నిత్యం వెళుతున్నారు. పని ముగించుకుని సాయంత్రానికి తిరిగి పాల్వంచకు చేరుకుంటున్నారు. కూలీల కొరతతో ఇంతకాలం ఇబ్బందులు పడ్డ రైతులు, తాజా పరిణామంతో ఊపిరి పీల్చుకుంటున్నారు. స్థానికంగా ఎప్పుడైనా కూలీలు దొరకకపోతే, రైతులు పాల్వంచకు వచ్చి మరీ వీరిని తీసుకువెళుతున్నారు. పాల్వంచ పరిస్థితి త్వరలోనే మరికొన్ని పట్టణాలకు వచ్చినా ఆశ్చర్యం లేదు.

సత్యం కుంభకోణం నేపథ్యంగా వర్మ సినిమా..

2011-11-05T21:55:00.000+05:30

ఇన్ఫర్మేషన్ టెక్నాలజీ నేపథ్యంగా రాంగోపాల్ వర్మ ఓ సినిమాను త్వరలో తీయబోతున్నారు. అందుకు ఇప్పటినుంచే పావులు కదుపుతున్నారు. ఐటీ ప్రపంచంలో, కార్పోరేట్ ప్రపంచంలో సంచలనం సృష్టించిన సత్యం కుంభకోణంలో ప్రధాన పాత్ర పోషించిన రామలింగరాజు స్టోరీనే కావచ్చని ప్రచారం సాగుతోంది. 32 నెలల పాటు జైలు జీవితం గడిపిన రామలింగరాజు బెయిల్‌ పై విడుదలై ఇంటికి చేరుకున్న కాసేపటికే , వర్మ ఆయన ఇంటికి వెళ్లి మరీ సమావేశమయ్యారు. ఐటీ ఇండస్ట్రీ గురించి వీరిద్దరి మధ్యా చర్చ సాగినట్లు తెలుస్తోంది. ఎప్పుడు సంచలనాలతో, వివాదాలతో సినిమా మొదలుపెట్టే వర్మ, తన ట్రెండ్‌ను కొనసాగిస్తూ.. రామలింగరాజుతో భేటీ అయ్యారు. సినిమాకు స్కెచ్ వేశారు.

సామాన్యుడి చెంపపగలగొట్టిన ఎమ్మెల్యే

2011-11-05T21:49:00.000+05:30

ఈ ఫోటోలో ఉన్న దృశ్యం నిజంగానే జరిగింది. కొడుతున్న వ్యక్తి.. మెదక్‌ జిల్లా సంగారెడ్డి నియోజకవర్గం ఎమ్మెల్యే తూర్పు జయప్రకాష్‌రెడ్డి. దెబ్బలు తింటున్న వ్యక్తి సదాశివపేటకు చెందిన చాకలి బాలరాజు. అక్కడ జరిగిన రచ్చబండలో ఎమ్మెల్యే ఇలా చేయి పారేసుకున్నారు.

సదాశివపేటలో జరిగిన రచ్చబండ కార్యక్రమంలో ప్రజాప్రతినిధులు, అధికారులు ... స్థానికుల సమస్యలు తెలుసుకుంటుండగా.. పెద్ద మూటతో అక్కడికి బాలరాజు వచ్చాడు. అయితే పోలీసులు, ఎమ్మెల్యే అనుచరులు అతన్ని అడ్డుకోవడంతో కొద్దిసేపు అక్కడ గందరగోళం నెలకొంది. ఈ లోపు అతన్ని తన దగ్గరకు పంపించాలని ఎమ్మెల్యే పోలీసులను ఆదేశించాడు. ఎమ్మెల్యే దగ్గరకు వచ్చిన అతను తాను తీసుకువచ్చిన బియ్యం చూపించాడు. ఈ బియ్యం బాగోలేవన్నాడు.. రూపాయి కిలో బియ్యం పథకం కింద వీటిని ఇస్తున్నారని ఎమ్మెల్యే దృష్టికి తీసుకు వచ్చాడు. ఎలా తినాలి అని ప్రశ్నించాడు. దీంతో ఎమ్మెల్యే అక్కడే ఉన్న ఓ మహిళకు ఆ బియ్యం చూపించాడు.. ఆమె బాగానే ఉన్నాయని చెప్పడంతో, బాలరాజు చెంపను ఎమ్మెల్యే పగలగొట్టాడు. అందరి ముందే విచక్షణను కోల్పోయారు ఎమ్మెల్యే.. సామాన్యుడిపై విరుచుకుపడ్డారు.. ఎమ్మెల్యేకు చెప్పుకుంటేనైనా మంచి బియ్యం అందుతాయని ఆశగా వెళ్లిన ఆ సామాన్యుడికి.. చివరకు చెంపదెబ్బ దక్కింది. జనం ఓట్లతో గెలిచిన ఎమ్మెల్యే.. ఇలా ప్రవర్తించడమే వివాదాస్పదమవుతోంది.

బీజేపీతోనే సాధ్యం.. !

2011-11-05T21:48:00.000+05:30

తెలంగాణ ఏర్పాటు బీజేపీతోనే సాధ్యమని లోక్‌సభ ప్రతిపక్ష నాయకురాలు సుష్మా స్వరాజ్ ప్రకటించారు. వచ్చే ఎన్నికల్లో ఎన్డీఏదే విజయం అన్న ఆమె, అధికారంలోకి వచ్చిన మూడునెలల్లో ప్రత్యేక రాష్ట్రాన్ని ఏర్పాటు చేస్తామన్నారు. తెలంగాణపై యూపీఏ మోసం చేసిందని విమర్శించారు. నల్గొండలో బీజేపీ నిర్వహించిన పోరు తెలంగాణ సభలో ఆమె పాల్గొన్నారు. చిన్న రాష్ట్రాల ఏర్పాటు ద్వారా ప్రజల మధ్య విద్వేషాలు సృష్టించాలని అనుకోవడం లేదని, అభివృద్ధి కోసమేనని ఆమె వివరణ ఇచ్చారు. తాము ఏర్పాటు చేసిన మూడు రాష్ట్రాల్లోనూ బీజేపీ ప్రభుత్వాలే ఉన్నాయని గుర్తు చేశారు. తెలంగాణ వస్తే, కృష్ణా నది నీళ్లను నల్గొండ జిల్లాకు రప్పించి ఫ్లోరైడ్ సమస్యను తీర్చుతామన్నారు..